ცუცა კაპანაძის მოკითხვა ამერიკიდან და ნიუ-იორკის ქართული თეატრი, რომელიც ისტორიას ქმნის

4 ივნისს ნიუ-იორკში ქართული პრემიერაა - ქართველი ემიგრანტი მსახიობები, რომლებიც ლუკმა-პურისთვის აშშ-ში სხვადასხვა საქმიანობით არიან დაკავებულები, პარალელურად თეატრისა და საკუთარი პროფესიის სიყვარულით ქართული კულტურის ცენტრში Dancing Crane Company-ში და მასთან არსებულ New York Georgian Theater-ში არიან გაერთიანებულები, სადაც სპექტაკლების დადგმას და თამაშს ახერხებენ.

ემიგრანტ მაყურებელს ირაკლი სამსონაძის პიესის მიხედვით შექმნილ "კლინიკური ქორწინებას" წარუდგენენ.

პიესამ 2010 წელს მიხეილ თუმანიშვილის სახელობის ფონდის კონკურსის - "ახალი ქართული პიესა" - პირველი პრემია მიიღო. ეს არის ტრაგიკ-ფარსი-კომედია, უცნაურად გადმოცემული მარადიული პრობლემები. მოქმედება ვითარდება კერძო კლინიკაში, სადაც მთავარ ექიმს ვალტერ ჩიჩუას საათივით აქვს აწყობილი საქმე. თვითონ არის კანონიც და კანონის განმგებელიც, მაგრამ მუდმივი არაფერია... და აი, კლინიკაში მოდის ახალი პაციენტი ნოდარა და ჩნდება პრობლემა, რომლის მოსაგვარებლადაც ბატონი ვალტერი მზადაა, ყველანაირ ხერხს მიმართოს...

მარადიული პრობლემები - ღალატი, უმუშევრობა, ლოთობა, დანაშაულიდან თავის დაძვრენის მცდელობა, ტყუილი, განდიდების სურვილი, ნებისმიერი გზით კეთილდღეობის მოპოვება, ბატონობის სურვილი, ავტორის მიერ ოსტატურად შექმნილ ძალიან საინტერესო აბსურდული სიტუაციებითაა გადმოცემული.

რეჟისორი - ლიკა სირელსონი გახლავთ, მხატვარი - მაკა მიქელაძე, ქორეოგრაფი - ირაკლი შენგელია. სპექტაკლში მონაწილეობენ მსახიობები: დავით ტოპრაკაშვილი, ანრი კალანდარიშვილი, ირინა ჩინაშვილი, ირაკლი ლებანიძე, ცუცა კაპანაძე, გიორგი ნარიმანიძე, ნატალია გოდერძიშვილი, ლიკა სირელსონი.

AMBEBI.GE ნიუ-იორკში ცუცა კაპანაძეს დაუკავშირდა, რომელიც New York Georgian Theater-ს აქტიური წევრია და ახალ წარმოდგენაში მონაწილეობს.

- ჩემს პერსონაჟს ასმათი ჰქვია, ცხვრის "ქურქში" გახვეული მგელია, ჩვეულებრივი თაღლითი... ეს წარმოდგენა აქამდე დადგმული სპექტაკლებისგან აბსოლუტურად განსხვავდება. მაყურებელი მსახიობებს სულ სხვა ამპლუაში იხილავს. ჟღერს შესანიშნავი მუსიკა, მხატვრობა, ჩანს რეჟისორის განსხვავებული ხედვა. ასე რომ, ამ თეატრში საქმიანობა ყველას გვეამაყება, რადგანაც ვქმნით ქართული თეატრის უდიდეს ისტორიას. იმის გამო, რომ ჩვენს თეატრს არსებობის 10 წელი უსრულდება, აუცილებელია მას ჰყავდეს მაყურებელი, რისთვისაც ენერგიას არც ერთი ვზოგავთ.

- უკვე რამდენი წელი გავიდა, რაც ამერიკაში ცხოვრობ?

