ახალი "საზღვარი" გორიდან 20 კილომეტრში - რას შიშობენ გლეხები და რას აკეთებს ხელისუფლება

ბოლო დღეებია ქართული საზოგადოების ყურადღება კიდევ ერთხელ არის მიპყრობილი კონფლიქტის ზონისკენ - რუსეთის საოკუპაციო ძალების წარმომადგენლებმა ამჯერად გორის რაიონის სოფელ ბერშუეთთან დადგეს "საზღვრის" აღმნიშვნელი ახალი ბანერი - "სამხრეთ ოსეთის რესპუბლიკა".

საქართველოს სახელმწიფო უსაფრთხოების სამსახურის ინფორმაციით, საოკუპაციო ხაზს მიღმა მოექცა რამდენიმე ადგილობრივი მცხოვრების სასოფლო-სამეურნეო სავარგული. შესაბამისად, უცნობია, შეძლებენ თუ არა ქართველი გლეხები მათი მიწებიდან მოსავლის აღებას...

სუს-ის მიერ გავრცელებულ განცხადებაში ნათქვამია, რომ აღნიშნული საკითხი ერგნეთში, ინციდენტების პრევენციის და მათზე რეაგირების სამუშაო ჯგუფების დაგეგმილ შეხვედრაზე, 11 ივლისს განიხილება.

თუმცა, მანამდე ბერშუეთელი ფერმერის, გია ხოდელის ბედს იზიარებს არაერთი იქაური მცხოვრები. გასულ წლებში მათი მიწის ნაკვეთები, სადაც მათ შემოსავალი უნდა აეღოთ, ე.წ. საზღვრის მიღმა მოაქციეს.

ქართულ საზოგადოებას საოკუპაციო ძალების წარმომადგენლების მიერ ქართველების მიწის ნაკვეთებში დამონტაჟებული "საზღვრის" აღმნიშვნელი არაერთი ბანერი ახსოვს, რომელიც მცოცავი ოკუპაციის შედეგად თანდათან ცხინვალის დე ფაქტო მხარეს აღმოჩენილა. ხოდელის შემთხვევაში, ე.წ. საოკუპაციო ხაზის გადმოწევით 10 ჰექტარზე მეტი მიწა იკარგება.

მსგავსი შემთხვევა გორის მუნიციპალიტეტის სოფლებში შარშანაც იყო. რუსეთის საოკუპაციო ძალების წარმომადგენლებმა სობისისა და ბერშუეთის მიწის ნაკვეთებში "სასაზღვრო" ბანერებით ჯერ 10 ჰექტარი მიწა მიიტაცეს. ამ ორი წლის განმავლობაში ხოდელმა ჯამში, 20 ჰექტარი მიწა დაკარგა. ბერშუეთელი გლეხები და მიწის მეპატრონეები შიშობენ, რომ დროთა განმავლობაში საოკუპაციო ხაზთან მდებარე მიწის ნაკვეთები მთლიანად დაიკარგება.

რუსმა მესაზღვრეებმა შიდა ქართლში ბორდერიზაციის ახალი ეტაპი დაიწყეს. გორის მუნიციპალიტეტის სოფელ ბერშუეთთან, კერძო მოსახლეების ქერის ყანაში ახალი ბანერები გაჩნდა წარწერით - "სამხრეთ ოსეთის რესპუბლიკა".

ბორდერიზაციის პროცესის განახლება რომ მოსალოდნელი იყო, ამის შესახებ ჯერ კიდევ მაისში ე.წ. სამხრეთ ოსეთის წარმომადგენელი დავით სანაკოევი საუბრობდა. მან ერგნეთში ინციდენტების პრევენციისა და მათზე რეაგირების მექანიზმების ფარგლებში გამართულ შეხვედრაზე ამის შესახებ პირდაპირ განაცხადა, რა დროსაც ისიც აღნიშნა, რომ "საზღვრის ბორდერიზაციის პროცესის განახლება ზაფხულისთვის იყო დაგეგმილი". სავარაუდო მიმართულებად, ზნაურის მხარე დაასახელა, თუმცა, რატომღაც მიმართულება შეცვალეს და გაფართოება გორის მუნიციპალიტეტისკენ აიღეს გეზი.

შერიგებისა და სამოქალაქო თანასწორობის საკითხებში სახელმწიფო მინისტრის ქეთევან ციხელაშვილის განცხადებით, - "განცხადების გაკეთებისთანავე, სამინისტროს ჰქონდა მყისიერი კომუნიკაცია ყველა პარტნიორთან. მომდევნო შეხვედრაზეც ითქვა, რომ ეს აბსოლუტურად მიუღებელია, როგორც უსაფრთხოების, ისე ჰუმანიტარული თვალსაზრისით, რადგან სიტუაციის კიდევ უფრო დამძიმდება". მისივე თქმით, ამ მიმართულებით, ჟენევის დისკუსიების ფარგლებში, საგარეო საქმეთა სამინისტროც არის ჩართული.

დიპლომატიურ უწყებაში აცხადებენ, რომ ქართულმა მხარემ აღნიშნულ საკითხთან დაკავშირებით, საერთაშორისო თანამეგობრობას ყველანაირი ინფორმაცია მიაწოდა. კონკრეტულად, საუბარია ვენაში უსაფრთხოების საკითხების გადახედვის ეუთოს ყოველწლიურ კონფერენციაზე.

რუსეთთან ურთიერთობების საკითხებში პრემიერის სპეციალური წარმომადგენელი და საგარეო საქმეთა მინისტრის მოადგილე ზურაბ აბაშიძე სოფელ ბერშუეთსა და ზემო სობისში რუსი სამხედროების მიერ საოკუპაციო ზოლის გადმოწევის შესახებ ბრიუსელში ისაუბრებს. ზურაბ აბაშიძე და დავით დონდუა ევროკავშირის წევრი ქვეყნების წარმომადგენლებს შეხვდებიან.

ზურაბ აბაშიძე, ბრიუსელიდან პრაღაში გაემგზავრება, სადაც რუსეთის საგარეო საქმეთა მინისტრის მოადგილეს, გრიგორი კარასინს შეხვდება. აბაშიძე ამბობს, რომ კარასინთან შეხვედრისას ბორდერიზაციის პროცესი ერთ-ერთი მთავარი განსახილველი თემა იქნება. – "ჩვენ მარტო 500 მეტრს არ ვედავებით და 200 მეტრს, ჩვენ რუსეთთან გაცილებით უფრო დიდი პრობლემები გვაქვს მოსაგვარებელი და ადრე თუ გვიან მე იმედი მაქვს, რომ მოვაგვარებთ", - აცხადებ ზურაბ აბაშიძე.

სოფელი ბერშუეთი მდინარე ბერშუეთის სანაპიროზე, ქალაქ გორიდან 20 კილომეტრში მდებარეობს... რამდენად იქნება ეს შეხვედრა ვითარების განმუხტვის და ბანერების დემონტაჟის წინაპირობა, ამის შესახებ ჯერჯერობით პასუხი არ არსებობს...

ლალი პაპასკირი

AMBEBI.GE