Greekpoint - "პატარა საბერძნეთი" საქართველოში, რომელიც ბერძნული კერძებით გაგიმასპინძლდებათ

ბერძნული კერძები ბერძნული ინგრედიენტებით, საბერძნეთში დახელოვნებული მზარეული და საბერძნეთზე თავდავიწყებით შეყვარებული დამფუძნებელი - ეს სწრაფი კვების ობიექტი Greek point-ია, რომელიც ბაზარზე სულ რაღაც 6 თვეა გამოჩნდა.

Greek Point- ის შექმნის იდეა 30 წლის სტარტაპერს ალექსანდრე ჯორჯიკიას გაუჩნდა, რომელიც ოჯახთან ერთად წლების განმავლობაში საბერძნეთში ცხოვრობდა. საქართველოში უკვე 17 წელია დაბრუნდა და როგორც თვითონ ამბობს, საკმაოდ წარმატებული კარიერაც ააწყო და წლების განმავლობაში სახელმწიფო სამსახურში მუშაობდა. თუმცა ვერაფერი მოუხერხა სურვილს, რომ კავშირი არ დაეკარგა საბერძნეთთან და მონატრებას, რომელიც ცხოვრების საუკეთესო პერიოდს ახსენებდა. ამიტომ 2 მეგობართან ერთად საქართველოში ბერძნული კუთხის გახსნა გადაწყვიტა და 6 თვის წინ გალაკტიონის ხიდის ქვეშ Greek point-იც გამოჩნდა. რამდენიმე დღის წინ სტარტაპერი სამსახურიდან წამოვიდა და ამიერიდან მთელ დროს საკუთარი ბიზნესის განვითარებას უთმობს.

"ჩემთვის ეს კაფე უფრო მეტია, ვიდრე უბრალოდ ბიზნესის კეთება. მე მთავარ აქცენტს შემოსავლის მიღებაზე არ ვაკეთებ. ამ საქმიანობაში იმ ემოციასა და მუხტს ვდებ, რომელიც საბერძნეთში მივიღე. ბერძნების ტრადიციული კერძი "გირო", რომელსაც ჩვენ ვთავაზობთ მომხმარებელს, იმდენად მიყვარდა, რომ კვირის განმავლობაში მუდმივად ფულს ვაგროვებდი და კვირის ბოლოს აუცილებლად მივირთმევდი მას. ეს ჩემი ბავშვობის საუკეთესო წლებთან და ყველაზე გემრიელ მოგონებებთან ასოცირდება. მას შემდეგ ბევრი წელი გავიდა. თუმცა ჩემი ემოციები არ განელებულა.

ახლა კი შანსი მომეცა და თბილისში გავხსენი კაფე, სადაც სწორედ იმ კერძებს, იმ არომატებს ქმნიან, რასაც ჩემი ბავშვობა უკავშირდება. საბედნიეროდ, ბერძნული გემოსა და არომატის "დაჭერა" შევძელით და ამაში დიდი წვლილი მიუძღვის ჩვენს ქართველ შეფ-მზარეულს, რომელიც დიდი ხნის განმავლობაში სალონიკში მუშაობდა," - განმარტავს ალექსანდრე ჯორჯიკია.

"დიდი პასუხისმგებლობა მაქვს ბერძენი ხალხისა და მათ მიმართ, ვინც საბერძნეთიდან დაბრუნდა და ბერძნული საკვებისა და ყავის მიმართ ნოსტალგია აქვს, ვისაც უყვარს და ენატრება ეს ქვეყანა. ძალიან ცუდი იქნება, რომ მათ იმედი გავუცუროთ და ის არ დავახვედროთ, რასაც ელოდებიან. სწორედ ამიტომ, მთელი გუნდი ყველაფერს ვაკეთებთ იმისთვის, რომ ის ემოციური მუხტი მივცეთ ჩვენს მომხმარებლებს, რასაც ჩვენგან ელიან," - ამბობს Greek Point-ის შეფ-მზარეული, ხრისტო აბაიაძე.

ბერძნული სამზარეული სასარგებლო და ჯანსაღი საკვებით გამოირჩევა. ასეა Greek Point-შიც. აქ კერძების მოსამზადებლად მაიონეზს არ იყენებენ, მის სანაცვლოდ საფირმო სოუსს - "ძაძიკს" შემოგთავაზებენ. მთავარ აქცენტს სიჯანსაღესა და სიმწვანეზე აკეთებენ და ყველა კერძი ბერძნული, კერძოდ, სალონიკური წესებისა და ტრადიციების დაცვით კეთდება. სპეციალურად Greek Point- ისთვის ინგრედიენტები საბერძნეთიდან ჩამოდის, რაც კერძებს განსაკუთრებულად "ბერძნულს" ხდის.

ამჟამად Greek point საქართველოში ერთადერთი ბერძნული კუთხეა. თუმცა, დამფუძნებლები ბერძნული კუთხეების გახსნა ბორჯომში, ბაკურიანსა და ბათუმში გეგმავენ. ასევე, ქსელი ფარათოვდება თბილისის მასშტაბითაც. განსაკუთრებული იქნება ბათუმის ფილიალი, რომელსაც რესტორნის სახე ექნება და ხორცთან ერთად, თევზსა და ტკბილეულსაც შესთავაზებს მომხმარებელს.

Greek point-ს თბილისის მასშტაბით კერძების ადგილზე მიტანის სერვისიც აქვს. ამაში სტარტაპს თიბისი ბანკის პროგრამა "სტარტაპერი" დაეხმარა.

"თავდაპირველად, სამოყვარულო დონეზე დავიწყეთ საქმიანობა. თუმცა მალევე მიხვდვით, რომ ჩვენს შეთავაზებას საკმაოდ დიდი გამოხმაურება მოჰყვა და შემდგომი განვითარება იყო საჭირო. სწორედ ამ ეტაპზე ძალიან დაგვეხმარა თიბისი ბანკის პროგრამა "სტარტაპერში" მონაწილეობა. სტარტაპ-სესხით შევძელით ჩვენი მომხმარებლებისთვის ადგილზე მიტანის სერვისის შეთავაზება. სამომავლოდ, პროგრამის სხვა არაფინანსური სერვისებითაც ვაპირებთ სარგებლობას, კერძოდ ტრენინგებსა და მასტერკლასებზე დასწრებას ვგეგმავთ, რაც ვფიქრობ, რომ კიდევ უფრო დაგვეხმარება ჩვენი ბიზნესის განვითარებაში.

#სტარტაპერი #გვეამაყები

ფოტოები: Advan/ედვენი

ნანა მღებრიშვილი

AMBEBI.GE