გიორგი კვირიკაშვილი - იმ პირობებში, როცა ჩვენ გაგვაჩნია რთული ურთიერთობა რუსეთთან, დახმარების მზადყოფნის წინადადება მისასალმებელია

იმ პირობებში, როცა ჩვენ გაგვაჩნია რთული ურთიერთობა რუსეთთან, დახმარების მზადყოფნის წინადადება მისასალმებელია, - ამის შესახებ პრემიერ-მინისტრმა გიორგი კვირიკაშვილმა სოფელ დაბას მიმდებარე ტერიტორიაზე ჟურნალისტებთან საუბრისას განაცხადა.

პრემიერმა მადლობა გადაუხადა იმ ქვეყნებს, რომლებმაც დახმარების მზადყოფნა გამოთქვეს და რომლებიც ეხმარებიან საქართველოს ხანძრის სალიკვიდაციო სამუშაოებში.

გიორგი კვირიკაშვილმა დამატებით ისაუბრა რუსეთის მიერ შემოთავაზებულ დახმარების წინადადებაზე.

"განსაკუთრებით მინდა მადლობა გადავუხადო იმ ქვეყნებს, რომელთაგანაც ვიღებთ დახმარებას. პირველივე დღიდან გამოთქვა დახმარების სურვილი აზერბაიჯანმა, თურქეთმა, სომხეთმა და ბელორუსმა. მივიღეთ წინადადებები სხვა ქვეყნებისგანაც, გუშინ გამოითქვა დახმარების მზადყოფნა აშშ-სგან, დიდი ბრიტანეთისგან, გერმანიისგან, ისრაელისგან, ასევე, საბერძნეთისგან და უკრაინისგან. მზადყოფნა გამოთქვეს ბულგარეთმა და ირანმაც.

მინდა შევეხო რუსეთის საკითხსაც, ვინაიდან აქტიური განხილვის საგანი იყო. რუსეთმა გამოთქვა დახმარების მზადყოფნა და ვფიქრობ, ეს წინადადება მისასალმებელია, ჩვენ გაგვაჩნია პასუხისმგებლობის მაღალი ხარისხი, ჩვენი მოსახლეობის და ქვეყნის წინაშე, ამის გათვალისწინებით, იმ პირობებში, როცა ჩვენ გაგვაჩნია რთული ურთიერთობა რუსეთთან, ასეთი წინადადება მისასალმებელია", - განაცხადა გიორგი კვირიკაშვილმა.