გლდანში ორი ახალი ლურჯი ავტობუსი ერთმანეთს შეეჯახა

გლდანის მესამე მიკრორაიონში ორი ახალი ლურჯი ავტობუსი ერთმანეთს შეეჯახა. როგორც "ინტერპრესნიუსის" კორესპონდენტი შემთხვევის ადგილიდან იტყობინება, ადგილზე სასწრაფო დახმარების ბრიგადები და საპატრულო პოლიციის ეკიპაჟები არიან მობილიზებული. შემთხვევის შედეგად მგზავრები არ დაშავებულან.

თვითმხილველების ინფორმაციით კი, ერთ-ერთი მძღოლი ავტობუსის მართვის დროს შეუძლოდ გახდა, საჭე ვეღარ დაიმორჩილა და ავტობუსი დაუგორდა, რის შემდეგაც ის მეორე ავტობუსს შეეჯახა. შეჯახების შედეგად ორივე ავტობუსს მინები ჩაემსხვრა.

მგზავრები არ დაშავებულან. რაც შეეხება მძღოლს, მას გადაუდებელი სასწრაფო-სამედიცინო დახმარება სასწრაფოს ბრიგადებმა აღმოუჩინეს და საავადმყოფოში გადაიყვანეს.

ინტერპრესნიუსი