გუდაუთის სამხედრო ბაზაზე მომხდარი აფეთქების დეტალები: "ვლოცულობდით, რომ გადავრჩენილიყავით..."

აფხაზეთში, გუდაუთის სამხედრო საწყობში მომხდარი აფეთქების შედეგად, 60 ადამიანი დაშავდა. აფხაზეთში ე.წ რუსეთის დიპლომატიური სამსახურის ინფრომაციით, 35 დაშავებული რუსეთის მოქალაქეა, მათ შორის არიან, როგორც ტურისტები, ასევე ადგილობრივი ეთნიკური რუსები...

ოკუპირებულ აფხაზეთში, გუდაუთის რაიონის სოფელ პრიმორსკოესთან, სამხედრო საწყობში აფეთქება დაახლოებით, 17:30 საათზე მოხდა. თვითმხილველების თქმით, შენობას თითქოს ზემოდან რაღაც დაეცა, რის შემდეგაც დაიწყო აფეთქებების ტალღა... ადგილობრივები ყვებოდნენ, რომ ღამის 11 საათამდე აფეთქებების ხმა ისმოდა...

თავდაპირველად გავრცელებული ინფორმაციით, აფეთქებისას დაახლოებით 35 ადამიანი დაშავდა, მათ შორის იყვნენ დასასვენებლად ჩასული რუსეთის მოქალაქეებიც. სოციალურ ქსელში გავრცელდა ტვერიდან ჩასული ქალების ემოციური ვიდეო, სადაც ისინი ყვებოდნენ, რომ სანაპიროზე იყვნენ, რა დროსაც აფეთქების ხმა გაისმა.

"ნაპირზე ვიყავით, ტალახი გვქონდა წასმული, როგორც კი აფეთქების ხმა გაისმა, ვიღაც მამაკაცის განწირული ყვირილიც შემოგვესმა, რომელიც გვიყვიროდა, - წადითო... თავიდან დავიბენით, ვერ გავიგეთ, რა მოხდა და რატომ უნდა წავსულიყავით... შემდეგ აფეთქებების მორიგი ტალღა დაიწყო და გავიქეცით... აფეთქების ხმები არ წყდებოდა. ისე, როგორც აფეთქებათა ფილმებში... გზაში ვლოცულობდით, რომ გადავრჩენილიყავით...", - ჰყვებიან ისინი.

აფხაზური მედიის ცნობით, გუდაუთის რაიონის სოფელ პრიმორსკოეში, სამხედრო საწყობში გაჩენილმა ხანძარმა მიმდებარე ტერიტორიაზე პანიკა გამოიწვია. მათი თქმით, ადგილობრივი მოსახლეობა და დამსვენებლები სოფელს პანიკურად ტოვებდნენ, რამაც გზებზე საცობები გამოიწვია და შესაბამის სამსახურებს ადგილზე მისვლისას პრობლემა შეუქმნა... აფხაზური მედიის ცნობით, აფეთქების ეპიცენტრთან მისვლა რამდენიმე საათის განმავლობაში ვერ მოხერხდა, რადგან რისკებთან იყო დაკავშირებული...

აფხაზეთის დე ფაქტო ჯანდაცვის სამინისტროს ინფორმაციით, რუსეთის 27 დაშავებული მოქალაქე ჰოსპიტალიზებულია. რამდენიმე მათგანის მდგომარეობა კრიტიკულია და ისინი სოხუმში გადაიყვანეს. არსებული ინფორმაციით, სოჭის საავადმყოფო მზად არის დაშავებულთა მისაღებად, თუმცა, აფხაზეთში აცხადებენ, რომ სიტუაციას აკოტროლებენ და ამის აუცილებლობა არ არსებობს.

