"ერთ-ერთ თამაშზე გამხდარა ცუდად, უთქვამს გული მაწუხებსო..." - რას ყვება "ზუგდიდის" გარდაცვლილ მეკარეზე მეგობარი
ზუგდიდის საფეხბურთო კლუბ "ზუგდიდის" მეკარე შოთა მამინაშვილი გარდაიცვალა. 31 წლის მეკარე მატჩისწინა მოთელვაზე შეუძლოდ გახდა და საავადმყოფოში მიყვანისთანავე გარდაიცვალა.
მატჩი 1-ელ ოქტომბერს, 16:00 საათზე "ვიტ ჯორჯიასა" და "ზუგდიდს" შორის უნდა გამართულიყო, თუმცა აღნიშნული ტრაგიკული შემთხვევის გამო არ შედგა.
AMBEBI.GE შოთა მამინაშვილის მეგობარს, ფეხბურთელ ლევან კუტალიას ესაუბრა:
- მე და შოთას წლების მეგობრობა გვაკავშირებს. მას ჩემი ძმისგან ვიცნობ, შემდეგ ერთად ვთამაშობდით ქობულეთის "შუქურაში" და დღედაღამე ერთად ვიყავით. არც ვიცი, როგორ იქნება ცხოვრება შოთას გარეშე, ძალიან მაგარი ძმაკაცი, ადამიანი და მეკარე იყო, რასაც ყველა ადამიანი აღიარებს, ვისაც მასთან ჰქონდა შეხება.
- აწუხებდა გულის პრობლემები?
- არასდროს დაუჩივლია, რომ რაღაც აწუხებდა. ხალისიანი და სიცოცხლით სავსე ადამიანი იყო. ერთ-ერთ თამაშზე გამხდარა ცოტა ხნის წინ ცუდად, უთქვამს გული მაწუხებსო და პირველი ტაიმიდან გასულა. სანამ ეს ტრაგედია მოხდებოდა, ცოტა ხნით ადრე ველაპარაკე და კარგად იყო, არაფერი უთქვამს.
- ვარჯიშზე გახდა ცუდად?
- თამაშამდე 15 წუთით ადრე, გუნდი ხურდება შეხვედრისთვის. სწორედ მაგ დროს გამხდარა ცუდად. როგორც მითხრეს, პირდაპირ გონება დაკარგა. 10 წუთი სტადიონზე ყავდათ და გუნდის ექიმები ცდილობდნენ, გონზე მოყვანას...
- რა გეგმები ჰქონდა?
- სადაც თამაშობდა ცდილობდა ის გუნდი ესახელებინა. მამამისიც ფეხბურთელია, ბათუმში არის შოთა დაბადებული და გაზრდილი. ჰყავს მეუღლე და ვაჟი, რომელიც ცოტა ხნის წინ შეეძინა. გიჟდებოდა, შვილი ისე უყვარდა. როცა ზუგდიდში გადავიდა, ცოტა შორს უწევდა მეგობრებისგან და ოჯახისგან ცხოვრება, მაგრამ ყოველთვის პოულობდა დროს, არამხოლოდ ცოლ-შვილისთვის, ჩვენთვის, მეგობრებისთვისაც...
თამარ ბოჭორიშვილი
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია
