კობა დავითაშვილი 2007 წლის 7 ნოემბრის აქციის საქმეზე სასამართლოში მოწმის სახით წარსდგა

ყოფილი დეპუტატი კობა დავითაშვილი თბილისის საქალაქო სასამართლოში მოწმის სახით წარდგება და 2007 წლის 7 ნოემბრის საპროტესტო აქციაზე მასზე განხორციელებულ ფიზიკურ ზეწოლაზე ისაუბრებს, - ამის შესახებ "ინტერპრესნიუსს" საქმის პროკურორმა ემზარ გაგნიძემ სხდომის დაწყებამდე განუცხადა.

მისი თქმით, კობა დავითაშვილი ისაუბრებს იმაზე, თუ როგორ გაუწია ორგანიზება მის უკანონო დაკავებას ყოფილმა მთავარმა პროკურორმა, ზურაბ ადეიშვილმა.

"დღევანდელ პროცესზე მოწმის სახით დაიკითხება დაზარალებული კობა დავითაშვილი. ის ისაუბრებს მის მიმართ უკანონოდ განხორციელებულ მოქმედებებზე, კერძოდ, თუ როგორ მოხდა მის მიმართ თავისუფლების უკანონო აღკვეთის ორგანიზება ზურაბ ადეიშვილისა და სხვა პირების მხრიდან. შესაბამისად, კობა დავითაშვილი დეტალურად ისაუბრებს, როგორ განახორციელეს მასზე ფიზიკური ზეწოლა, რის შედეგადაც მან ჯანმრთელობის დაზიანებები მიიღო. შემდეგ იგი იძულებით გადაიყვანეს გორის სამხედრო ჰოსპიტალში, სადაც მკურნალობა ჩაუტარდა", - განაცხადა ემზარ გაგნიძემ.

შეგახსენებთ,რომ ყოფილი დეპუტატი კობა დავითაშვილი 2007 წლის ნოემბრის აქციაზე მძიმედ დაშავდა.მის ცემისა და თავისუფლების უკანონოდ აღკვეთის ფაქტზე ბრალდებულია ყოფილი მთავარი პროკურორი ზურაბ ადეიშვილი.

"ინტერპრესნიუსი"