ბოლო წლებში ირანში განხორციელებული მასშტაბური ტერაქტების ისტორია

ე.წ. ისლამური სახელმწიფოს წევრების სამიზნე ირანი ხდება... ბოლო ინფორმაციით, 7 ივნისს თეირანში, ირანის პარლამენტსა და აიათოლა ჰომეინის მავზოლეუმზე მოწყობილი ორი თავდასხმის დროს 12 ადამიანი დაიღუპა, მათ შორის არიან თავდამსხმელებიც...

ირანული და დასავლური მედიის ინფორმაციით, სუნიტი ექსტრემისტების ჯგუფმა შიიტებით დასახლებულ ირანში თავდასხმები დაგეგმა და განახორციელა... ირანელი სამართალდამცველების განცხადებით, ადგილობრივი დროით, დილის 9 საათზე 4 ტერორისტი, რომლებიც ქალის სამოსში იყვნენ გამოწყობილი, პარლამენტის შენობაში მთავარი შესასვლელით შევიდნენ. მალევე გაირკვა, რომ "კალაშნიკოვებითა" და პისტოლეტებით იყვნენ შეიარაღებული და უსაფრთხოების სამსახურის თანამშრომლებს ცეცხლი გაუხსნეს.

ირანის შინაგან საქმეთა მინისტრის მოადგილის, მოჰამად ჰოსეინ ზოლფაღარის განცხადებით, - ექსტრემისტები პარლამენტის კანცელარიაში გამაგრდნენ, თუმცა მას შემდეგ, რაც ის სპეცრაზმმა ალყით აიღო, ისინი დააკავეს, ერთმა მათგანმა შენობის მეოთხე სართულზე თავი აიფეთქა. კიდევ ერთი მათგანი, რომელსაც თან 6 ხელყუმბარა ჰქონდა, სპეცრაზმის თანამშრომლებმა მოკლეს.

მოგვიანებით, "ისლამური სახელმწიფოს" ტერორისტებმა იერიში მიიტანეს აითოლა ჰომეინის მავზოლეუმზეც. რუსი ჟურნალისტის, ალექსეი კონდულუკოვის თქმით, მავზოლეუმზე თავდამსხმელთა შორის ქალიც იყო და სწორედ მან აიფეთქა თავი... ირანის საგანგებო მდგომარეობის დეპარტამენტის ხელმძღვანელი პირ ჰოსეინ კოლივანდის ინფორმაციით, 12 დაღუპულის გარდა, სულ 42 ადამიანი დაიჭრა.

არაბული მედია აქვეყნებს ერთ-ერთი თვითმხილველის მონათხრობს, რომლის თქმითაც ის შორიახლოს მდებარე საავადმყოფოში იყო და ფაქტს თავად შეესწრო... - "უცებ ინტენსიური სროლა ატყდა და დავინახე, რომ ვიღაც ჩაიკეცა... რამდენიმე წუთში იქაურობა პოლიციელებით გაივსო, შემდეგ ძლიერი აფეთქების ხმა გაისმა... ქუჩები გადაკეტეს... ამ დროს ვიღაც მკერდში დაჭრილი კაცი გამოიყვანეს, სასწრაფო დახმარების თანამშრომლებმა გასაშლელ საწოლზე დააწვინეს და მანქანაში ჩასვეს... პოლიციამ გვითხრა, რომ ფრთხილად ვყოფილიყავით და სახლიდან გამოსვლისგან თავი შეგვეკავებინა. შემდეგ ხალხმა თქვა, რომ "ისლამური სახელმწიფოს" ტერორისტებმა ამჯერად ჩვენ ამოგვიღეს მიზანში...", - ამბობს თეირანში მომხდარი ტერაქტების თვითმხილველი.

ვრცელდება ინფორმაცია, რომ ირანულმა დაზვერვამ 7 ივნისს, ასევე ე.წ. ისლამური სახელმწიფოს მიერ დაგეგმილი კიდევ ერთი ტერაქტი აღკვეთა.

3 ივნისს, ირანში, ქალაქ შირაზის სავაჭრო ცენტრში ძლიერი აფეთქება მოხდა. მაშინ პროვინციის სასწრაფო სამედიცინო დახმარების უფროსმა ფარს მუჰამედ-რეზა ალი მანეშმა განაცხადა, რომ აფეთქების შედეგად 32 ადამიანი დაიჭრა. უსაფრთხოების სამსახურმა მაშინ აფეთქების მიზეზებზე საუბრისგან თავი შეიკავა.

