ავღანეთში კონფლიქტი მწვავდება - ადგილზე ამერიკამ შესაძლოა დამატებითი სამხედროები გააგზავნოს

ამერიკის შეერთებული შტატების დაზვერვის ხელმძღვანელი დენიელ ქოუთსი მიიჩნევს, რომ შესაძლოა, უახლოეს წლებში ავღანეთში კონფლიქტი დამძიმდეს. მისივე თქმით, ეს იმ შემთხვევაშიც კი თუ ამერიკა მეტ სამხედრო შეიარაღებას შეიტანს იმ ზონაში, სადაც 16 წელია ბრძოლა არ წყდება.

ამის შესახებ ინფორმაციას "ამერიკის ხმა" ავრცელებს. გამოცემის თქმით, სენატის დაზვერვის კომიტეტის მოსმენაზე სხვა გლობალურ საფრთხეებზე მსჯელობასთან ერთად ეროვნული დაზვერვის დირექტორმა დენ ქოუტსმა განაცხადა, რომ თალიბანი ავღანეთის პროვინციებში ძალას იკრებს. ქვეყნის მთავრობა კი უმძიმეს ეკონომიკურ მდგომარეობაშია.

"დაზვერვის შეფასებების მიხედვით, თითქმის დარწმუნებული ვართ, რომ ამერიკისა და მისი პარტნიორების სამხედრო მხარდაჭერის მცირედით გაზრდის მიუხედავად, პოლიტიკური და უსაფრთხოების კუთხით არსებული სიტუაცია ავღანეთში 2018 წლამდე გაუარესდება", - აცხადებს  ქოუთსი.

ამერიკას ამჟამად ავღანეთში 8 400 სამხედრო ჰყავს გაგზავნილი, განიხილება კიდევ 5 000 ჯარისკაცის გაგზავნა. პრეზიდენტი ტრამპი გადაწყვეტილებას სავარაუდოდ, უახლოეს დღეებში მიიღებს.

"როიტერის" ცნობით, აშშ-ის შეიარაღებულმა ძალებმა შესაძლოა, ავღანეთში, თალიბანთან საბრძოლველად, დამატებით 3000-დან 5000-მდე სამხედრო გაგზავნოს.

დამატებითი სამხედრო ძალის გაგზავნის მიზეზი, თალიბანის მიერ გახშირებული ავიაიერიშებია. ამ ეტაპზე, ავღანეთში ნატო-ს მისიით 13 000 ჯარისკაცი იმბრძვის, მათ შორის 8 400 ამერიკელია.

მიმდინარე წლის თებერვალში, ავღანეთში ამერიკული ჯარების გენერალი მაჯონ ნიკოლსონი სენატისადმი მოხსენებაში ამბობდა, რომ ავღანეთში განთავსებული სამხედრო კონტინგენტის რაოდენობა თალიბანთან წინააღმდეგ საბრძოლველად საკმარისი არ იყო.

აპრილში, თალიბანის მიერ დაანონსებული ე.წ. გაზაფხულის თავდასხმების შემდეგ კი პენტაგონში  სამხედროთა რაოდენობის გაზრდის საკითხი კიდევ უფრო აქტუალური გახდა.

ამერიკის შეერთებულმა შტატებმა თალიბანის წინააღმდეგ სამხედრო ოპერაციები ოფიციალურად 2014 წელს შეწყვიტა, თუმცა განსაკუთრებული ძალები, ავღანელი სამხედროების მხარდაჭერით, ტერორისტებთან ბრძოლას განაგრძობენ.

თეთრი სახლის გადაწყვეტილებას მოუთმენლად ელიან ავღანეთში, - საერთაშორისო ძალების მეთაურმა თეთრ სახლს 3 თვის წინ მიმართა და ომით გადაღლილ ქვეყანაში გარდატეხის შეტანის მიზნით, რამდენიმე ათასი ჯარისკაცის დამატება მოითხოვა.

"პრეზიდენტ დონალდ ტრამპის ადმინისტრაციას საბოლოო გადაწყვეტილება ამასთან დაკავშირებით ჯერ არ მიუღია" - აცხადებს თეთრი სახლის პრეს-მდივანი შონ სპაისერი.

ოფიციალური პირები "ამერიკის ხმასთან" საუბარში ამბობენ, რომ ავღანეთის თავდაცვის საკითხზე პრეზიდენტ დონალდ ტრამპთან ბრიფინგი ჯერ არ გამართულა და ის, მოგვიანებით, მაისში იგეგმება. დასავლეთის ექსპერტების მოსაზრებით, მათ შორის ჰერიტიჯის ფონდის ეროვნული თავდაცვის ცენტრის დირექტორის ტომას სპორის თქმით, ტრამპის ადმინისტრაცია ავღანეთში საერთაშორისო ძალების კონტინგენტს გაზრდის.

ლალი პაპასკირი

Ambebi.ge