10 პროდუქტი, რომელიც ზედმეტი კილოგრამების დაგროვებას და ჯანმრთელობის დაზიანებას იწვევს - მათ ყოველდღიურად მიირთმევთ

სწორი კვება და ჯანსაღი ცხოვრების წესი ადამიანის ჯანმრთელობისთვის უმნიშვნელოვანესია. ჩვენს ყოველდღიურ რაციონში შედის პროდუქტები, რომელთა ჭარბი გამოყენება დაუშვებელია. როგორც თბილისის სახელმწიფო უნივერსიტეტის პროფესორი, სურსათის ექსპერტი - ეთერ სარჯველაძე ამბობს, "დოზა ქმნის შხამს: ერთი ტაბლეტი წამალი წამალია, ორი კი - შეიძლება საწამლავი აღმოჩნდეს. იგივე ითქმის ადამიანის საკვებზეც". ქალბატონი ეთერი იმ პროდუქტებზე გვესაუბრება, რომლებიც ზედმეტი კილოგრამების დაგროვებას და ჯანმრთელობის დაზიანებას იწვევს.

შაქარი და შაქრის შემცვლელები

- დიდი ოდენობით შაქრის გამოყენება კუჭქვეშა ჯირკვლის დაზიანებას იწვევს, რადგან ეს რთული ნახშირწყალია და ორგანიზმისთვის მისი დამუშავება რთული პროცესია. შაქრის ბოროტად გამოყენება ინსულინდამოკიდებულებას და შაქრიან დიაბეტს იწვევს, მით უმეტეს, რომ რაც უფრო მეტ შაქარს მივირთმევთ, ორგანიზმი უფრო მეტს ითხოვს. მართალია, შაქარი ენერგიის წყაროა, მაგრამ ენერგიის მიღება კვების დაბალანსებითაც შეიძლება. კიდევ უფრო მავნებელია შაქრის შემცვლელები. როგორც წესი, ისინი გაცილებით ტკბილია, ვიდრე შაქარი, მაგრამ ეს ნივთიერებები არ არის ენერგიის მომცემი. გარდა ამისა, შაქრის შემცვლელები შეჩვევას იწვევს და უარყოფითად მოქმედებს ადამიანის ორგანიზმზე. ასევე მავნებელია ორგანიზმისთვის შაქარყინული და კოწახურის კანფეტები, რადგან მათში ბლომად შედის ფერისა და გემოს მიმცემი ესენციები. საბედნიეროდ, შაქრის მიღება სხვა გზითაც შეიძლება: ჩვენს ქვეყანაში მოდის უგემრიელესი ხილი, მათ შორის, ყურძენი, რომლითაც შეიძლება შაქრის საჭირო დოზა მივიღოთ. შაქრის მისაღებად ძალიან კარგი პროდუქტია თაფლი, რომელიც ერთდროულად გემრიელიცაა და სასარგებლოც.

მარილი

- კიდევ კარგი, საქართველოში აღარ გვაქვს ტრადიცია, რომ სუფრაზე აუცილებლად უნდა იდოს მარილი და ყველაფერი მასში უნდა ამოვავლოთ... დიდი რაოდენობით მარილის მიღება ორგანიზმში სითხის დაგროვებას იწვევს. მართალია, ნივთიერებათა ცვლისთვის მარილის მიღება საჭიროა, ოღონდ, ძალიან მცირე ოდენობით. ამ რაოდენობას ჩვენ ისედაც ვიღებთ, რადგან მარილი თითქმის ყველა სახის საკვებში შედის - პირველ რიგში კი პურში. ამიტომ, ზოგიერთ ქვეყანაში მარილს კერძებშიც კი მცირე რაოდენობით იყენებენ.

პური

- პურის მიღება საჭიროა, მაგრამ აქაც დოზაა მთავარი. პურის გამორიცხვა დიაბეტით დაავადებულებშიც არ შეიძლება, ოღონდ, არ არის აუცილებელი დიაბეტიანმა ადამიანმა უმაღლესი ხარისხის თეთრი პური მიიღოს. ისედაც, დიდი რაოდენობით პურის მიღება არავისთვის სასურველი არ არის. პური ზომიერად უნდა მივიღოთ, უმრავლესობისთვის 2-3 ნაჭერი დღეში სავსებით საკმარისია. უმჯობესია, მივიღოთ რუხი, ან I-II ხარისხის პური, რომელიც რაფინირებული ფქვილისგან არაა დამზადებული.

ქათმის ხორცი

- ქათამი, რომელიც ჰორმო­ნებით არის გაზრდილი, ძალიან საზიანო საკვებია. სოფელში ყველას გაგვიგია, რომ ქათამი 1-2 წელიწადში იზრდება, ჰორმონებით გაზრდილს კი, ამისათვის სულ რაღაც 2-3 თვე სჭირდება. ასეთი ქათმების გასაზრდელად ქალის ჰორმონები გამოიყენება, მათი ხორცი მდიდარია პროგესტერონით, რომელიც მამაკაცებში უშვილობას და ძალიან ბევრ უარყოფით მოვლენას იწვევს.