30
მარტიდღის ზოგადი ასტროლოგიური პროგნოზი
ლიბიის დედაქალაქ ტრიპოლის ერთ-ერთი ციხის იზოლატორში, საქართველოს სამი მოქალაქე იმყოფება, რომლებიც ლიბიის სანაპირო დაცვის ძალებმა ტანზანიის დროშის ქვეშ მცურავი ტანკერი REX-დან, მიმდინარე წლის 30 აგვისტოს, ხმელთაშუა ზღვაში, ნავთობპროდუქტების კონტრაბანდით გადაზიდვის ბრალდებით დააკავეს.
როგორც საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტოს ხელმძღვანელმა, მამუკა ახალაძემ ჟურნალისტებს განუცხადა, გემი 30 აგვისტოს დააკავეს, თუმცა, სააგენტომ ინფორმაცია მხოლოდ 13 სექტემბერს, საღამოს მიიღო ერთ-ერთი მეზღვაურის ოჯახისგან. მამუკა ახალაძის ინფრომაციით, მათ წინასწარი პატიმრობა უკვე შეუფარდეს. ეკიპაჟის წევრების დაკავება, სავარაუდოდ, არალეგალური ტვირთით ნაოსნობას უკავშირდება. თუმცა, დაზუსტებული მონაცემები ჯერჯერობით არ არსებობს. პროცესში ჩართულია საგარეო საქმეთა სამინისტროც.
"ამერიკის ხმის" ინფორმაციით, სანავთობო ტანკერ REX-ის კაპიტანი, 55 წლის ბათუმელი გენადი კომახიძეა, - მასთან ერთად დაკავებული ორი ქართველი კი, რომან კაკალაძე და ნუკრი ხოხბა. დაკავებულ 11 მეზღვაურს შორის, თურქეთის ხუთი და ინდოეთის ორი მოქალაქეც არის... ტანკერის ეკიპაჟის ყველა წევრს, მათ შორის საქართველოს სამ მოქალაქეს, ბრალად "ლიბიის სახელმწიფო საზღვრის უკანონოდ გადაკვეთა და კონტრაბანდული ტვირთის გადატანა ედებათ".
ტანკერმა ლიბიისკენ გეზი 2017 წლის 11 ივლისს, სტამბოლის ტუზლას ნავსადგურიდან გასვლის შემდეგ აიღო. ლიბიის სანაპირო დაცვა ირწმუნება, რომ აგვისტოს ბოლოდან გემს უთვალთვალებდნენ. მათ თქმით, ბერძნული ტანკერი REX-ი ქვეყნის ჩრდილო-დასავლეთით მდებარე ქალაქ ზუვარასთან, აბუ კამაშის პორტში ნებართვის გარეშე, ღამით შევიდა, სადაც კონტრაბანდული 1 160 000 დიზელით დაიტვირთა, რის გამოც, ის დააპატიმრეს.
დაკავებული ქართველი მეზღვაურების ოჯახები, მათ კონტრაბანდაში გარევას კატეგორიულად უარყოფენ. მათი თქმით, ტანკერი მაშინ დააკავეს, როცა ლიბიის ტერიტორიული წყლები უკვე დატოვებული ჰქონდა. გამოცემასთან საუბარში, რომან კაკალაძის მამა, მერაბ კაკალაძე შვილის მიერ მოწოდებულ ინფორმაციას ეყრდნობა და ამბობს, რომ მათ ნეიტრალურ წყლებში ყოფნისას ფორმიანი, შეიარაღებული პირები დაადგნენ თან და უკან დააბრუნეს. რამდენიმე დღე გემზე ჰყავდათ დაკავებული, შემდეგ კი, იზოლატორში გადაიყვანეს...
მას შემდეგ, რაც ლიბიის "არაბული ჯამაჰირიის დიდი სოციალისტური სახალხო რესპუბლიკის" დაარსებიდან 42 წლის თავზე, მოსახლეობა ქვეყნის "ბებერ პატრიარქს" აუჯანყდა და მისი რეჟიმი სისხლისმღვრელი სამოქალაქო ომით დასრულდა, იქ ერთიანი სახელმწიფო აღარ არსებობს და ჯერ კიდევ კადაფის მმართველობის დროს დაწყებული ნავთობის კონტრაბანდა უზარმაზარ შავ ბიზნესად იქცა...
