28
მაისიდღის ზოგადი ასტროლოგიური პროგნოზი
სხვადასხვა პროფესიის ადამიანების მიერ შექმნილი კომპანია Geotoys, რომელიც ეკოლოგიურად სუფთა სათამაშოებს აწარმოებს, ქართულ ბაზარზე სათამაშოების სტანდარტს ქმნის. კომპანია 3 წლის წინ შეიქმნა. წელს კი "ბიზნეს დაჯილდოებაში " წლის ქართული პროდუქტის" ნომინაციაზეა წარდგენილი. დამფუძნებლის დავით კაციტაძის განმარტებით, საქართველოში ხის კუბიკების დამუშავება საწარმოო ხაზით სხვას არავის შეუძლია და შესაბამისად. კომპანია მართლაც ღირებულ ქართულ პროდუქტს ქმნის.
- რატომ გადაწყვიტეთ ხის სათამაშოების მიმართულებით კომპანიის შექმნა?
- სათამაშოების წარმოება 12 წლის წინ დავიწყე, მაგრამ გარკვეული მიზეზების გამო, პროცესი შეჩერდა. თუმცა ეს აზრი ყოველთვის თავში მიტრიალებდა. 3 წლის წინ განვაახლეთ პროექტი და დავიწყეთ ხის სათამაშოების წარმოება. დღემდე თან ვსწავლობთ, თან ვაკეთებთ. წარმოება საკმაოდ რთული პროცესია. სათამაშოს დამზადება არც ისე მარტივია, როგორც ეს გარედან ჩანს. ჩვენ ბევრი მცდელობის შემდეგ შევჩერდით უშუალოდ კუბიკების წარმოებაზე. ალბათ, ეს ყველაზე კარგად გამოგვდის.
- რით არის თქვენი პროდუქცია გამორჩეული?
- გამორჩეულია იმით, რომ თემატურია. ჩვენი ძირითადი ხაზია კუბიკები სხვადასხვა დანიშნულებით: ანბანი, ციფრები, ფორმულები, სამშენებლო და ა.შ. კუბიკების დამუშავება საწარმოო მეთოდით საქართველოში სხვას არავის შეუძლია. თვეში 30 000-დან 50 000-მდე კუბიკს ვაკეთებთ. წარმოების პროცესში ვიყენებთ მშრალი წიფლის მასალასა და ეკო საღებავებს.
- რა ასაკის ბავშვებზეა გათვლილი თქვენი სათამაშოები?
- რამდენიმე ტიპის სათამაშოს ვაწარმოებთ. სათამაშოების უმეტესობა და მათ შორის, კუბიკები, 3 წლის და უფროსი ასაკის ბავშვებზეა გათვლილი. მატარებლითა და მანქანით თამაში კი 2 წლის ასაკის ბავშვებისთვისაც მისაღებია. ასევე, გვაქვს ჯენგა, თამაში "დამიმახსოვრე", კუბიკები ანბანი, კუბიკები ციფრები, კუბიკები ფორმულები, სამშენებლო კუბიკები.
- მშობლებმა რას უნდა მიაქციონ ყურადღება სათამაშოების შერჩევისას?
- სათამაშოს აუცილებლად უნდა ეწეროს შემადგენლობა. ასევე, მითითებული უნდა იყოს მინიმალური ასაკი, რომლისთვისაც სათამაშოა განკუთვნილი. მითითებულ ასაკზე პატარა ბავშვებისთვის სათამაშოს მიცემა არ შეიძლება. ეს შეიძლება საგანგაშო შედეგითაც კი დასრულდეს.
- რამდენად მძაფრია კონკურენცია და როგორ უმკლავდებით მას?
- კონკურენტები ნამდვილად გვყავს. თუმცა ჩვენი პრობლემა კონკურენციაში კი არა, არამედ არასათანადო კონკურენციაშია. ჯანსაღი კონკურენციის შექმნის მიზნით, მწარმოებლებმა და იმპორტიორებმა შევქმენით ასოციაცია "უსაფრთხო სათამაშო". ამ ეტაპზე, საქართველოში მავნე სათამაშოების შემოტანას ერთობლივად ვებრძვით. ზოგადად, ჯანსაღი კონკურენცია ბიზნესისთვის ძალიან კარგია. მასთან ბრძოლა კი არა, მუშაობაა საჭირო.
- კონკურენციის პირობებში Geotoys ლიდერ პოზიციას ინარჩუნებს და "ბიზნეს დაჯილდოებაშიც" მონაწილეობს. როგორია თქვენი მოლოდინი?
- "თიბისი ბანკის" მიერ ორგანიზებულ დაჯიდლოებაში "წლის ქართული პროდუქტის" ნომინაციაში ვმონაწილეობთ. საკმაოდ დიდი და ოპტიმისტური მოლოდინი გვაქვს. რა თქმა უნდა, ყველას სურს, წარმატებულ კომპანად დასახელდეს. ჩვენი მიზანიც ესაა და მხოლოდ მონაწილეობისთვის არ ვართ წარდგენილი.
- როგორია კომპანიის სამომავლო გეგმები?
- დავამატეთ სამკერვალო წარმოება, სადაც დამზადდება რბილი წიგნები და რბილი კუბიკები. მომავალში ვაპირებთ სამაგიდო თამაშების გამოშვებას. გარკვეული თამაშები ჩვენი შექმნილია და შესაბამისად, პატენტიც ავიღეთ შესაბამისად. გეგმები საკმაოდ დიდი გვაქვს.
ნანა მღებრიშვილი
AMBEBI.GE
