ვინ არიან "პუტინის მგლები" და როგორ ექცევიან მათ საქართველოსა და სხვა ქვეყნებში

უკვე მერამდენე წელია, 9 მაისისთვის საქართველოში "პუტინის მგლების" შემოსვლასთან დაკავშირებით საზოგადოების დიდი ნაწილი პროტესტს გამოთქვამს. თუმცა, ამის მიუხედავად, "რუსეთ-საქართველოს ახალგაზრდული კავშირი" ბაიკერებს საქართველოში ეპატიჟება, თანაც ხელისუფლებისგან რუსი ბაიკერებისთვის უსაფრთხოების გარანტიებს ითხოვს...

არაერთმა ევროპულმა სახელმწიფომ, მათ შორის პოლონეთმა ასევე არაერთხელ უთხრა "ღამის მგლებს" უარი ქვეყანაში შესვლაზე, თუმცა, ისინი ყოველწლიურად მცდელობას მაინც განაგრძობენ...

"რუსეთ-საქართველოს ახალგაზრდული კავშირის" წარმომადგენელი ირაკლი ყიფიანი ამბობს, რომ "ღამის მგლებთან" მუშაობა მიმდინარეობს: "ჩვენი ორგანიზაციის წევრები, რამდენჯერმე მოსკოვშიც ვიყავით ჩასული. ისინი აბსოლუტურად მზად არიან და ძალიან უნდათ საქართველოში ჩამოსვლა, რადგან, ძალიან მეგობრულად არიან განწყობილი. ამიტომ, მე რამდენჯერმე ვთხოვე საქართველოს მთავრობას და რამდენიმე სტრუქტურას კონკრეტული გარანტიები, რათა საზოგადოების 1%-ს, მიშა სააკაშვილის ნარჩენებს, რაღაც პრობლემა არ შეექმნათ... მუშაობა გრძელდება და ძალიან მალე გადაწყდება მათი ჩამოსვლის ამბავიც".

კონკრეტულად რომელ უწყებებს სთხოვს გარანტიებს, ყიფიანი არ აკონკრეტებს, რადგან მისივე თქმით, შესაძლოა, მათზე საზოგადოებისგან ზეწოლა განხორციელდეს, რამაც ღონისძიების ჩაშლა გამოიწვიოს. ყიფიანი ამბობს, რომ ამ ღონისძიების რუსეთიდან 35-მდე პირის ჩამოყვანა იგეგმება. მათ შორის შესაძლოა იყოს რუსი ბაიკერი ალექსანდრ ზალდასტანოვი - მეტსახელად "ქირურგი".

"ალექსანდრ ზალდასტანოვსაც ძალიან უნდა ჩამოსვლა, ძალიან უყვარს ქართველები და ძალიან უყვარს საქართველო. რამდენიმე დღეა ვსაუბრობთ და უკვე ტექნიკურ დეტალებს ვაზუსტებთ. შანსი დიდია მისი ჩამოსვლისაც, რატომაც არა, მით უმეტეს, 9 მაისს?!" - ამბობს ყიფიანი.

ბაიკერები საქართველოში 2015 წელსაც იყვნენ. მათი ვიზიტი კიდევ უფრო მძაფრი და შეუარცხმყოფელი ე.წ. "გეორგიევსკის ლენტებმა" გახადა, რომელსაც პოსტსაბჭოთა ქვეყნების საზოგადოების ნაწილი აპროტესტებს და საბჭოთა ოკუპაციის სიმბოლოსთან აიგივებს. ორფეროვანი ლენტი იმპერიალისტური რუსეთის რწმენას და დიდი რუსეთის დაბრუნების იდეას გამოხატავს.

არაერთ ევროპულ ქვეყანში აკრძალვის მიუხედავად, ყოველწლიურად, პუტინის მეგობარი რუსი ბაიკერები, ყველა იმ ქვეყანაში, სადაც შესვლას მოახერხებენ, მოტოგარბენს აწყობენ, მიზანი კი "ფაშიზმზე გამარჯვების დღის" ბერლინში აღნიშვნაა.

რას წარმოადგენს კლუბი "ღამის მგლები" და ვინ არის ქირურგი?

ვინ არიან, "ღამის მგლები", - ეს არის, რუს ბაიკერთა კლუბი, რომელიც საბჭოთა კავშირში 1989 წელს შეიქმნა. "კლუბი" თავდაპირველად 15 ადამიანისგან შედგებოდა. შემდეგ კი, თანდათანობით, მათი რაოდენობა გაიზარდა, ისევე, როგორც, - დაფინანსება. "პუტინის მგლების" დაფინანსებას რუსეთის პრეზიდენტი ქვეყნის ბიუჯეტიდან უზრუნველყოფს, რადგან მიაჩნია, ეს ბიჭები საერთაშორისო საზოგადოების "ცნობიერების ამაღლებასა და განათლებაზე" ზრუნავენ.

