ისლამი აფხაზეთში - პოლიტიკა მეჩეთების წინააღმდეგ

სოციალურ ქსელში გავრცელდა აფხაზეთში არსებული საგანმანათლებლო ცენტრ "ისლამის ოქროს შუალედის" ხელმძღვანელის, ისმაილ ალ-სუფის (რუსლან ენიკას) მიმართვა, სადაც ის აფხაზეთის ხელმძღვანელობას ანტიისლამური პოლიტიკის გატარებაში ადანაშაულებს.

ისმაილ ალ სუფის თქმით, კავკასიასა და აფხაზეთში მართლმადიდებლების განხორციელებული სისხლიანი პროცესების შემდეგ, ისლამურმა რელიგიამ არსებობა შეწყვიტა.

"ბოლო დროს აფხაზეთის ხელმძღვანელობა მუდმივ ზეწოლას ახორციელებს ისლამის მიმდევარ აფხაზებზე. მძიმე სანახავია, როდესაც აფხაზ მუსლიმებს ლოცვის დროს ესვრიან. წამლავენ მათ, როგორც ეს მოხდა მუფტ ადილ გაბლისა და მისი მეუღლის მიმართ. რელიგიური მოტივების გამო გაგრაში, აფხაზეთის საზოგადოებრივი პალატის ხელმძღვანელი ემიკ ჩაქმანი მოკლეს.

ლოცვისას მომხდარი სროლებისას 34 წლის რასულ ფილია მოკლეს. ასევე, აფხაზეთის დედაქალაქში იმამს, სალიხა კვარაცხელიას დაესხნენ თავს. ამ ყველაფრის შესახებ აფხაზი მუსლიმები დუმან", - ამბობს ისმაილ სუფი თავის მიმართვაში.

ამ ინფორმაციას აფხაზურ საზოგადოებაში ცხარე დისკუსია მოჰყვა - ჯერ კიდევ წლების წინ გუდაუთაში, ბაღაფში-ანქვაბის ლიდერობის დროს დაწყებული მუსლიმური კულტურის ცენტრის მშენებლობა დაბლოკეს. აფხაზეთის მუსლიმთა ლიდერის სალიხ კვარაცხელიას თქმით, მეჩეთის მშენებლობასთან დაკავშირებით პრობლემები არსებობს, ამ საკითხმა პოლიტიკური სახე მიიღო და ამიტომაც დღემდე მოუგვარებელია. მაშინ, როდესაც აფხაზეთში ამდენი ტერიტორია აუთვისებელია, მეჩეთისთვის მიწის ნაკვეთის გამოყოფა ვერ მოხერხდა. რამდენიმე ათეული წელია ამის მოგვარებას გვპირდებიან, მაგრამ ჯერჯერობით არაფერი შეცვლილა.

მუსლიმი აფხაზების თქმით, როდესაც ამბობენ, რომ აფხაზეთი ძალიან ტოლერანტულია, სინამდვილეში რეგიონში ისლამოფობია ვითარდება. "მიუხედავად იმისა, რომ მუსლიმი ქმარი და მართლმადიდებელი ცოლი ლამის ჩვეულებრივი რამ არის, მართლმადიდებლები მუსლიმების მიმართ მაინც შეუწყნარებელნი არიან", - წერენ აფხაზურ პრესაში.

თუმცა, აფხაზი ჟურნალისტების თქმით, ვიღაცეებს აწყობთ და ამ თემას ხელოვნურად აგორებენ, სინამდვილეში კი საკითხი ასე მწვავედ არ დგას.

"ბოლო დროს, აფხაზეთში ხშირად შეხვდებით ახალგაზრდებს, კონკრეტულად კი გოგონებს, რომლებიც ისე იმოსებიან, რომ ძნელი მისახვედრი არ არის, ისლამის მიმდევრები არიან. დიახ, ისლამი აფხაზეთში საკმაოდ აქტიურად ვრცელდება, ამაში აფხაზი სასულიერო პირების წვლილი დიდია", - ამბობს აფხაზი ჟურნალისტი როინ აგრბა.

მისივე თქმით, სოციალურ ქსელში არიან ადამიანები, რომლებიც ისლამს გააფთრებით ებრძვიან. "მათ მიაჩნიათ, რომ ჩვენ საკურორტო ზონა ვართ და ეს ჩვენი კულტურის ნაწილი არ არის. ძველი დროის გადმონაშთია. ჩვენი პოლიტიკოსებიც იმეორებენ, რომ აფხაზეთი ქრისტიანული ქვეყანაა. სინამდვილეში კი იქ ყოველთვის ცხოვრობდნენ მუსლიმი აფხაზები, ამის მაგალითი ჩემი ოჯახია. მე მორწმუნე მუსლიმი ვარ, მეუღლე მართლმადიდებელი ქრისტიანი მყავს და არასდროს მიფიქრია, რომ მას რელიგია შეეცვალა", - აცხადებს ის.

აფხაზი ჟურნალისტის თქმით, სიმართლის დამალვითა და უგულებელყოფით ვერაფერი შეიცვლება - სალიხა კვარაცხელიას ესროლეს და ის სასწაულებრივად გადარჩა, თუმცა, ადგილობრივ "სამართალდამცველებს" არაფერი გაუკეთებიათ.

"აფხაზეთი რუსეთის დახმარების მიღებით, მის ბიუროკრატიულ სისტემასაც იღებს, რომელიც აფხაზეთში ტრადიციად იქცა. აუცილებელია, მუსლიმებს თავიანთ პრობლემებზე ხმამაღლა საუბრის საშუალება მიეცეთ და იატაკქვეშიდან გამოვიდნენ", - აცხადებს აგრბა.

აფხაზი მუსლიმების თქმით, ისინი მენტალურად ახლოს არიან ჩრდილო კავკასიელებთან. შესაბამისად, მათ მუდმივი ურთიერთობა აქვთ ჩრდილო კავკასიელ მუსლიმთა ცენტრთან და მათ შეხვედრებშიც მონაწილეობენ.

როინ აგრბას თქმით, ახლა აფხაზეთში ისლამოფობია აშკარაა და ამის უარყოფა ძნელია, ამის მიზეზი ის არის, რომ ახლო აღმოსავლეთის ამბებმა მოსახლეობა შეაშინა.

"მე არ ვიცი ასეთი კონკრეტული ფაქტები, როდესაც აფხაზ ახალგაზრდებს ქორწინებისას ეკითხებოდნენ, რომელი რელიგიის წარმომადგენელია. აფხაზებისთვის მნიშვნელოვანია კულტურა და ტრადიცია, რომელსაც "აფსუარას" უწოდებენ, შემდეგ არის რელიგიური მრწამსი", - ამბობს აფხაზი ჟურნალისტი.

ლალი პაპასკირი

AMBEBI.GE