ფოტოები დანგრეული თბილისიდან - ქალაქის ძველ უბნებში მოსახლეობა წარმოუდგენელ საფრთხეში ცხოვრობს
"სოციალური კვლევის და ანალიზის ინსტიტუტის" მიერ ჩატარებული კვლევის თანახმად, თბილისის მაცხოვრებლები ქალაქში არსებულ ერთ-ერთ მწვავე პრობლემად, საყრდენ კედლებსა და ავარიულ შენობებს ასახელებენ. AMBEBI.GE ამ საკითხით დაინტერესდა და სცადა იმის გარკვევას, რეალურად რა საფრთხის წინაშე დგანან ის მოქალაქეები, რომლებიც ამ დრომდე ძველ და ავარიულ შენობებში ცხოვრობენ.
თბილისის ძველი უბნების ბინადრები ჩვენთან საუბარში ძირითადად იმაზე საუბრობენ, რომ არცერთმა ხელისუფლებამ არ გაიმეტა მათთვის არც ყურადღება და არც ბიუჯეტი, შენობების საფუძვლიანი აღდგენა-გამაგრებისთვის.
იხილეთ ვიდეო: "სახლი ზუზუნებს ისეთ დღეში ვართ" - რა ვითარებაა ძველი თბილისის ისტორიულ სახლებში
თაბუკაშვილის ქუჩაზე ადვილად შენიშნავთ ნაცრისფრად შელესილ კედლებს. ლილი გუმბერიძე, თაბუკაშვილის #42-ში წლებია ცხოვრობს. როგორც ის ამბობს, არაერთხელ მიუმართავს სახელმწიფოსთვის დახმარებისთვის, თუმცა პასუხი არ არის.
"სახლი ზუზუნებს, ისეთ დღეში ვართ. შენობა 150 წლისაა, რომელიც ვითომ გაამაგრეს და არის "ბალიშებზე". როცა დაიწყებს დაშლას, დაიწყებს ზემოდან და შუაზე გაიხლიჩება. სირცხვილი არაა, ოპერაში მოსული სტუმრები სულ ჩვენს სახლს რომ იღებენ?" - აღნიშნავს ლილი გუმბერიძე.
თაბუკაშვილის ქუჩა #42
ამ პრობლემის შეხსენებისას ადგილობრივი ხელისუფლების არგუმენტი ხშირად ისაა, რომ ავარიული შენობების უმეტესობას კულტურული მემკვიდრეობის უძრავი ძეგლის სტატუსი აქვს, რაც შენობების საფუძვლიანად აღდგენას აფერხებს.
თაბუკაშვილის #38-ში მცხოვრები ზაურ ჯახველაძე ჩვენთან სწორედ, ამ პრობლემაზე საუბრობს. ის საცხოვრებელი სახლის მეორე სართულის იმ ნაწილსაც გვაჩვენებს, რომლის ჩამონგრევის დროსაც მისი მეუღლეც ჩამოვარდა, თუმცა საბედნიეროდ, გადარჩა.
"სახლი ინგრევა უკვე, რაღა უნდა ნახოთ? როგორც გარეთ წვიმს, ისე წვიმს შიგნით. ღამე მესმის ხოლმე, სადაც წყალი ჩამოდის, როგორ ცვივა ჭერის ნაწილები. 10 წლის წინ გავაკეთებინე სახურავი, რომელმაც 1 წელიც ვერ გაძლო" - აღნიშნავს ჯახველაძე.
თაბუკაშვილის ქუჩა #38
ძველი თბილისის მცხოვრებლები ეჭვობენ, რომ სახელმწიფო განზრახ ანიჭებს მათ საცხოვრებლებს კულტურული ძეგლის სტატუსს, რათა თავი აარიდონ პასუხისმგებლობას. "რას შვრებიან იცით? სპეციალურად ისტორიული ძეგლებშის სიაში შეჰყავთ, რომ არ გააკეთონ" - ამბობს ზაურ ჯახველაძე.
თაბუკაშვილის ქუჩის მსგავსი ვითარება გვხვდება ბეთლემის აღმართზეც და ძველი თბილისის სხვა ქუჩებზეც. ქუჩის ერთ-ერთი მოსახლე გვაჩვენებს ჩამოშლილ ჭერსა და იატაკს, რომელიც სიარულის დროს ირხევა.
ბეთლემის აღმართი
"უბრალოდ გამოსვლაც კი საშიშია, თავში ვინმეს რამე არ დაეცეს, სიცოცხლისთვისაა უკვე სახიფათო", - აღნიშნავს ახალგაზრდა ქალბატონი.
კულტურისა და ძეგლთა დაცვის სამინისტროს 2015 წლის მონაცემებით, კულტურული მემკვიდრეობის უძრავი ძეგლის სტატუსი თბილისში მდებარე 1773 შენობა-ნაგებობას ჰქონდა მინიჭებული. ავარიული შენობების ნაწილი რკინის კონსრტუქციებით გაამაგრეს, ნაწილი კი, ამ დრომდე ავარიულ მდგომარეობაშია.
ნარიტა ჩხაიძე, თეკო ფარეშიშვილი
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია
