სვლა დიქტატურისკენ - ერდოღანმა ამჯერად მთავარ ოპოზიციურ პარტიას შეუტია
თურქეთში, შარშან მომხდარი სამხედრო გადატრიალების მცდელობის შემდეგ დაწყებული დაკავებებისა და დევნის პროცესი გრძელდება. ამჯერად, რეჯეფ თაიფ ერდოღანმა თურქეთის მთავარი ოპოზიციური სახალხო რესპუბლიკური პარტია (CHP) და მისი ლიდერი, ქემალ კილიჩდაროღლუ ამოიღო მიზანში და როგორც პარტიის წევრები ამბობენ, მის წინააღმდეგ სამართლებრივი დევნა დაიწყო...
პარტიის წარმომადგენლების თქმით, აღნიშნული პროცესი პოლიტიკურად მოტივირებულია და თურქეთში მიმდინარე რეპრესიების ნაწილია. ის გასული წლის გადატრიალების მცდელობას უკავშირდება, რომლის შედეგადაც ათობით პარლამენტარი დააკავეს.
სტამბოლში, "ამერიკის ხმის" ადგილობრივი კორესპონდენტის, დორიან ჯონსის ინფორმაციით, "ეს CHP-ის წინააღმდეგ მიმართული შეთქმულებაა და ნებისმიერი ნაბიჯი, რომელიც მთავარი ოპოზიციური ძალის წინააღმდეგ იქნება მიმართული, გაამწვავებს ვითარებას".
თურქეთის პრეზიდენტის რეჯეპ ტაიპ ერდოღანის განცხადებით, შესაძლოა კილიჩდაროღლუ დაკავშირებული იყოს მიმდინარე გამოძიებასთან, რომელიც გაზეთში გამოქვეყნებულ სტატიას შეეხებოდა. სტატიაში სირიასთან ერდოღანის მთავრობის კავშირებზე იყო საუბარი.
"ნუ გაგიკვირდებათ, თუ კილიჩდაროღლუ ამასთან იქნება კავშირში", - განაცხადა კვირას ერდოღანმა. გამოცემის ინფორმაციით, კილიჩდაროღლუს მოკავშირე და პარლამენტის წევრი, ენის ბერბეროღლუ ივნისში დააკავეს და მას 25-წლიანი პატიმრობა გაზეთში სტატიის გამოქვეყნების ბრალდების საფუძველზე მიუსაჯეს.
ბერბეროღლუს დაკავებას კილიჩდაროღლუს პროტესტი და 25-დღიანი "სამართლის მარში" მოჰყვა, რომელიც ანკარიდან სტამბოლის მიმართულებით გაიმართა. მარშში მონაწილეობა ათიათასობით ადამიანმა მიიღო და საბოლოოდ, მილიონამდე ადამიანის მხარდაჭერა მოიპოვა.
საქმე ის არის, რომ ერდოღანი აქამდე არ ცნობდა კილიჩდაროღლუს ფიგურას, როგორც მის პოლიტიკურ ოპონენტს. თუმცა ივლისში, გასული წლის გადატრიალების ჩახშობიდან ერთი წლის აღნიშვნის ცერემონიალზე, ერდოღანმა მას გადატრიალების მცდელობაში მონაწილეობა დააბრალა.
"ერდოღანი ისე პასუხობს ამ საფრთხეს, როგორც აღიქვამს - საპრეზიდენტო არჩევნებამდე ორი წელია დარჩენილი და ის ხედავს, რომ სათამაშო მოედანი არც ისე გლუვი და ნათელია, როგორც მას სურს", - განაცხადა პოლიტიკურმა მიმომხილველმა სემი იდიზმა. მისივე თქმით, სავსებით მოსალოდნელია, რომ მომავალი რამდენიმე დღის განმავლობაში, ერდოღანმა მთავარი ოპოზიციური ლიდერის მიმართულებით რიტორიკა გაამწვავოს. თუმცა, წარმოუდგენელია, კილიჩდაროღლუ ციხეში აღმოჩნდეს. ეს ოპოზიციური ბლოკის გაერთიანებას გამოიწვევს, რაც ერდოღანს არ სურს", - ვარაუდობს იდიზი.
