16
ივნისიდღის ზოგადი ასტროლოგიური პროგნოზი
25 სახეობის მაღალი ხარისხის და შესანიშნავი გემოს ჩაი - ეს "ოპიუმ ჯორჯიაა", ჩაის მწარმოებელი სტარტაპი, რომლის პროდუქციაც ამ ეტაპზე მხოლოდ რესტორნებში, კაფეებსა და სასტუმროებშია ხელმისაწვდომი. კომპანია 6 თვეა, რაც ბაზარზეა და "ოპიუმ ჩაი" უკვე ისეთი პოპულარობით სარგებლობს, რომ დამფუძნებელი ვასილ ჩითინაშვილი უახლოეს მომავალში ბრენდული მაღაზიის გახსნასაც გეგმავს.
"მინდა, საზოგადოების ფართო ფენებს ხარისხიანი ჩაის სმის საშუალება ჰქონდეთ. ზოგადად, ჩაი ელიტარული სასმელია და ჩაის სმის კულტურა საქართველოშიც უნდა დაინერგოს. სამომავლოდ, ასორტიმენტის გაფართოებასაც ვგეგმავთ," - განმარტავს სტარტაპერი ვასილ ჩითინაშვილი.
თავად სტარტაპერს ბიზნესის მიმართულებით დიდი გამოცდილება არ აქვს. სახელმწიფო სტრუქტურაში მრავალწლიანი მუშაობის შემდეგ, საკუთარი ბიზნესის დაწყება გადაწყვიტა. ჩაის წარმოებამდე რამდენიმე სხვა ბიზნესში სცადა თავი, თუმცა წარმატებას ვერ მიაღწია. "ოპიუმ ჯორჯიამ" კი 6 თვის განმავლობაში საკმაოდ დიდი ცნობადობისა და პოპულარობის მოპოვება შეძლო. გამოცდილებიდან გამომდინარე სხვა სტარტაპერებსაც ურჩევს, არასდროს დანებდნენ.
"ჩემი დადებითი მხარეა, რომ არასდროს ვნებდები. გარკვეული წარუმატებლობის შემდეგ კიდევ ერთხელ ვცადე ბიზნესში თავი და ამჯერად წარმატებით ვართმევ თავს. კომპანია "ოპიუმ ჯორჯია" 6 თვეა, რაც ბაზარზე გამოჩნდა და რთულად, მაგრამ მაინც ვითარდება. პროდუქტის ხარისხიდან და გემოდან გამომდინარე კომპანიამ ბაზარზე თავის დამკვიდრება მეტ-ნაკლებად მარტივად შეძლო. თუმცა სტარტაპიდან ბრენდის ჩამოყალიბებამდე აქტიური მუშაობაა საჭირო," - ამბობს ჩითინაშვილი.
სტარტაპისთვის ცნობადობის მოპოვება განსაკუთრებით რთული აღმოჩნდა, რადგან დამფუძნებელს შეზღუდული რესურსი და ფინანსები ჰქონდა. ამჟამად "ოპიუმ ჯორჯია" "თიბისი ბანკის" პროექტ "სტარტაპერის" მონაწილეა, რაც საქმის სწორად წარმართვაში ეხმარება.
"სტარტაპერი" უნიკალური პროექტია, რადგან რამდენიმე მიმართულებით ეხმარება სტარტაპებს. ერთის მხრივ, ცნობადობის მოპოვებაში ეხმარება. მეორე მხრივ კი ბიზნესის წარმოებისთვის საჭირო ცოდნის აძლევს სპეციალური ტრენინგების საშუალებით," - დასძინა სტარტაპერმა.
#სტარტაპერი #გვეამაყები
ფოტოები: Advan/ედვენი
ნანა მღებრიშვილი
AMBEBI.GE
