"ამ სეზონზე ჯერ არავის გავულანძღივარ..." - ამართლებს თუ არა ნინო მუმლაძე "ნათიას" საქციელს

"ჩემი ცოლის დაქალებში", ბოლო სერიებში აქტიურად ჩანს ქალი, რომელსაც სერიალის მთავარი გმირისგან - დათო გოცირიძისგან შვილი ჰყავს. ნათია მძიმედ დაავადებულია, ასე რომ, ვეღარც მუშაობს, ყველამ ზურგი აქცია, დამოუკიდებლად შვილსაც ვეღარ უვლის, არადა, მის გოგონას დახმარება სჭირდება და მასზე მატერიალური მზრუნველობა, როგორც ბავშვის მამამ, დათომ აიღო თავის თავზე.

დათოს ცხოვრებაში ძველი საყვარლის ხელახლა გამოჩენამ სერიალის ერთგულ მაყურებლებში გაღიზიანება და უკმაყოფილება გამოიწვია - სოციალურ ქსელშიც გაჩნდა კომენტარები - "ეს ნათია მოაშორეთ!"; "ვინც დათოს ამართლებთ, ღირსი ხართ ათი ნათიასნაირი გეჯდეთ სახლში"; "ასე არ უნდა იქცეოდეს..."; "თავი დაანებოს მრავალშვილიან მამას" და ა.შ...

AMBEBI.GE ნათიას როლის შემსრულებელს, მსახიობ ნინო მუმლაძეს ესაუბრა:

"თუ მაყურებელში მართლა გაღიზიანება და მითქმა-მოთქმა გამოიწვია, ე.ი. მიზანს მივაღწიეთ - სერიალის მიზანიც ხომ სწორედ ეს არის, გამოიწვიოს ინტერესი, გახდეს განხილვის საგანი... ხოლო თუ შენი გამოჩენა, თამაში სერიალში უკვალოდ ჩაივლის, მსახიობმა მაშინ უნდა იდარდო", - გვეუბნება ნინო.

- მაყურებელი ხშირად გმირებთან მსახიობსაც აიგივებს. რეალურ ცხოვრებაშიც თქვენი პერსონაჟის გამო ხომ არ გამოუთქვამს ვინმეს თქვენთვის საყვედური? ...თუმცა სასაყვედურო რა გაქვთ, ისე დამაჯერებლად თამაშობთ, მაყურებლის რეაქციებიც ამაზე მეტყველებს.

- მადლობა კომპლიმენტისთვის და გეთანხმებით იმაში, რომ ხანდახან ადამიანები მსახიობს პერსონაჟიდან გამომდინარე აღიქვამენ, ჰგონიათ, რომ ცხოვრებაშიც ასეთები ვართ... ეს ჩვენთვის კომპლიმენტია და იმაზე მიუთითებს, რომ ვიღაცისთვის ეკრანზე დამაჯერებელი ვჩანვარ. რაც შეეხება პრეტენზიებს, ამ სეზონზე პირადად ჯერ არავის გავულანძღივარ... თუმცა სერიალში თავიდან რომ გამოვჩნდი, მაშინ უფრო "მერჩოდნენ".

- ასეთ ქალებს როგორ აფასებთ, კონკრეტულად კი საკუთარი გმირის საქციელს? საყვედურობთ ნათიას იმ ნაბიჯს, რომ დათოს მიმართ ისევ გრძნობა გამოავლინა და მასთან სიახლოვეს ისევ ცდილობს?

- ვიცით, რა არის კარგი და რა - ცუდი, რა არის დასაშვები და რა - არა, თუმცა ყოველთვის ვცდილობ, პირადი ცხოვრების, თუ არჩევანის გამო არავის ვუსაყვედურო, რადგან პირადი ცხოვრება ადამიანის პირადი საქმეა... გვერდიდან ყოველთვის ყველაფერი სხვანაირად ჩანს. არასოდეს არავინ იცის, რა უტრიალებს მეორე ადამიანს გულში, თუ გონებაში. ამიტომ თუ არ მეკითხებიან, მსგავს საქმეში რჩევის მიცემასაც კი ვარიდებ თავს. საერთოდ, ვფიქრობ, ადამიანები რაც ნაკლებად ჩავყოფთ ცხვირს სხვის ცხოვრებაში, მით ბედნიერები ვიქნებით ყველანი...

- შეიძლება ნათიას გამართლება?

- თუ ნათიას ქცევას გამართლება აქვს, ეს მხოლოდ მისი გრძნობებია, რომელიც რეალურად აქვს დათოს მიმართ. მით უმეტეს, იმ რეალობაში, რომელშიც ამჟამად ის არის: ყველამ ზურგი შეაქცია, ვერც მუშაობს, რეალიზებულიც აღარ არის, დეპრესიაშია, დედის გარდა აღარავინ ზრუნავს მასზე, რომელიც თან, სულ აკრიტიკებს... სწორედ ამ დროს გამოჩნდა დათო, კაცი, რომელიც მართლა უყვარდა, მისგან შვილი ჰყავს, რომელმაც მზრუნველობა და ყურადღება არ მოაკლო, დეპრესიიდან გამოიყვანა... ბუნებრივია, რომ ასეთ დროს ნათიას ისევ დაუბრუნდა გრძნობა და ისევ მოუნდა საყვარელი მამაკაცის გვერდით ყოფნა. დათო ამ ეტაპზე მის ცხოვრებაში ერთადერთი ნათელი სხივია...

- ამ სერიალს ზოგადად რა ადგილი უკავია თქვენს ცხოვრებაში, მიუხედავად იმისა, რომ მასში ხანგრძლივი პაუზებით ჩნდებით?