2015 წლიდან ირანში 12 მასშტაბური ტერაქტი მოხდა; - 2005 წლის 12 ივნისს, საპრეზიდენტო არჩევნებამდე ორი დღით ადრე, ჰუზეისტანის პროვინციაში, გენერალ-გუბერნატორის სასახლეში მომხდარი აფეთქების შედეგად, 11 ადამიანი დაიღუპა და 87 მძიმედ დაშავდა. მიმდევნო 10 თვის განმავლობაში, იმ პროვინციაში კიდევ 4 ტერაქტი მოხდა, რასაც 28 ადამიანი ემსხვერპლა. მაშინ ირანის მთავრობამ მომხდარში ირანელი არაბები დაადანაშულა. იმავე წლის 14 დეკემბერს არაბული საინფორმაციო წყაროები აჰმადინეჯადის გატაცების შესახებ იტყობინებოდნენ, რომ ასაფეთქებელ მოწყობილობას სახელმწიფო მეთაურის კორტეჟი უნდა აეფეთქებინა, რა დროსაც დაიღუპა დაცვის წევრი... შემდეგ გაირკვა, რომ მომხდარში აჰმადინეჯადი არ ფიგურირებდა.

2006 წლის 26 მარტს, "ჯუნდალას" ბოევიკებმა ქალაქების, ბამისა და კერმანის დამაკავშირებელი ტრასა გადაკეტეს და ამ გზაზე "გაჭედილ" მანქანებს ცეცხლი გაუხსნეს, რა დროსაც 22 ადამიანი დაიღუპა და 6 მძიმედ დაიჭრა.

2007 წლის 14 თებერვალს, ქალაქ ზაჰედანში დანაღმული მანქანა აფეთქდა და 11 სამხედრო მოსამსახურე დაიღუპა და 31 დაშავდა.

2008 წლის 12 აპრილს, ქალაქ შირაზში მეჩეთთან არსებულ კულტურულ-რელიგიურ ცენტრში მომხდარი აფეთქებისას 12 ადამიანი დაიღუპა და 202 მძიმედ დაიჭრა, მაშინ ერთ-ერთი ვერსიით, ქალაქ რეშტში არსებულ რუსეთის საელჩოზეც იგეგმებოდა თავდასხმა...

2009 წლის 28 მაისს, ქალაქ ზაჰედანის მეჩეთში თავი აიფეთქა თვითმკვლელმა 8 ტერორისტმა, რასაც 27 ადამიანის სიცოცხლე შეეწირა.

2009 წლის 18 ოქტომბერს, ქალაქ სარბაზში, "ჯუნდალის" თვითმკვლელმა ტერორისტმა თავი აიფეთქა, შიიტებისა და სუნიტების რეგიონალურ შეკრებაზე, სადაც 42 ადამიანი, მათ შორის, გენერალი ნურალ შუშტარი დაიღუპა...

2010 წლის 15 ივლისს, ასევე ზაჰედანში, მეჩეთთან ახლოს, ორმა თვითმკვლელმა ტერორისტმა აიფეთქა თავი, რასაც 27 ადამიანის სიცოცხლე შეეწირა, 270-ზე მეტი დაშავდა.

2010 4 აგვისტოს კიდევ ერთხელ გავრცელდა ინფორმაცია აჰმადინეჯადის გატაცებასთან დაკავშირებით, - მაშინ როდესაც ის ქალაქ ჰამადანში იმყოფებოდა, თვითნაკეთი ხელყუმბარა აფეთქდა, რა დროსაც მისი დაცვის ერთ-ერთი თანამშრომელი დაიჭრა.

2010 წლის 14 დეკემბერს ქალაქ ჩაბახარში ერდროულად ორი აფეთქება მოხდა, რა დროსაც 33 ადამიანი დაიღუპა. ტერაქტის ავტორი ირანში კარგად ცნობილი "ჯუნდალის" დაჯგუფება იყო...

2012 წლის 25 აპრილს ჩაბახარის მეჩეთში, რომელიც 2010 წელს ერთხელ უკვე ააფეთქეს, კიდევ ერთი ტერაქტი მოხდა,- თვითმკვლელებმა ორი ადამიანი მოკლეს და 6 ადამიანი დაჭრეს, მათ შორის იყო ბავშვიც... მაშინ ირანის პარლამენტი აცხადებდა, რომ თავდასხმა, მემარცხენე რადიკალების, "ირანელი მოჯაჰედების" მიერ იყო ორგანიზებული.