"ჩემს შვილებს, მეუღლეს, მე და დედაჩემს მოკვლით დაგვემუქრა..." - კასპის საკრებულოს დეპუტატს თავდასხმაში ადანაშაულებენ

კასპის საკრებულოს დეპუტატს თანასოფლელი ფიზიკურ შეურაცხყოფაში ადანაშაულებს.

ხვთისო კორკოტაშვილი, რომელიც "პატრიოტთა ალიანსის" კასპის რაიონული ორგანიზაციის წევრია, ვახტანგ ბეჟიტაშვილს თავდასხმაში, ფიზიკურ ანგარიშსწორებასა და მკვლელობის მუქარაში ადანაშაულებს. ბეჟიტაშვილი კასპის საკრებულოში "თავისუფალ დემოკრატებს" წარმოადგენს.

როგორც კორკოტაშვილმა AMBEBI.GE-ის განუცხადა, კონფლიქტი მასსა და საკრებულოს დეპუტატს შორის გასულ წელს, საპარლამენტო არჩევნებზე დაიწყო:

"ბეჟიტაშვილს არ ვიცნობდი, პირველად შარშან საპარლამენტო არჩევნებზე გადავიკვეთეთ. მისმა მხარდამჭერებმა "პატრიოტთა ალიანსის" კანდიდატის პლაკატებზე საკუთარი პლაკატები გადააკრეს, რაც ჩამოვხიეთ და ბეჟიტაშვილი გაღიზიანდა. ამის შემდეგ ჩემი მისამართით შეურაცხმყოფელი განცხადებები ისმოდა, შემდგომ მოტყუებით მათი პარტიის ოფისში ამიყვანა, ადგილზე რომ მივედი, პოლიციას გამოუძახეს და დამაბრალეს, რომ მე მათ ოფისში შევიჭერი და იქაურობის დარბევას ვაპირებდი", - აღნიშნავს კორკოტაშვილი.

მისივე განცხადებით, ამ შემთხვევის შემდეგ ვახტანგ ბეჟიტაშვილთან შეხება არ ჰქონია, გასულ კვირას კი ბეჟიტაშვილი თანმხლებ პირთან ერთად მის საცხოვრებელ სახლთან მივიდა და თავს დაესხა.

როგორც კორკოტაშვილი აღნიშნავს, ინციდენტს მისი ხანდაზმული დედა, მეუღლე, ორი მცირეწლოვანი შვილი, ასევე მცირეწლოვანი ნათესავი შეესწრნენ.

"პარასკევი დილა იყო, ეზოში ვმუშაობდი. შევამჩნიე რომ ჩემი სახლის წინ შავი მანქანა გაჩერდა, თუმცა ყურადღება არ მივაქციე. მანქანიდან ბეჟიტაშვილი და ერთი პირი გადმოვიდა. მითხრეს, რომ ჩემთან საქმე ჰქონდათ, თუმცა ვუთხარი, რომ მე მათთან სალაპარაკო არაფერი მქონდა. ამის შემდეგ მოულოდნელად ჩამარტყეს, წავიქეცი და ორივე უმოწყალოდ მირტყამდა წიხლებს. როდესაც ეს დედაჩემმა დაინახა, ყვირილი დაიწყო და მოგერიების მიზნით ბეჟიტაშილს ქვა ესროლა, ის კი ამ დროს მანქანისკენ გაიქცა და იარაღი ამოიღო. ჩემს შვილებს, მეუღლეს, მე და დედაჩემს მოკვლით დაგვემუქრა. შემდგომ მანქანაში ჩაჯდა და ჩვენსკენ დაიძრა, რომ არა მისი თანხმლები პირი, ალბათ მანქანას დაგვაჯახებდა. დედაჩემმა კიდევ ესროლა ქვა და უკანა მინა გაუტეხა. ხმაურზე მოვიდა პოლიციაც, ის მიიმალა. როგორც შემდეგ აღმოჩნდა, ჩამოსულა თბილისში და თავად იჩივლა, რომ მე მას თავს დავესხი და მის მანქანას ქვები დავუშინე. არადა მთელ ეზოში ჩემი სისხლია, ექსპერტიზაც აიღეს", - აცხადებს კორკოტაშვილი.

მისივე განცხადებით, მომხდარიდან გამომდინარე ფსიქოლოგიური ტრამვა მიიღეს მისმა მეუღლემ და მცირეწლოვანმა ბავშვებმა. კორკოტაშვილი შს სამინისტროს დეპუტატის დაპატიმრებას ითხოვს. მისი თქმით, გამორიცხული არ არის, რომ მსგავსი ფაქტი მომავალშიც განმეორდეს.

კორკოტაშვილის ბრალდებებს ბრალდებითვე პასუხობს ვახტანგ ბეჟიტაშვილი.

"ეს ადამიანი შეურაცხადია და მისი მხრიდან მსგავს ფაქტს პირველად არ ჰქონია ადგილი. შარშან პარტიის ოფისში შემოგვივარდა, იგინებოდა და ოფისის დარბევა სცადა. ამის გამო მან სამართალდამცავების მხრიდან გაფრთხილება მიიღო. რაც შეეხება მომხდარ ინციდენტს, მტკნარი სიცრუეა ის რასაც თვითონ ამბობს. როგორ წარმოგიდგენიათ იარაღიან ადამიანს, ვინმე ქვით აშინებდეს?! თვითონ დაიწყო აგრესიის გამოხატვა, სოფელში გადავაადგილდებოდი, დამიწყო გინება, იმაზე, თუ როგორ ვუთხარით მისი ქმედების შესახებ შარშან პოლიციას... შემდეგ ქვების სროლა დამიწყო. მეც მივიღე დაზიანება და ქვა მანქანას მოხვდა. ამიტომ გადავწყვიტე მოგერიება. იარაღით მუქარები თავის პარტიაში მოიკითხოს, ყოფილი მხედრიონელები რომ ჰყავთ ლიდერებად. ამ გზით ის და მისი ლიდერი ცდილობს პოლიტიკურ ოპონენტებთან ბრძოლას. კარგი იქნება თქვენც და სხვა ადამიანებიც, ჩამოხვიდეთ და იკითხოთ, როგორი პიროვნებაა ვახტანგ ბეჟიტაშვილი და რას წარმოადგენს ხვთისო კორკოტაშვილი. როცა თვრება, ყველა მაგას უბაგუნებს...", - აცხადებს ვახტანგ ბეჟიტაშვილი AMBEBI.GE-სთან საუბრისას.

მომხდართან დაკავშირებით დაწყებულია გამოძიება. გამოძიების ფარგლებში ჩატარდა შესაბამისი საექსპერტო სამუშაოები, რომლის პასუხიც რამდენიმე დღეში გახდება ცნობილი. როგორც AMBEBI.GE- ის შს სამინისტროში განუცხადეს, მომხდართან დაკავშირებით გამოძიება სსკ-ის 126-ე მუხლით მიმდინარეობს, რაც სისტემატურ ცემას ან სხვაგვარ ძალადობას გულისხმობს, რამაც დაზარალებულის ფიზიკური ან ფსიქიკური ტანჯვა გამოიწვია.

ნიკა საჯაია

AMBEBI.GE