საქმე ის არის, რომ ლიბია ახლა რამდენიმე ზონად არის დაყოფილი, - იქ მნიშვნელოვან ტერიტორიებს ტერორისტული ორგანიზაცია "ალ ქაიდა", მათი განაყოფი "ანსარ ალ შარია" და ISIS აკონტროლებენ. ზუვარაში, საიდანაც ლიბიის მხარის მტკიცებით, ტანკერმა REX-მა კონტრაბანდული დიზელი წამოიღო, ISIS-ის გავლენა საკმაოდ დიდია. თუმცა, კონტრაბანდასთან კავშირს, ქართველი მეზღვაურები კატეგორიულად უარყოფენ.
ბოლო ინფორმაციით, საქართველოს საელჩომ ეგვიპტეში, რომელიც ლიბიასაც ფარავს, ქაიროში ადვოკატი დაიქირავა, რომელიც ტრიპოლიში დაკავებული ქართველი მეზღვაურების საქმეში უკვე ჩაერთო. "ამერიკის ხმის" ინფორმაციით, ამჟამად ტრიპოლის სამხედრო პორტში, ათამდე ტანკერი და გემია დაკავებული, ტრიპოლის ციხეში კი რამდენიმე ათეული უცხოელი მეზღვაური სასჯელს ელის.
2016 წლის ივნისიდან, უკვე წელიწადი და ოთხი თვეა, ლიბიაში ბერძნული ტანკერის "თემეტერონის" კაპიტანი, რუსეთის მოქალაქე ტეკუჩევია დაპატიმრებული. კიდევ ორ რუს მეზღვაურთან ერთად, მასაც "კონტრაბანდული ნავთობის" გადატანა ბრალდება.
ეს პირველი შემთხვევა არ არის, როდესაც ქართველ მეზღვაურებს სხვა ქვეყნის წყლებში აკავებენ, - 2009 წელს, ქართველი მეზღვაურები პანამის დროშის ქვეშ მცურავ სატვირთო გემით, ფილიპინების ხელისუფლებამ დააკავა. გავრცელებული ინფორმაციით, გემს ფილიპინებზე ისრაელის წარმოების საბრძოლო იარაღი კონტრაბანდული გზით გადაჰქონდა... ქართველი მეზღვაურების თითის ანაბეჭდებითა და მათი ჩვენების მიხედვით, ირკვევა, რომ მათ არაფერი იცოდნენ გემზე არსებული ტვირთის შესახებ.
2015 წელს, საბერძნეთში, ორი ქართველი მეზღვაური დიდი ოდენობით კონტრაბანდული ტვირთის, კონკრეტულად, 11 ათასამდე ყუთი სიგარეტის ლიბიაში გადატანის ბრალდებით დააკავეს...
ერთ-ერთი ყველაზე გახმაურებული ფაქტი იყო, სომალელი მეკობრეების მიერ დაკავებული ქართველი მეზღვაურების ამბავი, - მალტის დროშის ქვეშ მცურავ ტანკერზე 15 ქართველი და 3 თურქი მეზღვაური იმყოფებოდნენ, სომალელმა მეკობრეებმა ისინი 2010 წლის 8 სექტემბერს, ადენის სრუტეში დაატყვევეს. მეკობრეები გემის მფლობელი ბერძნული კომპანიისგან გამოსასყიდის სახით რამდენიმე მილიონ დოლარს ითხოვდნენ. თანხის გადახდაზე გემთმფლობელმა კომპანიამ უარი განაცხადა და მოლაპარაკებები ჩიხში იყო შესული. მოგვიანებით, სომალიში საქართველოს დელეგაცია ჩავიდა. თითქმის წელიწადნახევრიანი ტყვეობის შემდეგ, ქართველი მეზღვაურები გაათავისუფლეს...
ლალი პაპასკირი
ფოტო: VOA
