რა ვითარება დახვდათ ხანძრის შემდეგ ელიავას ბაზრობის ტერიტორიაზე შესულ მოვაჭრეებს

ელიავას ბაზრობაზე, ხანძრის ტერიტორიაზე არსებული მაღაზიების მფლობელების განცხადებით, მათი ნივთები მთლიანად დამწვარია.

როგორც ერთ-ერთი მაღაზიის მფლობელმა ინგა გუჯაბიძემ აღნიშნა, მის მაღაზიაში ყველაფერი დამწვარია და ზარალი დაახლოებით 300 000 ლარს აღწევს.

მისივე თქმით, ავტოაქსესუარებით და საღებავებით ვაჭრობდა, რაც დაზღვეული არ ჰქონია.

ინგა გუჯაბიძის თქმით, პირველ სექტორში, სადაც მისი მაღაზია მდებარეობდა, კიდევ 6 მაღაზიაა დამწვარი.

რაც შეეხება მერიაში დაგეგმილ შეხვედრას, ინგა გიჯაბიძის განცხადებით, ასეთი ინფორმაცია აქვს, თუმცა როდის შედგება შეხვედრა, არ იცის.

ელიავას ბაზრობაზე, ხანძრის ტერიტორიაზე დაზარალებული მოვაჭრეების შეშვება ერთი საათის წინ დაიწყო. დაზარალებულები ტერიტორიაზე ეტაპობრივად, სიის მიხედვით შედიან. ჯგუფები 4 მოვაჭრისგან შედგება.

კოორდინაციას ელიავას ბაზრობის ადმინისტრაცია ახორციელებს. ადგილზე ასევე იმყოფებიან საპატრულო პოლიციის წარმომადგენლები, რომლებიც უსაფრთხოებას აკონტროლებენ.

პრევენციის მიზნით, ადგილზე ასევე მობილიზებულია ერთი სახანძრო-სამაშველო ბრიგადა. ტერიტორიაზე სიტუაციის შესასწავლად კვლავინდებურად რჩებიან სპეციალურად შექმნილი კომისიის წარმომადგენლებიც, რომელთა მუშაობის დასრულების შემდეგაც არ არის გამორიცხული, რომ თბილისის მერიაში შეხვედრა გაიმართოს.