რა თანხა დაგჭირდებათ საქართველოში 4-სულიანი ოჯახის სარჩენად - საარსებო მინიმუმი და დათვლილი ხარჯები

2017 წლის სექტემბრის მონაცემების მიხედვით, საშუალო მომხმარებლის საარსებო მინიმუმი საქართველოში - 149.5 ლარი, ოთხსულიანი ოჯახის საარსებო მინიმუმი კი - 299,1 ლარია.

AMBEBI.GE დაინტერესდა, თუ როგორია თვეში ერთი ადამიანის ხარჯი და შემოსავალი საშუალოდ, მინიმუმ რა ოდენობის თანხაა საჭირო ოთხსულიანი ოჯახის სარჩენად და არის თუ არა ამისთვის 299.1 ლარი საკმარისი.

ოფიციალური მონაცემებით, საქართველოში საშუალო თვიური ხარჯები ერთ სულ მოსახლეზე ყოველწლიურად იმატებს. კერძოდ, ერთი ადამიანის საშუალო თვიური სამომხმარებლო ფულადი ხარჯი 2001 წელს - 52.6 ლარი იყო, 2005 წელს - 70.6 ლარი, 2010 წელს კი საშუალო თვიური ხარჯი - 121.6 ლარამდე გაიზარდა. 2015 წელს - 179,8 ლარს მიაღწია, ხოლო ბოლო მონაცემებით, 2016 წელს ერთ სულ მოსახლეზე საშუალო თვიურმა სამომხმარებლო ფულადმა ხარჯმა - 185,7 ლარი შეადგინა.

საქსტატის მონაცემებით, სამომხმარებლო ფულად ხარჯებში შედის - სურსათი, სასმელი, თამბაქო, ტანსაცმელი, განათლება, ფეხსაცმელი, ჯანმრთელობის დაცვა, ტრანსპორტი, გათბობა, ელექტროენერგია, საოჯახო მოხმარების საქონელი და სხვა.

რაც შეეხება იმას, თუ რამდენს ხარჯავს ადამიანი საშუალოდ თითოეულ მათგანზე, საქსტატის მონაცემებით, სურსათზე, სასმელსა და თამბაქოზე 185.7 ლარიდან გათვალისწინებულია 66.6 ლარი, ტანსაცმელსა და ფეხაცმელზე - 7.6 ლარი იხარჯება, საოჯახო მოხმარების საქონელზე - 7.9 ლარი, ჯანმრთელობის დაცვაზე - 26.8 ლარია გათვალისწინებული, ელექტროენერგიასა და გათბობაზე კი - 23.1 ლარი, ტრანსპორტზე - 19.4, განათლებაზე - 6.4 ლარი, სხვა სამომხმარებლო ხარჯებზე კი - 28 ლარია გათვლილი.

აღნიშნულ მონაცემებზე დაყრდნობით თუ გამოვიანგარიშებთ, გამოდის, რომ ოთხსულიანი ოჯახის შენახვა საქართველოში ყოველთვიურად საშუალოდ 742.8 ლარი დაჯდება. შეგახსენებთ, რომ აქ შედის მხოლოდ სამომხმარებლო ფულადი ხარჯები, რომელშიც იგულისხმება საკვები, სასმელი, ტრანსპორტი, ჯანდაცვა და ა.შ.

AMBEBI.GE ასევე დაინტერესდა, თუ რამდენია საშუალო თვიური შემოსავალი ერთ სულ მოსახლეზე ქვეყანაში და რამდენი ადამიანი უნდა მუშაობდეს ოჯახში, რომ 4-სულიანი ოჯახის შენახვა შეძლოს.

ხარჯების გაზრდასთან ერთად ქვეყანაში საშუალო შემოსავალიც გაიზარდა. კერძოდ, საქსტატის მონაცემებზე დაყრდნობით, თუ 2014 წელს ერთი ადამიანის ფულადი შემოსავალი თვეში საშუალოდ 214,2 ლარი იყო, 2015 წელს შემოსავალი 227,1 ლარამდე; 2016 წელს კი - 237,4 ლარამდე გაიზარდა. ფულად შემოსავალში შედის - დაქირავებული შრომა, თვითდასაქმება, სოფლის მეურნეობის პროდუქციის გაყიდვიდან მიღებული თანხა, პენსია, გზავნილი და ა.შ.

ამათგან, სტატისტიკის სამსახურის მონაცემებით, დაქირავებული შრომიდან მიღებული საშუალო შემოსავალი თვეში ერთ სულზე - 110.5 ლარია; თვითდასაქმებიდან - 22.7; ქონებიდან (გაქირავებიდან, პროცენტი ანაგრებიდან) - 2.8 ლარი მიიღება; პენსიებიდან, სტიპენდიებიდან, დახმარებიდან მიღებული შემოსავალი თვეში საშუალოდ - 44.8 ლარს შეადგენს; გზავნილებიდან 1 ადამიანი თვეში საშუალოდ - 8.3 ლარს იღებს; სოფლის მეურნეობის პროდუქციის გაყიდვიდან - 21.2 ლარს; ხოლო საჩუქრად მიღებული ფული - 27 ლარია.

შესაბამისად, თუ ოთხსულიან ოჯახში საშუალო შემოსავალი (პენსია, გზავნილი, თვითდასაქმება და ა.შ.) მხოლოდ ერთ ადამიანს აქვს, ოჯახის შემოსავალი საშუალოდ 237.4 ლარს შეადგენს, მაშინ როდესაც როგორც ზემოთ აღვნიშნეთ, ოთხსულიან ოჯახს მხოლოდ სამომხმარებლო ხარჯების დასაფარად საშუალოდ 742.8 ლარი სჭირდება. შესაბამისად, გამოდის, რომ ოჯახში სამი საშუალო შემოსავლის მქონე ადამიანის მუშაობის შემთხვევაშიც კი, ფულადი შემოსავალი თვიურ სამომხმარებლო ფულად ხარჯზე ნაკლები იქნება.

თაია არტოდელი

AMBEBI.GE