სირიაში გადასვლის მცდელობისთვის თურქეთში რუსეთის მოქალაქეები დააკავეს

სირიაში არალეგალურად გადასვლის მცდელობისთვის თურქეთში რუსეთის მოქალაქეები დააკავეს. სარატოვის მცხოვრებლები - სვეტლანა უხანოვა თავის პატარა ქალიშვილითა და მეუღლე ევგენი ქოჩაართან ერთად თურქეთში, სირიაში გადასვლის მცდელობისთვის დააკავეს. ოჯახს ისლამისტი რადიკალების დაჯგუფებაში გაწევრიანება ბრალდება. ისინი სახელმწიფო ემიგრანტთა ციხეში გადაიყვანეს.

თურქეთში რუსეთის დიპლომატიური სამსახურის წარმომადგენლების თქმით, ისინი დაკავებულების ოჯახის წევრებს ესაუბრნენ და გაირკვა, რომ უხანოვას მისი ყოფილი მეუღლე, ვალერი უხანოვი ეძებდა. როგორც გაირკვა, ქალმა მოტყუებით წამოიყვანა მისგან მათი საერთო შვილი ლიზა... მათ დაახლოებით ერთი თვეა ეძებენ.

ოჯახის წევრების თქმით, მასთან კავშირი სტამბოლში ჩასვლის შემდეგ დაიკარგა. "მას შემდეგ, რაც სვეტლანამ ისლამი მიიღო, შეიცვალა. ტელევიზორს არ უყურებდა. კომპიუტერით სარგებლობაზეც უარი თქვა. ბავშვი ბაღიდან გამოიყვანა, რათა მას სხვა ბავშვებთან ურთიერთობის საშუალება არ ჰქონოდა. სოციალურ ქსელში მისი მეგობრების სიაში შეიარაღებული ადამიანები გაჩნდნენ... ამიტომაც ვიფიქრეთ, რომ ის უბრალოდ არ დაკარგულა..."- ამბობენ ოჯახის წევრები.

მათივე თქმით, ქალმა ყოფილ მეუღლეს საერთო ქალიშვილის მართლმადიდებლად მონათვლის უფლება არ მისცა, - "მითხრა, გაიზრდება და თავად გადაწყვეტს რომელი რელიგია აირჩიოსო..." - ამბობს უხანოვი.

როგორც სვეტლანას ყოფილი მეუღლე რუსულ მედიასთან საუბარში აცხადებს, ივნისის შუა რიცხვებში სვეტლანა თავის ამჟამინდელ ქმართან და ქალიშვილთან ერთად, ანკარაში დასასვენებლად გაემგზავრა, სადაც მისი და ცხოვრობს. თუმცა, როგორც გაირკვა, ანკარის ნაცვლად სტამბოლში ჩავიდნენ, მას შემდეგ მათთან კავშირი გაწყდა.

მოგვიანებით, მათ უცხო ნომრიდან ევგენი ქოჩაარმა მოსწერა, რომ კარგად იყვნენ და ცოტა ხანში დაუკავშირდებოდნენ. - "ნუ დაგვიწყებთ ძებნას და ნუ ატეხთ ხმაურსო. ეს უკვე ძალიან სახიფათო სიტუაცია იყო. მივხვდი, რომ ჩემი ქალიშვილის თავს კარგი არაფერი ხდებოდა, რის შემდეგაც ადგილობრივ პოლიციას მივმართეთ" - ამბობს უხანოვი.

საქმეს თურქეთში რუსეთის საკონსულოს თანამშრომლები სწავლობენ, რომლებიც დაკავებულებთან დაკავშირებით ინფორმაციებსა და მათ კავშირებს არკვევენ.

რუსული მედია წერს, რომ ეს არ არის პირველი შემთხვევა, როდესაც რუსეთიდან თურქეთის გავლით, მოქალაქეები სირიაში გადასვლას ცდილობენ, - 2015 წელს თურქეთის აეროპორტში კიდევ ერთი ქალი, ვარვარა კარულოვა დააკავეს, რომელიც სირიაში გადასვლას ცდილობდა, მას ბრალად "ისლამური სახელმწიფოს" რიგებში მოხვედრის მცდელობა ედებოდა.

მოგვიანებით, მას მოსკოვის პროკურატურამ 4 წლითა და 6 თვით სასჯელის მოხდა შეუფარდა.

ლალი პაპასკირი

ამბები. გე