იური ლუჟკოვი სექტემბერში საქართველოში ჩამოსასვლელად ემზადება

მოსკოვის ყოფილი მერი საქართველოში ჩამოსვლას სექტემბერშიც გეგმავს, რადგან მეგობრის შვილიშვილის ქორწილშია დაპატიჟებული. ამის შესახებ ლუჟკოვმა "რია ნოვოსტის" განუცხადა.

"საერთოდაც, ჩემს საყვარელ საქართველოში სექტემბერში კიდევ ერთხელ ვაპირებ ჩასვლას. დაპატიჟებული ვარ ჩემი ახლობელი ქართველის შვილიშვილის ქორწილში. მინდა, რომ მეუღლესთან, ოჯახთან ერთად ვნახო ქართული ქორწილი. ეს საინტერესოა, ეს ყოველთვის მასშტაბური და ლამაზია. თუკი ეს არ გამოვა საქართველოს ხელისუფლების ქმედებების გამო, ვფიქრობ, რომ დავიცდით - დავუცდით სხვა დროებს, ისინი აუცილებლად იქნება და ასეთ ველურ გადაწყვეტილებებს, ვფიქრობ, ბოლოს და ბოლოს, საქართველოს ხელმძღვანელობა არ მიიღებს და არც უნდა მიღოს", - განუცხადა "რია ნოვოსტის" ლუჟკოვმა.

მოსკოვის ყოფილმა მერმა ასევე აღნიშნა, რომ ამჟამინდელი გადაწყვეტილება მისი "შავ სიაში" ჩასმის შესახებ "სცდება გონივრულს, ტრენდს, რომელიც დღეს არსებობს საქართველოსა და რუსეთს შორის ურთიერთობების განვითარებაში".