2007 წლიდან კლუბის ბაიკერებს სათავეში, კიროვოგრადელი ალექსანდრ ზალდოსტანოვი, იგივე "ქირურგი" ჩაუდგა. ექიმების ოჯახში დაბადებული ზალდასტანოვი, პროფესიით თავად ექიმია, მამამისი მედიკოსი იყო, მეორე მსოფლიო ომის მონაწილე... "ქირურგის" თქმით, სწორედ მამის მეორე მსოფლიო ომში მონაწილეობას უძღვნის ის ამ ღონისძიებას, მამასა და ყველა მის თანამებრძოლ წითელარმიელს.

ალექსანდრ ზალდასტანოვს მეტსახელად "ქირურგი" ძველი პროფესიის გამო შეარქვეს. ყოფილი მედიკოსი პუტინის ახლო მეგობარია და ამის გამო, რუსეთსა და მის მოკავშირე ქვეყნებში დიდი გავლენით სარგებლობს.

ზალდასტანოვმა მოსკოვის სამედიცინო უნივერსიტეტი დაამთავრა, სპეციალობით ქირურგი-სტომატოლოგია. თუმცა, ბაიკერობა თავიდანვე იზიდავდა, - როგორც თავად ამბობს, დღე თეთრი ხალათი ეცვა, ღამე კი, - შავი ტყავის ქურთუკი და "მძიმე მეტალს" უსმენდა...

მას ცოლად გერმანელი ჟურნალისტი, შტუტგარდის "მერსედეს-ბენცის" ქარხნის დირექტორის ქალიშვილი ჰყავდა, მაგრამ მალევე დაშორდნენ... თუმცა, როგორც თავად ამბობს, მანქანებთან, კონკრეტულად მოტოციკლთან ურთიერთობა, მანევრი და სწრაფი ტარება, სწორედ შტუტგარდში ისწავლა... რუს-გერმანელ წყვილს ერთი საერთო შვილი ჰყავთ, გოშა, თუმცა, როგორც თავად ყოფილი ცოლი ამბობს, "ქირურგს" მის შემდეგ არაერთი ცოლი და საყვარელი და შესაბამისად, შვილები ჰყავს...

მსოფლიოში ბაიკერებს ხულიგნების რეპუტაცია აქვთ და უარყოფის მიუხედავად, არც პოლიტიკურ აქტივობებზე იხევენ უკან. თუმცა კი, მუდმივად აცხადებენ, რომ პოლიტიკური და თუნდაც, საზოგადოებრივი ცხოვრებისგან შორს არიან, თუ არ ჩავთვლით ფაშიზმზე გამარჯვების სიმბოლურ თარიღს. სინამდვილეში, " მართლმადიდებელი ბაიკერები" არიან და იმ მარშრუტს გადიან, რაც საბჭოთა არმიამ მეორე მსოფლიო ომის დროს გაიარა...

კლუბში მართლაც იყიდება მართლმადიდებლური სიმბოლოები და ტანისამოსიც, რაც რუსეთის პატრიარქ კირილეს პატრონაჟით ხორციელდება.

2011 წელს ვლადიმერ პუტინმა ზალდასტანოვი "ახალგაზრდების განმანათლებელი პატრიოტული ქმედებების" გამო ღირსების ორდენით დააჯილდოვა. ორდენოსანი "ქირურგი" პროპაგანდისტული ტელეარხის "ზვეზდას" დირექტორთა საბჭოს წევრია და აქტიურად მონაწილეობს ანტიუკრაინულ მოძრაობაში.

54 წლის ზალდასტანოვი ბაიკერ-ცენტრის მფლობელია, რომელშიც შედის, ღამის კლუბი "სექსტონი", ბარ-რესტორანი, საცეკვაო დარბაზი, ლაუნჯ ზონა და სასტუმრო, რომელსაც საკმაოდ სოლიდური შემოსავალი მოაქვს...

"ღამის მგლები", აქტიურად უჭერდნენ მხარს უკრაინაში რუსეთის აგრესიულ პოლიტიკას, რის გამოც მათ იქ ჩასვლა აეკრძალათ. ამავე მიზეზით, 2014 წელს აშშ-მ, როგორც "ღამის მგლებს", ასევე, პერსონალურად ზალდასტანოვს ეკონომიკური სანქციები დაუწესა. 2015 წლის თებერვალში კი "ქირურგს" კანადაში შესვლა აეკრძალა.

2015 წელს, როდესაც "ღამის მგლები" ჰიტლერზე გამარჯვების 70 წლისთავის აღსანიშნავად მოსკოვიდან ბერლინის მიმართულებით დაიძრნენ, მათ სლოვაკეთისა და ავსტრიის ტერიტორიაზე შესვლა შეძლეს, თუმცა, ბერლინისკენ მიმავალი ბაიკერები პოლონეთმა საკუთარ საზღვარზე არ შეუშვა. გერმანიამ კი ვიზები გაუუქმა.

2016 წლის მაისში "ქირურგი" "ღამის მგლებთან" ერთად, 9 მაისის აღსანიშნავად ჩეხეთში ჩავიდა, სადაც მათი ვიზიტის წინააღმდეგ შეკრებილმა მოქალაქეებმა ის და მისი თანაგუნდელები სასტიკად სცემეს.

ლალი პაპასკირი

AMBEBI.GE