17 წლის გოგონა, რომელიც ცხვირის ოპერაციის შემდეგ კომაშია, სამკურნალოდ საფრანგეთში წაყვანას საჭიროებს

17 წლის ხატია თვაური, რომელიც ცხვირის პლასტიკური ოპერაციის შემდეგ კომაშია, სამკურნალოდ საფრანგეთში წაყვანას საჭიროებს.

გოგონას კომიდან გამოყვანა რამდენიმე დღის წინ დაიწყეს, თუმცა ამ დრომდე მან მხოლოდ თვალის გახელა შეძლო. ხატიას დედის ინფორმაციით, გოგონას ხელის მტევნებზე რეფლექსური რეაქციებიც დაუბრუნდა, თუმცა საუბარზე არ რეაგირებს.

როგორც "ინტერპრესნიუსს" თეო სიდამონიძემ განუცხადა, ხატიას გამოსაჯანმრთელებლად მისი საზღვარგარეთ წაყვანა აუცილებელია, რადგან საქართველოში არ ტარდება ის ოპერაციები, რომლებსაც საჭიროებს.

"ხატიას გადასაფრენად სპეცთვითმფრინავია საჭირო, რომელიც საქართველოში არ არსებობს და თურქეთიდან უნდა გამოვითხოვოთ. ეს 29 ათასი ევრო ჯდება. თავად საფრანგეთიდან რომ ჩამოვიდეს, ბევრად ძვირია - 250 ათასი ევრო. ამას მკურნალობის ხარჯებიც ემატება," - განაცხადა თეო სიდამონიძემ.

თავად ხეჩინაშვილის სახელობის საუნივერსიტეტო კლინიკამ, სადაც გოგონას ცვირის ოპერაცია გაუკეთდა და სადაც ამჟამად კომატოზურ მდგომარეობაში წევს, მის დასაფინანსებლად თანხის გამოყოფაზე უარი განაცხადა. ოჯახი დახმარებას ჯანდაცვის სამინისტროდან ელოდება.

"სამინისტროს საავადმყოფოდან კალკულაცია და ექსპერტების ცნობები სჭირდება და იმის მიხედვით თანხის ნაწილით დაგვაფინანსებენ. "ფეისბუქზეც" დავდე თხოვნა, ახლობლებიც მეხმარებიან, ვისაც რისი საშუალება აქვს, იმით. მე თვითონაც სახლში რაც მაქვს, ვცდილობ ყველაფერი მოვაგროვო," - აღნიშნავს თეო სიდამონიძე.

ხატია თვაურს ხეჩინაშვილის სახელობის საუნივერსიტეტო კლინიკაში ცხვირის პლასტიკური ოპერაცია 7 სექტემბერს პლასტიკურმა ქირურგმა ზაქარია ოდიშვილმა გაუკეთა. ოპერაციის შემდეგ გოგონას გული გაუჩერდა და მას შემდეგ კომაშია.