აფხაზეთში, რუსეთის ე.წ. საელჩოს პრესატაშეს, ტურალა ჯავადოვას თქმით, - შემთხვევის ადგილას მობილიზებული არიან რუსეთის მე-7 სამხედრო ბაზის სამხედროები, რომლებიც ადგილობრივებს ცეცხლის ლიკვიდაციაში ეხმარებიან. სოფელ პრიმორსკის გამგებელი ანზორ საკანია არ ეთანხმება იმ ვერსიას, თითქოს საწყობს ზემოდან დაეცა რაღაც. მისი თქმით, "პირველადი ვერსიით, სამხედრო საწყობში ცეცხლი გაჩნდა, რამაც აფეთქებები გამოიწვია. ცეცხლის გაჩენის მიზეზების შესწავლა მიმდინარეობს,"- აცხადებს საკანია.

ცნობილია, რომ აფეთქების დროს გასროლილი ერთი ჭურვი, ეპიცენტრიდან 300 მეტრში მდებარე კერძო სახლს დაეცა... ბოლო ინფორმაციით, უმძიმესი დაზიანებები მიიღო 5-მა ადამიანმა, მათ შორის, ორი რუსეთის მოქალაქეა, სამი კი დაზიანებული სახლის მცხოვრებლები. ისინი სოხუმის ე.წ. რესპუბლიკურ საავადმყოფოში გადაიყვანეს.

ადგილობრივების თქმით, ვითარებას ამძიმებს ის, რომ აფეთქების ადგილის გარშემო კერძო სახლებია, სადაც მუდმივად ქირავდება ოთახები ტურისტებისთვის. სწორედ იქ მყოფებმა მიიღეს სხვადასხვა სახის დაზიანებები. არსებული ინფორმაციით, შემთხვევის ადგილის მიმართულებით მთელი ღამე მოძრაობდნენ "სასწრაფო დახმარების" მანქანები, რომელთაც დაშავებულები გუდაუთის საავადმყოფოებში გადაჰყავდათ.

აფხაზური მედიის ინფორმაციით, კონკრეტულ სამხედრო საწყობში 500 კილოგრამიანი ბომბები ინახებოდა. ზოგადად, ეს ადგილი, თავის დანიშნულებისა და მუდმივი ტერიტორიული გაფართოების გამო, ყოველთვის იწვევდა ადგილობრივების გაღიზიანებას, რადგან მიაჩნდათ, რომ სამხედრო ბაზები და ტურიზმი "საკურორტო ქვეყანაში" გამიჯნული უნდა იყოს.

შემთხვევის ადგილზე მივიდა აფხაზეთის ე.წ. ხელმძღვანელობა, მათ შორის, პრემიერ-მინისტრი ბესლან ბარციცი, რომლის თქმითაც, ვითარება მძიმეა, მაგრამ საბედნიეროდ მსხვერპლი არ არის...

როგორც მოსალოდნელი იყო, მომხდარს უკვე მოჰყვა რუსული საზოგადოების რეაქცია. ერთი ნაწილი მათ სოლიდარობას უცხადებს და "გამარჯვებისკენ მიმავალ გზაზე გამძლეობას უსურვებს", თუმცა, არსებობს მეორე ნაწილიც, რომელიც კიდევ ერთხელ ურჩევს თანამოძმეებს, ნუ გარისკავენ საკუთარი ჯანმრთელობისა და სიცოცხლის ფასად, რადგან ეს არის არასტაბილური, არაპროგნოზირებადი რეგიონი, "სადაც შეიძლება ტრაგედია ყოველთვის მოხდეს"...

"დაველოდებით გამოძიებას, მაგრამ ვინმეს სჯერა, რომ იქ, სადაც ყველაფერი უკიდურესად მოწესრიგებული უნდა იყოს, ცეცხლი მოულოდნელად გაჩნდა?.. საინტერესოა, სად, რა სფეროში იხარჯება რუსეთის ბიუჯეტიდან გამოყოფილი თანხები, რას ხმარდება?!.", - წერენ რუსები, რომელთა თქმითაც, მათი ხელისუფლება აფხაზეთისა და ცხინვალის რეგიონის "განვითარებაში" ძალიან დიდ ფინანსურ და ადამიანურ რესურსს დებს, თუმცა, იქ ყველაფერი უარესობისკენ მიდის...

ფოტო: Газета.ру

ლალი პაპასკირი

AMBEBI.GE