ერდოღანმა ოპოზიციის წინააღმდეგ ბრძოლა ჯერ კიდევ შარშან დაიწყო და არაერთ გავლენიან პოლიტიკურ ფიგურას აღუკვეთა თავისუფლება. "ამერიკის ხმის" ინფორმაციით, ტერორიზმის ბრალდებით, სახალხო დემოკრატიული პარტიის (DHP) ლიდერები - ფიგენ იუკსეკდაგი და სელაჰატინ დემირტაში დააკავეს. პატიმრობაში არიან თურქეთის მეორე მთავარი ოპოზიციური პარტიის 9 დეპუტატი, რომლებიც სასჯელს ელოდებიან.
საერთაშორისო ექსპერტების თქმით, ერდოღანის მმართველობა უკვე კარგა ხანია დიქტატურის ნიშნებს ატარებს. თურქული საზოგადოება კი ან ინერციით განაგრძობს ცხოვრებას, ან მისი სისასტიკის წინააღმდეგ უძლურია, თუმცა არცერთ დიქტატორს არ შერჩენია მმრთველობა მუდმივად და გამონაკლისი ვერც თურქი მმართველი იქნება.
პოლიტოლოგ ჩენგიზ აქტარის თქმით, კილიჩდაროღლუ შეიძლება გახდეს დევნის ობიექტი. ასეთი ნაბიჯი პრეზიდენტს მისი ამომრჩევლების თვალში, ძლიერად წარმოაჩენს, რადგან აჩვენებს, რომ მას ოპოზიციური პარტიის პრეზიდენტის დაპატიმრება შეუძლია, თან ეს ხომ ათათურქის პარტიაა. სიმბოლურად, ეს ძალიან ძლიერი მესიჯია და ერდოღანს, შესაძლოა, ამ პარტიის ამჟამინდელი ლიდერის დაკავება ძვირი დაუჯდეს...
საქმე ის არის, რომ თურქული საზოგადოების დიდი ნაწილი დამარცხებულის მიმართ სოლიდარულია. პოლიტიკური მიმომხილველი იდიზი აღნიშნავს, რომ თავად ერდოღანმა საკუთარი კარიერა მის მიმართ უსამართლობაზე ააგო და მისი დაპატიმრება მართლაც უსამართლო იყო.
1999 წელს ერდოღანს თურქი გენერლების მიერ ისლამური ჯგუფების წინააღმდეგ მიმართული კამპანიისას 10-თვიანი პატიმრობა მიუსაჯეს. მას ბრალად ამბოხის მოწოდება დასდეს პოლიტიკურ დემონსტრაციაზე წარმოთქმული ლექსის გამო. ერდოღანი სამი წლის შემდეგ AKP-ს ჩაუდგა სათავეში. თუმცა, თურქი პოლიტოლოგი ჩენგიზ აქტარი აღნიშნავს, რომ ახლანდელი თურქეთი მაშინდელისგან ძალიან განსხვავდება.
"პარტიის ლიდერები და დეპუტატები ციხეში არიან, თუმცა, ხალხს რეაქცია არ აქვს. იგივე იქნება CHP-ის შემთხვევაში, - ხალხი ქუჩაში გამოვა და ამით დამთავრდება. სავრაუდოდ, ყველა ცდილობს რეჟიმს გადაურჩეს", - ამბობს აქტარი, სტამბოლში "ამერიკის ხმის" კორესპონდენტის დორიან ჯონსის მიერ მომზადებულ პუბლიკაციაში.
ლალი პაპასკირი
"ტელეფონი დავამტვრიე, ჩემები რომ დამირეკავდნენ, რუსს არ ეთქვა: აქ ბევრი მკვდარია, თქვენ რომელი გინდათო..." - შინდისის ბრძოლას გადარჩენილის ნაამბობი
83 წლის მამაკაცი, რომელიც კახეთში პოლიციელებს თავს დაესხა, გირაოს სანაცვლოდ გათავისუფლდა
