ჩაწითლებული თვალები, ყელის ტკივილი, მაღალი ტემპერატურა - ეს ის სიმპტომებია, რომელიც ბოლო პერიოდში მოსახლეობაში გავრცელებულ ვირუსს ახასიათებს. როგორ დავიცვათ თავი და როდის მივმართოთ ექიმს, თუ ვირუსმა შემოგვიტია - AMBEBI.GE ამ საკითხზე დაავადებათა კონტროლის ეროვნული ცენტრის გადამდებ დაავადებათა დეპარტამენტის უფროსს, ხათუნა ზახაშვილს ესაუბრა.
მისი თქმით, ეს არის ადენოვირუსი, რომელიც ციკლურად ვრცელდება. ვირუსის რიგი შემთხვევები მოსახლეობაში დაფიქსირდა, თუმცა საშიში არ არის.
- რა სიმპტომები აქვს ამ ვირუსს?
- ვირუსი შეიძლება გამოხატული იყოს კონიუქტივიტითა და ცხელებით, ან შეიძლება იყოს კონიუქტივიტი, მაღალი ცხელება და შემაწუხებელი ხველა. რესპირაციული ვირუსები ზამთრის ბოლოს, გაზაფხულზე აქტიურდება ხოლმე. საკმაოდ გადამდებია. თუ ოდესღაც ბავშვობაში არ გვაქვს გადატანილი, შესაძლოა ჩვენც შეგვხდეს, თუმცა ეს ვირუსი ძალიან აგრესიული არ არის.
- ექიმს როდის უნდა მივმართოთ?
- ეს უკვე დამოკიდებულია ავადმყოფის მართვის საკითხზე. თუ ადამიანს აქვს შემაწუხებელი ხველა, ტკივილი გულ-მკერდის არეში, თუ ტემპერატურა გრძელდება 3 დღეზე მეტი ისე, რომ ჩვეულებრივი სიცხის დამწევის ზემოქმედებას არ ექვემდებარება, კონიუქტივიტი კი ხასიათდება ძლიერი ცრემლდენით, რომელსაც შეიძლება დაერთოს ჩირქოვანი გამონადენი თვალიდან, ამ შემთხვევაში აუცილებლად უნდა მიმართონ ექიმს, რომ სწორად წავიდეს მკურნალობა, არ გართულდეს მდგომარეობა ან არ განვითარდეს ჩირქოვანი კონიუქტივიტი.
- ამ შემთხვევაში, პრევენციის ზომები როგორია?
- როცა ადამიანი ავადაა, უნდა დაიცვას სტანდარტული ჰიგიენური წესები, რომელსაც ზოგადად ვამბობთ ხოლმე რესპირატორულ ვირუსთან დაკავშირებით. ეს არის ხელების ჰიგიენა, ოთახის ხშირი განიავება, მით უმეტეს, ახლა ისეთი სეზონია, რაც გვაძლევს ფანჯრის გაღების საშუალებას. საჭიროა დაავადებულისთვის ცალკე პირსახოცის გამოყოფა, რომ ოჯახებში არ მოხდეს შიდა გავრცელება კონტაქტური გზით. როგორც წესი, ეს ვირუსი ავადმყოფს მშვიდობიანი გზით გადააქვს.
თეა ბეჟიტაშვილი
AMBEBI.GE