- ის ჩემთვის ერთ-ერთი სამსახურია, რომელშიც ყოველთვის დიდი სიამოვნებით მივდივარ. სწორედ ის შემთხვევაა, როცა სამუშაო დიდ სიამოვნებას მანიჭებს...

- თქვენი უშუალო პარტნიორი ლევან ყოჩიაშვილია... როგორია მასთან მუშაობა? და აქვე სესილია წულუკიძეზეც (სერიალში ნათიას შვილი) ვისაუბროთ, რომელიც თეატრმცოდნე ნიკა წულუკიძის გოგონაა...

- თამამად შემიძლია ვთქვა, რომ ჩემს სამსახიობო გამოცდილებაში ლევან ყოჩიაშვილი არის ყველაზე კომფორტული პარტნიორი. პროფესიონალია, ყველაფერს ძალიან დიდი პასუხისმგებლობით ეკიდება და ყოველთვის ცდილობს, პარტნიორსაც მაქსიმალური კომფორტი შეუქმნას, რაც ნამდვილად დიდი იშვიათობაა. მოკლედ, ძალიან გამიმართლა პარტნიორში, "ყოჩისთან" მუშაობა, ყოველთვის დიდი სიამოვნებაა. იგივე შემიძლია ვთქვა პატარა უსაყვარლეს სესილიაზე. სანამ სესილიას მივაგნებდით, ჩემი შვილის როლი ბევრმა ბავშვმა მოირგო. აქაც სრული პასუხისმგებლობით ვამბობ, რომ ასეთი უპრობლემო ბავშვი გადასაღებ მოედანზე მეორე არ არსებობს. ძალინ ჭკვიანი გოგოა, ყველა დავალებას ზუსტად ასრულებს და ხანდახან, როცა "აბრატკას" ვიღებთ, ქმედებებს ზუსტად იმეორებს - მოკლედ, ისე კარგად მუშაობს ეს 2 წლის ციცქნა, ბევრ ზრდასრულ მსახიობს რომ შეშურდება...

- გარეგნულად შეცვლილი ხართ. წონაში საგრძნობლად დაიკელით. ეს რისი შედეგია: ჯანსაღი კვების, კონკრეტული დიეტის, თუ ვარჯიშის?

- დიახ, წონაში დავიკელი და კიდევ ვაპირებ. ამაში ძალიან კარგი ექიმი, ენდოკრინოლოგი ნინო ჯიქურაული მეხმარება, რომელიც ენდოკრინოლოგიის ინსტიტუტში მუშაობს. თუ ადამიანი მოტივირებულია და რეალურად უნდა დაკლება, ამაოდ არაფერი ჩაივლის. ზოგადად კი მხოლოდ იმის თქმა შემიძლია, რომ პოპულარული დიეტების გამოყენება, უმეტეს შემთხვევაში, ვნებს ჯანმრთელობას, უმჯობესია პროფესიონალს მიმართოთ და თქვენს ორგანიზმზე მორგებული კვების რეჟიმი დაიცვათ. წონასთან ბრძოლის მრავალწლიანმა გამოცდილებამ დამარწმუნა, რომ ეს ერთადერთი სწორი გზაა.

- შემოქმედებითად რა სიახლეებია თქვენს ცხოვრებაში?

- ამ ეტაპზე მხოლოდ ნოდარ დუმბაძის სახელობის მოზარდ მაყურებელთა თეატრში ვარ. ძალიან მიყვარს ჩემი "მოზარდი" და გული მწყდება, რომ საღამოს, ანუ ზრდასრულებზე გათვლილ სპექტაკლებზე მაყურებელი ნაკლებად დადის. მინდა დაგარწმუნოთ, რომ ჩვენს თეატრში მართლა ძალიან კარგი საღამოს სპექტაკლებია, რომლის ხილვასაც მთელი გულით გირჩევთ. არაჩვეულებრივი დასი და მეგობრული გარემო ძალიან მაბედნიერებს, რაც ასევე იშვიათობაა თეატრალურ დასებში და ეს ყველაფერი, რა თქმა უნდა, ჩვენი სამხატრო ხელმძღვანელის ბატონი დიმიტრი ხვთისიაშვილის დამსახურებაა. ამ ეტაპზე გასტროლისთვის ვემზადებით, ძალიან კარგი რუსულენოვანი ზღაპარი - "სამეფო ძროხა" მიემგზავრება ბაქოში (რეჟისორი გურამ ბრეგაძე). ეს ჩემი ერთ-ერთი უსაყვარლესი სპექტაკლია, სადაც დიდი სიამოვნებით, ფრეილინას როლს ვასრულებ. ზაფხულშიც ველოდებით გასტროლებს.

კიდევ დიდი გულის ფანცქალით ველოდები დიმიტრი ცინცაძის ფილმის - "43"-ის პრემიერას, სადაც პატარა როლი შევასრულე. პირველად ვიმუშავე ამ არაჩვეულებრივ რეჟისორთან და მოხიბლული ვარ მისი პროფესიონალიზმით, მიდგომით გადასაღები პროცესის მიმართ. ვფიქრობ, ქართველ მაყურებელს ძალიან საინტერესო ფილმი ელის. ჩემი შემოქმედებითი ცხოვრება ამ ეტაპზე სულ ეს არის. დიდი სურვილი მაქვს, წამყვანის ამპლუას ისევ დავუბრუნდე, თუმცა ჯერჯერობით ვერ ხერხდება... იმედია, გამიმართლებს და ახალი სეზონიდან კვლავ მოგესალმებით ტელეეკრენიდან.

ლალი ფაცია

AMBEBI.GE