"ვარდება მე-2 სართულიდან ბეტონზე, უტყდება თავის ქალა და არავინაა მომკითხავი!" - რას წერს ბაღის ფანჯრიდან გადმოვარდნილი ბავშვის დეიდა

206-ე საჯარო ბაღის მეორე სართულიდან გადმოვარდნილი სამი წლის გოგონას ჯანმრთელობის მდგომარეობა მცირედით გაუმჯობესდა. ამის შესახებ "ინტერპრესნიუსს" ინგოროყვას კლინიკის ექიმმა თინათინ იმერლიშვილმა განუცხადა.

მისივე თქმით, ბავშვის მდგომარეობა სტაბილურია. იგი მკურნალობას რეანიმაციულ განყოფილებაში განაგრძობს. ბავშვს სუნთქვის უკმარისობა აღენიშნება, აქედან გამომდინარე, ჟანგბადდამოკიდებულია და ხელოვნური სუნთქვის აპარატზე იმყოფება. ექიმის თქმით, 3 წლის პაციენტს მარცხენა ფილტვის დაჟეჟილობა და ქალა-ტვინის ტრავმა აქვს მიღებული.

ბავშვის დეიდა ირმა გ. "ფეისბუქის" პირად გვერდზე ვრცელ პოსტს აქვეყნებს და გულგრილობაში ადანაშაულებს ბაღის დირექტორს:

"არავის განკითხვას არ ვაპირებდი, მაგრამ სწორედ განუკითხაობა გვკლავს!! 3 წლის ბავშვი, სრულიად ჯანმრთელი, მშვიდი, აზრიანი, საბავშვო ბაღში მეხუთე დღეს მიყვანილი დილის 10 საათზე გადის საძინებელში, ფანჯარასთან მიდგმულ საწოლზე ძვრება, ადის საწოლის თავზე და იქიდან ბობღდება რაფაზე ვარდება მეორე სართულიდან (უგისოსო) ბეტონზე და უტყდება თავის ქალა! და არც არავინაა მომკითხავი!!

მოპირდაპირე კორპუსიდან ხედავს ახალგაზრდა, მირბის ბაღში, ეჯაჯგურება ჭიშკარს (ზარი რა გახდა ხალხო!!), ყვირის ბავშვი, ბავშვიო!!!!! ძვრება ბადეზე, ხტება და მოჰყავს გონზე ისე, რომ ბაღის ხალხი გონზე არ არის და მერე გამოდის ეს ნაძირალა ბაღის დირექტორი მ ა რ ი ნ ა გ ო გ ო ლ ა ძ ე აცხადებს: ბავშვს სამჯერ ჰქონდა მცდელობა და დააგვირგვინაო!!! ყველა მის მიერ თქმული სიტყვა არის ტყუილი! თვალით არ უნახავს ბავშვი!! სულ ოთხჯერ გვყავდა და შუადღისას ძიძას მიჰყავდა!

ინკლუზიური გონების არაქალს, როგორ უშვებენ განათლების სფეროში?????

ხალხო, როგორ მიდიან ასეთები თანამდებობებზე???

ჩვენი ბრალია!!!

ჩვენი უუნარობის!!!

ჩვენი უსუსურობის!!!

მხოლოდ ჯვრის თაყვანისცემა ვერ გვიშველის!

ყველამ უნდა ვზიდოთ ჩვენი ჯვარი!!!

ჩვენი ჯვარი კი ისიცაა, რომ არ მივუშვათ არადამიანები თანამდებობებზე, რადგან დღეს ჩემი, ხვალ სხვისი შვილი მოხვდება არაკაცების ხელში!!!

ხედავ, ბაღში დირექტორი არის ფსიქოპატი?! გამოიყვანე ბავშვი, კი ბატონო, მაგრამ ბოლომდე მიჰყევი, არ დატოვო "ის" ბავშვებთან!

ხედავ, სკოლაში დირექტორია უზნეო, გამოიყვანე შვილი, მაგრამ ეს ფაქტი აღნიშნე!!

მე ავიტან ცუდ გამყიდველს, რომ მიღრენს, ცუდ მეეზოვეს, ნახევრად მოუგველს რომ ტოვებს, ცუდ მეზობელს ძაღლის ხმა რომ აღიზიანებს, მაგრამ ბავშვებს, ანგელოზებს არ უნდა გავაკაროთ ეს.. ეს... არ ვიცი რა ვუწოდო ამ ნაძირლებს!" - წერს მცირეწლოვანის დეიდა.

ზემო ფონიჭალის 206-ე საჯარო ბაღში მომხდარი ინციდენტის შემდეგ ბაღის დირექტორი მარინა გოგოლაძე, ასევე აღმზრდელი და აღმზრდელის თანაშემწე თანამდებობიდან გათავისუფლდნენ. გოგოლაძემ ჟურნალისტთან ფაქტის კომენტირებისას ასეთი განცხადება გააკეთა: "ბავშვი არის ინკლუზიური და პირველი სართულიდან გადმოხტა. ყველა იქ ვიყავით, მაგრამ ინკლუზიური ბავშვები მოგეხსენებათ... მცდელობა ჰქონდა დღეს კი არა, ყოველდღე და დღეს დააგვირგვინა".