ვანდალიზმის ფაქტები თბილისში - ფოტო და ვიდეოკადრები თბილისის ცენტრალური უბნებიდან
დაზიანებული ლამპიონები, დამტვრეული სკამები, წარწერები კედლებზე - თბილისში ბევრ ადგილას შეხვდებით ვანდალიზმის ფაქტებს. ხშირია ისეთი შემთხვევები, როცა ახალგაკეთებულ სკვერს მოქალაქეები რამდენიმე დღეში აზიანებენ და იერსახეს უკარგავენ. AMBEBI.GE-ს კორესპონდენტმა თბილისის ცენტრალური უბნებში ვანდალიზმის კონკრეტული ფაქტები დააფიქსირა, რასაც ფოტოებში იხილავთ.
თბილისის ცენტრალურ უბნებში მდებარე თითქმის ყველა სკვერში მოიძებნება დაზიანებული ინფრასტრუქტურა. თუმცა, პრობლემა მხოლოდ პარკებში არ გვხვდება. დაზიანებულ და დამწვარ ურნებს სხვა ადგილებშიც მრავლად შეხვდებით. ქვემოთ მოცემული ფოტოები ალექსანდრეს ბაღში, ვერის ბაღსა და დედაენის ბაღშია გადაღებული. მათზე კარგად ჩანს, რომ მოსასვენებელი ადგილები და საბავშვო მოედნებიც საკმაოდ დაზიანებულია.
ნაგვის ურნა, რომელიც რკინისაა, გატეხილია
გადატეხილი ლამპიონი
მთაწმინდის რაიონის გამგეობის თანამშრომელის ზაზა ტურძელაძის თქმით, მსგავს ფაქტებზე რეაგირება მოკლე დროში ხდება. გამგეობის კომპეტენციიდან გამომდინარე, ოპერატიულად ხდება დაზიანებული ინვენტარის აღდგენა ან ჩანაცვლება.
"მაქსიმალურად გონივრულ ვადებში ხდება ყველა ობიექტის შემოვლა, რომელიც ჩვენს რაიონშია განთავსებული. ხდება პრობლემების აღრიცხვა. ამის საფუძველზე დგება სატენდერო დოკუმენტაცია, ცხადდება ტენდერი და გამარჯვებული კომპანია ახორციელებს სკვერებში დაზიანებული ინფრასტრუქტურის აღდგენასა და ჩანაცვლებას" - განაცხადა ტურძელაძემ.
ეს ერთ დროს სკამი იყო...
წარწერები საინფორმაციო დაფაზე
გამგეობის თანამშრომელმა ისიც აღნიშნა, რომ ვანდალიზმის პრობლემა მხოლოდ სკვერებში განთავსებულ სკამებს არ ეხება და მსგავსი ფაქტები, საკმაოდ ხშირია. მან ასევე განმარტა, რომ მერიას და გამგეობას არ გააჩნია არანაირი სამოქმედო ბერკეტი, რის საფუძველზეც დააჯარიმებს ვანდალური ფაქტის ჩამდენს.
"ერთ-ერთი მძიმე პრობლემა, რაც ყველას გვაწუხებს, ის არის, რომ ახალრეაბილიტირებული ინფრასტრუქტურა, შეიძლება ორ კვირაში აღარ დაგხვდეს. სამწუხაროდ, გამგეობა ან მერია საკუთარი უფლებამოსილების ფარგლებში ამ ადამიანების დაჯარიმებას ვერ ახორციელებს, არც რაიმე ბერკეტი გაგვაჩნია, რომ რაიმე ღონისძიება ჩავატაროთ" - აცხადებს ზაზა ტურძელაძე და დასძენს, რომ ეს უკვე სამართალდამცველების პრეროგატივაა.
დამტვრეული ინფრასტრუქტურა საბავშვო მოედანზე
შინაგან საქმეთა სამინისტროში განგვიცხადეს, რომ ვანდალიზმის ფაქტის შემთხვევაში, საქმის წარმოება 187-ე მუხლით მიმდინარეობს, რაც ნივთის დაზიანებას ან განადგურებას გულისხმობს.
187-ე მუხლის თანახმად, სხვისი ნივთის დაზიანება ან განადგურება, რამაც მნიშვნელოვანი ზიანი გამოიწვია, ისჯება ჯარიმით ან საზოგადოებისთვის სასარგებლო შრომით, ვადით 100-დან 180 საათამდე, ან გამასწორებელი სამუშაოთი ვადით ერთ წლამდე. მუხლი ასევე ითვალისწინებს თავისუფლების აღკვეთას ვადით, ერთიდან სამ წლამდე.
ნარიტა ჩხაიძე