"ირაკლი მამალაძე თემურ თათარაშვილისა და გიორგი გაბუნიას საქმეებში მონაწილეობდა, როგორც აგენტი" - რას იხსენებს კრიმინალური პოლიციის ყოფილი მაღალჩინოსანი

ირაკლი ფირცხალავამ გაიხსენა კონკრეტული საქმეები, კერძოდ, მომღერალ თემურ თათარაშვილისა და ჟურნალისტ გიო გაბუნიას საქმეები, რომელშიც ირაკლი მამალაძე მონაწილეობდა, როგორც აგენტი, - ამის შესახებ ე.წ. "ციანიდის საქმეში" ბრალდებულ გიორგი მამალაძის ადვოკატმა გიორგი ფანცულაიამ ჟურნალისტებთან საუბრისას განაცხადა.

ადვოკატის განმარტებით, ირაკლი ფირცხალავამ სასამართლო სხდომაზე დეტალურად გაიხსენა ის თანხაც, რომლის სანაცვლოდაც ირაკლი მამალაძე გამოძიებასთან თანამშრომლობდა.

"ირაკლი ფირცხალავამ გაიხსენა კონკრეტული შემთხვევები, თუ როდის იღებდა ირაკლი მამალაძე მონაწილეობას, როგორც აგენტ-პროვოკატორი. მან გაიხსენა მომღერალ თემურ თათარაშვილის და გადაცემის "მოგზაურობა გიორგი გაბუნიასთან ერთად" წამყვანის, გიო გაბუნიას საქმეები, რა დროსაც ირაკლი მამალაძე ჩართული იყო მათი დაკავების პროცედურებში. ირაკლი ფირცხალავამ გაიხსენა ასევე თანხები, რომლებიც ძალოვანი უწყების წარმომადგენლებმა გადასცეს შესრულებული სამუშაოს სანაცვლოდ ირაკლი მამალაძეს", - განაცხადა გიორგი ფანცულაიამ.

ადვოკატის თქმით, დაცვის მხარის მოწმემ ირაკლი ფირცხალავამ დღევანდელ სასამართლო სხდომაზე სხდომის ოქმი წარადგინა, თუ როგორ მიმდინარეობდა მასზე ზეწოლა, რომ დღევანდელ პროცესზე არ გამოცხადებულიყო როგორც მოწმე და არ მიეცა ჩვენება.