- 11 წელია ამერიკაში ვარ და ამ ქვეყნის მოქალაქეც გახლავართ (იმედია, ჩემი ქვეყნის მოქალაქეობას ოდესმე დავიბრუნებ). აქ ჩამოსვლის პირველი დღიდანვე კომპანია Dancing Crane-თან არსებული ქართული კულტურის ცენტრის წევრი გავხდი, რომელსაც დეკემბერში არსებობის 20 წელი უსრულდება, ხოლო ქართულ თეატრს კი 15 სექტემბერს - 10 წელი შეუსრულდება. დღემდე მისი წევრი ვარ და ვამაყობ, რომ ამ თეატრის დაარსებაში წვლილი მიმიძღვის, რომ თითოეული მსახიობი, შემოქმედებითი ჯგუფის წევრი ქართული თეატრის ისტორიას შორეულ ამერიკაში ქმნის. ეს ცენტრი ჩვენი მეორე ოჯახია, სადაც თითეული ჩვენთაგანი ჩვენს საყვარელ საქმეს ვაკეთებთ.

სულ თავიდან თეატრი ოტია იოსელიანის "ექვსი შინაბერა და ერთი მამაკაცით" გაიხსნა (დამაარსებლები ვიქტორ და ლია სირელსონები). ამ ხნის მანძილზე მონაწილეობა მაქვს მიღებული 5 სპექტაკლში, 3 მიუზიკლსა და 3 თეატრალურ შოუში.

- ძირითადად ვინ არიან თქვენი თეატრის მაყურებლები?

- ჩვენი მაყურებლები ემიგრანტი ქართველები არიან, მაგრამ ასევე ყოველ სპეკტაკლზე მოდიან და მხარს გვიჭერენ ჩვენი ამერიკელი მეგობრები. მადლობა მათ ამისთვის!

- როგორც ვიცი, საქართველოში ცოტა ხნის წინ იყავი ჩამოსული...

- კი, მარტში გახლდით საქართველოში ორგანიზაცია "წარმატებული ემიგრანტი ქალის" მოწვევით და დამაჯილდოვეს როგორც მე, ასევე სხვადასხვა ქვეყნიდან ჩამოსული წარმატებული ემიგრანტი ქალი. დიდი მადლობა ამისთვის მის ორგანიზატორს ქალბატონ ინნა ბაიას. ითოეული ემიგრანტისთვის დიდი სტიმულია, როდესაც შენს შრომას აფასებენ.

- მსახიობ ხათუნა იოსელიანზე რას გვეტყვი, ისიც ხომ თქვენი თეატრის წევრია.

- რა თქმა უნდა, ჩვენთან არის და ამ პრემიერის შემდეგ ახალი სპექტაკლის დადგმას იწყებს. რამდენიმე პიესა აქვს, მაგრამ ზუსტად არ ვიცი, რომლის დადგმას გადაწყვეტს. ჩვენს თეატრში მას დადგმული აქვს ნოდარ დუმბაძის "თეთრი ბაირაღები".

- საქართველოში საბოლოოდ დაბრუნებას როდის აპირებ?

- საქართველოში დაბრუნებას სულ ვაპირებ, მაგრამ ახლო მომავალში არა. ისე თუ რაიმე პროექტი იქნება და მიმიწვევენ, დიდი სიამოვნებით ჩამოვალ. ველოდები ზუსტ პასუხს ერთ-ერთი ფილმიდან. შესაძლებელია, რომ ივლისში გადაღებები დაიწყოს საქართველოში და ჩამოვიდე. რეჟისორის გვარს ჯერ არ ვიტყვი. რაც შეეხება სხვა სიახლეებს, - ჩვენი ბავშთა მუსიკალური თეატრი 4 ივლისს თეატრალურ ფესტივალზე თესალონიკში მიემგზავრება, რისთვისაც დიდი სამზადისია...  სხვა რა გითხრათ, მიყვარხართ და გულთბილ მოკითხვას გითვლით!

ლალი ფაცია

AMBEBI.GE