"არ მეგონა ხალხს ასეთი ბოღმა თუ ჰქონდა, მწერენ: მახინჯო, არ ხარ პროექტის ღირსიო" - "იქს ფაქტორის" დივას ნოტარიუსობა სურს

22 წლის სოფო საჟინიანი მაყურებელმა პროექტიდან "იქს ფაქტორი" გაიცნო. სოფო მიზანდასახული გოგონაა, დამარცხებას არ ეგუება და ამის დასტურია ისიც რომ მან პროექტში მონაწილეობა მეორედ სცადა. ის "იქს ფაქტორის" ოთხი სკამის ტურიდან სოფო ნიჟარაძემ 2015 წელს გაუშვა, თუმცა სოფო არ დანებდა და იმიჯშეცვლილი 2017 წელს პროექტში ისევ დაბრუნდა.

შოუს პირველ ლაივზე, 28 მაისს, სოფო საჟინიანი აუტსაიდერებში მოხვდა, მაგრამ გიორგი გაბუნიას გადაწყვეტილებით, პროექტი მეორე აუტსაიდერმა ოთო ღურწკაიამ დატოვა.

- სოფო, ელოდით აუტსაიდერებში მოხვედრას?

- აუტსაიდერებში დგომას რა თქმა უნდა არ გამოვრიცხავდი, რადგან ბევრი კარგი კონკურსანტია "იქს ფაქტორში" და მარტივად შემეძლო დამეტოვებინა პროექტი. გული დამწყდა ოთო ღურწკაიაზე, ვთვლი ძლიერი კონკურსანტი იყო და მის გულშემატკივრებს რომ ეაქტიურათ, ეს არ მოხდებოდა. ერთი ზარიც რომ გამოეშვა თითოეულ მხარდამჭერს აუტსაიდერებშიც არ მოვხვდებოდით. "იქს ფაქტორის" გვერდზეც და პირად შეტყობინებებში მწერენ - "შე მახინჯო, არ ხარ პროექტის ღირსი", "არ უნდა დარჩენილიყავი და მაინც გავარდებიო"... არ მეგონა ხალხს ასეთი ბოღმა თუ ჰქონდა. მაგრამ, მადლობასაც ვეუბნები ამ ხალხს, მათი აგრესია ძალას მმატებს და სამმაგად მაძლიერებს.

სოფო საჟინიანი 2015 წლის "იქს ფაქტორში"

- სოფო ნიჟარაძემ გადაწყვეტილების მიღებისას განაცხადა, რომ მორალური უფლება არ ჰქონდა, პროექტში ხმას თუ არ მოგცემდა. მგონი გაგაღიზიანა ამ ნათქვამმა, რადგან თვლი რომ პროექტში ყოფნა გეკუთვნის?

- არ გამაღიზიანა. ეს მისი შეხედულებაა, გამიკვირდა კიდეც პროექტში მე რომ დამტოვეს, როცა გამოაცხადეს ოთო ტოვებდა პროექტს ძალიან გამიკვირდა, რადგან მას კარგი შეფასებები ჰქონდა. მე და სოფო ნიჟარაძეს შორის არანაირი დაპირისპირება არ არსებობს. მან დაინახა ჩემი ნიჭი და მხარს მიჭერს. ძალიან ვაფასებ ამ ყველაფერს.

- "იქს ფაქტორის" დივას გიწოდებენ, მისაღებია ეს სტატუსი თქვენთვის?

- გააჩნია ვინ როგორ აღიქვამს დივას. ალბათ მე ასე დამინახეს და ამიტომაც მომანიჭეს ეს სტატუსი. ცხოვრებაში ძალიან უბრალო ადამიანი ვარ. ჩემი ვიზუალის გამო ყველას "სტერვა" ვგონივარ. რეალურად გულწრფელი ადამიანი ვარ, ვინც მიცნობს ყველა იტყვის ამას. უშუალო ადამიანი ვარ და ჯერჯერობით ეს ხალხს ვერ დავანახე.

- ჩვენთვის მოცემულ ერთ-ერთ ინტერვიუში, თქვით რომ შეყვარებული გყავთ, ისევ ერთად ხართ?

- შეყვარებული არ ვარ. უბრალოდ ჩემს ცხოვრებაში არსებობს ადამიანი ვისაც დავეყრდნობი. ის ინტერნეტით გავიცანი, მაგრამ შეყვარებულები არ ვართ, დაოჯახებასაც არ ვაპირებ, რადგან ჯერ ძალიან ადრეა.

- რატომ მალავ ამ ადამიანს?

- კონკრეტული რაღაცეების აფიშირება არ მიყვარს. შეყვარებული რომ ვიყო დავდებდი მის ფოტოებს ინსტაგრამზე, მაგრამ არ არის შეყვარებული და რატომ დავდო?

- ე.ი. ხარ ადამიანთან, რომელიც არ გიყვარს...

- შეყვარებული ამ ადამიანს არასოდეს არ ერქვა. ის არის ახლო მეგობარი, რომელსაც ვუზიარებ ყველაფერს და შემიძლია დავეყრდნო. დიდი სიყვარული ჯერ არასდროს მწვევია.

- რა გეგმები გაქვს სამომავლოდ?

- მინდა ნოტარიუსი გავხდე. მშვიდი და რომანტიკული ადამიანი ვარ. ხშირად განვმარტოვდები ბუნებაში, ან სადმე ვერანდაზე, სადაც ან წიგნს ვკითხულობ ან ბევრს ვფიქრობ. სამომავლოდ მინდა მშვიდი ცხოვრება. არაფერი სადარდებელი რომ არ მქონდეს. მინდა მოპოვებული მქონდეს სტატუსი საზოგადოებაში. მირჩევნია თქვან, ეს გოგო ვერ მღერის, ვიდრე თქვან რომ მე ცუდი ადამიანი ვარ.

- ოჯახი როგორ ხვდება თქვენს სექსუალურ იმიჯს სცენაზე?

- ძალიან ტრადიციულ ოჯახში ვარ აღზრდილი, მათთვის რთულია ჩემი სექსუალური იმიჯის აღქმა. უფრო მწვავედ აღიქვამენ ყველაფერს. რასაც მივაღწიე ამ ცხოვრებაში ყველაფერი დედ-მამის ხელშეწყობის და ჩემი შრომისმოყვარეობის დამსახურებაა. ჩემი წარმატება მშობლების ბედნიერების პირდაპირპროპორციულია, ამიტომ სულ ვცდილობ გავითვალისწინო მათი აზრი.

- ცნობილია, რომ უამრავი თაყვანისმცემელი გამოგიჩნდა...

- სულ მყავდა თაყვანისმცემლები, მაგრამ ახლა თაყვანისმცემლების არმია მყავს. მაშინ "არმუკა" მყავდა. ზოგი ძალიან შემაწუხებელია, ცოლებს არ უძღვნიან ალბათ ისეთ ელქსებს, მე რასაც მწერენ და ვცდილობ ყველა ასეთ ადამიანს ვუპასუხო...

თამარ ბოჭორიშვილი

AMBEBI.GE