13
ივლისიდღის ზოგადი ასტროლოგიური პროგნოზი
აშშ-ის პრეზიდენტმა დონალდ ტრამპმა გამოძიების ფედერალური ბიუროს დირექტორი ჯეიმს კომი დაითხოვა. პრეზიდენტმა აღნიშნა, რომ კომი ორგანიზაციას ეფექტურად ვეღარ მართავს.
"მნიშვნელოვანია, ვიპოვოთ ახალი ხელმძღვანელი, რომელიც გამოძიების ფედერალური ბიუროს მიმართ საზოგადოების ნდობას აღადგენს," - ნათქვამია წერილში, რომელიც პრეზიდენტმა ჯეიმს კომის გაუგზავნა. აღნიშნული წერილი თეთრმა სახლმა გაავრცელა.
თეთრი სახლის პრეს-სპიკერმა შონ სპაისერმა აღნიშნა, რომ პრეზიდენტს გამოძიების ფედერალური ბიუროს დირექტორის გათავისუფლება გენერალურმა პროკურორმა ჯეფ სეშენმა და მისმა მოადგილემ როდ როზენსტინმა ურჩიეს. სპაისერის განცხადებით, ბიუროს ახალი დირექტორის ძებნა დაუყოვნებლივ დაიწყება.
ჯეიმს კომის თანამდებობიდან გათავისუფლების შესახებ განცხადებაში აღნიშნულია, რომ გადაწყვეტილება დაუყოვნებლივ შედის ძალაში. განცხადებაში, ასევე, ხაზგასმულია, რომ დონალდ ტრამპმა კომის გათავისუფლების შესახებ რეკომენდაცია აშშ-ის გენერალური პროკურორისა და მისი პირველი მოადგილისგან მიიღო.
"ძალიან ვაფასებ, რომ სამჯერ შემატყობინეთ, რომ ჩემს წინააღმდეგ გამოძიება არ მიმდინარეობს, თუმცა, ვეთანხმები იუსტიციის სამინისტროს, - თქვენ არ შეგიძლიათ ეფექტურად უხელმძღვანელოთ გამოძიების ფედერალურ ბიუროს. აუცილებელია, ახალი ხელმძღვანელის მოძებნა, რომელიც აღადგენს საზოგადოების ნდობას FBI-სადმი, რაც სასიცოცხლოდ მნიშვნელოვანია სამართალდამცველი ორგანოსთვის", - აღნიშნულია ტრამპის განცხადებაში.
ჯეიმს კომი აშშ-ის გამოძიების ფედერალური ბიუროს დირექტორად 2013 წელს, ბარაკ ობამას ადმინისტრაციის დროს, 10 წლის ვადით დაინიშნა. კომი აშშ-ის ისტორიაში FBI-ის მეორე დირექტორია, რომელიც თანამდებობიდან ვადაზე ადრე გაათავისუფლეს.
Politico-სა და New York Times-ის ცნობით, კომის თანამდებობიდან გათავისუფლების შესახებ, მისთვის ტრამპს არც დაურეკავს, როგორც ამას ეტიკეტი ითვალისწინებს. ცნობა ტელევიზიით გაიგო. იმ დროს, როდესაც ის ლოს-ანჯელესში FBI-ის აგენტებს სიტყვით მიმართავდა. გამოცემების ცნობით, კომის ამ ინფორმაციაზე გაეღიმა, რადგან თავდაპირველად ხუმრობა ეგონა და აღნიშნა, რომ კარგად იხუმრეს...
საქმე ის არის, რომ წინასაარჩევნო პერიოდში დონალდ ტრამპმა ჯეიმს კომი ჰილარი კლინტონის ელექტრონული ფოსტის საქმის გამოძიების პროცესის ეფექტურად წარმართვისთვის არაერთხელ შეაქო. ამიტომაც, ეს დასავლურ საზოგადოებაში ბევრისთვის მოულოდნელი იყო.
არსებობს კიდევ ერთი ვერსია, რომლის თანახმადაც, აშშ-ის დემოკრატიული პარტიის წევრები კომის გათავისუფლებას, FBI-ის მიერ დონალდ ტრამპისა და რუსეთის სავარაუდო კავშირების შესახებ გამოძიებას უკავშირებენ.
ოპოზიცია არასაიმედოდ მიიჩნევს კომის გათავისუფლების ოფიციალურ ვერსიას. სენატის უმცირესობის ლიდერი ჩაკ შუმერი აცხადებს, რომ მან ტრამპთან საუბარში ამ ფაქტს შეცდომა უწოდა. მისი თქმით, თუ კომის გათავისუფლება ნამდვილად "კლინტონის მეილების საქმეს" უკავშირდება, მაშინ მას ტრამპის ინაუგურაციის მეორე დღესვე გაათავისუფლებდნენ. Politico-ს თქმით, კომი, პარალელურად აწარმოებდა გამოძიებას რუსეთისა და ტრამპის ურთიერთობაზე. გამოცემის ინფორმაციით, სენატის დაზვერვის კომიტეტის ხელმძღვანელის, რიჩარდ ბერის თქმით, კომი მზად იყო რუსეთისა და ტრამპის საქმის გამოძიებისთვის, მაღალი დონის პირებისგანაც მიეღო ინფორმაცია, სწორედ ამან გამოიწვია ტრამპის უკმაყოფილება.
"ტრამპმა არაერთხელ განაცხადა, რომ კომის უწყებიდან მედიაში სხვადასხვა დროს სხვადასხვა მნიშვნელობის ინფორმაცია ჟონავდა. მაგალითისთვის, საკმარისია ჩემი ყოფილი მრჩევლის, მაიკლ ფლინის საქმე, რომელიც ამ საქმის გამო გადადგა" - წერს Politico და მიაჩნია, რომ ტრამპმა მის მოსაშორებლად ასეთი გამოსავალი იპოვა.
ჰილარი კლინტონი აშშ-ს საპრეზიდენტო არჩევნებში დამარცხებას გამოძიების ფედერალური ბიუროს ხელმძღვანელს, ჯეიმს კომის უკავშირებდა და ამბობდა, რომ კომის წერილმა მისი რეიტინგი მკვეთრად დააგდო...
კლინტონის იმეილების საქმე 2015 წლის მეორე ნახევარში დაიწყო. გამოძიების ცნობით, კლინტონი სახელმწიფო მდივნობის პერიოდში (2009-13), სამსახურებრივი მიმოწერისას დაცული იმეილის სერვერის ნაცვლად, კერძო სერვერს იყენებდა. კანონის მიხედვით კი აშშ-ში თანამდებობის პირები ვალდებულები არიან, სამსახურებრივი მიმოწერა, დაცული ელექტრონული სერვერიდან აწარმოონ და არა - პირადიდან. თუმცა, გამოძიება 2016 წლის ივლისში, ბრალის წარდგენის გარეშე შეწყდა. საპრეზიდენტო არჩევნებამდე ორი დღით ადრე, 6 ნოემბერს კომიმ განაცხადა, რომ კლინტონის ელექტრონულ წერილებში კრიმინალის ნიშნები არც ახლა გამოიკვეთა.
როგორც თეთრი სახლის განცხადებაშია აღნიშნული, ისინი დაუყოვნებლივ დაიწყებენ FBI-ის დირექტორის კანდიდატურის შერჩევას.
ლალი პაპასკირი
AMBEBI.GE
დასაზუსტებელია თუ 2013 წელს 10 წლის ვადით დაინიშნა, ანუ 2023 წელს გასვლია ვადა და მაშინ რატომ გამოდის რომ ვადამდე არის განთავისუფლებული?