სახალისო ინციდენტი ვარსკვლავურ მატჩზე - 11 წლის ბიჭი მალდინის სანახავად სტადიონზე შეიჭრა

"დინამო არენაზე" მსოფლიო და ქართული ფეხბურთის ვარსკვლავების მონაწილეობით გამართული საფეხბურთო მატჩის დროს 11 წლის გულშემატკივარი სტადიონზე შეიჭრა.

ბავშვმა მოედნის მცველებს თავი აარიდა და ცნობილი ფეხბურთელებისკენ გაიჭრა. როგორც თორნიკე კაპანაძემ "პალიტრანიუსს" განუცხადა, სურვილი ჰქონდა, რომ მის საყვარელ ფეხბურთელ პაოლო მალდინისთან მისულიყო. თუმცა მას სველ ბალახზე ფეხი დაუცდა და წაიქცა, რის შემდეგაც მცველებმა ის მოედნიდან გაიყვანეს და მშობლებთან - ტრიბუნაზე დააბრუნეს. 11 წლის თორნიკე კაპანაძე მომავალი ფეხბურთელია, ის კლუბ ავაზას აღსაზრდელია.

"ძალიან მიხაროდა. დაცვა არ მიყურებდა მე და შევირბინე. ხაზს რომ გადავცდი, ვფიქრობდი რომელ ფეხბურთელთან მივსულიყავი, მაგრამ უკან რომ მოვიხედე, იმდენი ადამიანი მომდევდა, შევშინდი. მალდინის პირადად ნახვა მინდოდა, მაგრამ სამწუხაროდ, ვერ მივასწარი. ფეხი სველ ბალახზე ამისრიალდა, დავეცი და ასმა კაცმა დამიჭირა. ჩემი სურვილია, რომ ფეხბურთის თამაში ბოლომდე გავაგრძელო" - განაცხადა თორნიკე კაპანაძემ.

ნახეთ ვიდეო