ფარული კადრების მოპოვება-შენახვაში ბრალდებული კუდ-ის ყოფილი მაღალჩინოსნები სასამართლო დარბაზში დააკავეს

პირადი ცხოვრების ამსახველი ფარული კადრების მოპოვება-შენახვაში ბრალდებული კუდ-ისა და პოლიციის ყოფილი მაღალჩინოსნები სასამართლომ გაამტყუნა. განაჩენი მოსამართლე ლიანა ორკოდაშვილმა რამდენიმე წუთის წინ გამოაცხადა.

მოსამართლემ საქმეზე ბრალდებული 6 პირიდან მხოლოდ ერთი გიგლა შიოშვილი გაამართლა. საქმეზე ბრალდებული რევაზ შიუკაშვილი და ირაკლი ყიფშიძე კი სასამართლო დარბაზშივე დააკავეს.

კერძოდ, საქმეზე ბრალდებულ კუდ-ის უფროსის ყოფილ მოადგილე ვასილ ლელუაშვილს 6 წლით თავისუფლების აღკვეთა შეეფარდა, "ამნისტიის კანონით" კი მას სასჯელის ერთი მეოთხედი შეუმცირდა და საბოლოოდ, 4 წლითა და 6 თვით თავისუფლების აღკვეთა განესაზღვრა.

რევაზ შიუკაშვილი და ირაკლი ყიფშიძე მოსამართლემ ასევე დამნაშავედ სცნო წარდგენილ ბრალში და სასჯელის სახით ორივეს 5 წელი და 4 თვე განუსაზღვრა. მათ „ამნისტიის შესახებ“ კანონის თანახმად, სასჯელის ვადა ერთი მეოთხედით შეუმცირდათ და საბოლოოდ, ბრალდებულებს 4 წლით თავისუფლების აღკვეთა განესაზღვრათ.

რაც შეეხება საქმეზე ბრალდებულ, ძალოვანი უწყების კიდევ ორ ყოფილ თანამშრომელს - გივი კაციტაძესა და დიმიტრი თათრიშვილს, რომლებიც ამჟამად მიმალვაში იმყოფებიან, მოსამართლემ მათ მიმართაც გამამტყუნებელი განაჩენი გამოიტანა და სასჯელის სახით 7 წლით თავისუფლების აღკვეთა განუსაზღვრა. "ამნისტიის შესახებ" კანონის თანახმად, კაციტაძეს და თათრიშვილს სასჯელის ვადა ერთი მეოთხედით შეუმცირდათ და საბოლოოდ, 5 წლითა და 3 თვით პატიმრობა შეეფარდათ.

მოსამართლე ლიანა ორკოდაშვილის გადაწყვეტილებით, პირადი ცხოვრების ამსახველი ფარული ჩანაწერების მოპოვებაში ბრალდებული გიგლა შიოშვილი გამართლდა.

როგორც მოსამართლემ განმარტა, საქმის განხილვისას მის წინააღმდეგ ვერ შეგროვდა მტკიცებულებების ერთობლიობა, რომელიც მის მიერ დანაშაულის ჩადენას დაამტკიცებდა.