28
მარტიდღის ზოგადი ასტროლოგიური პროგნოზი
...მდიდარი ვაჭარი მაკარი გადაწყვეტს, ულამაზესი ქალიშვილი - ქეთო, დიდგვაროვანს მიათხოვოს. თავად ლევანს მაჭანკალს მიუგზავნის, თავადი ვაჭართან დამოყვრებას იუკადრისებს, მაგრამ მევალეებით შეწუხებული, მდიდარი საპატარძლოს ნახვას მაინც დათანხმდება...
ქეთოზე შეყვარებული კოტე, თავადი ლევანის ძმისშვილი მაჭანკალ ხანუმას დახმარებას სთხოვს... საპატარძლოდ გამოწყობილი ხანუმა სტუმრების წინაშე ქეთოს ნაცვლად წარსდგება და თავგზას აუბნევს საზოგადოებას. მახინჯი პატარძლის ხილვით გამოწვეული აურზაურით კი შეყვარებული წყვილი - ქეთო და კოტე ისარგებლებს და სასწრაფოდ ჯვარს იწერს... - ეს ყველასთავის საყვარელი ქართული მხატვრული ფილმი "ქეთო და კოტეს" (რეჟისორი ვახტანგ ტაბლიაშვილი) სიუჟეტია.
ფილმში ქართული კინოს არაერთი ცნობილი და ლეგენდარული მსახიობი მონაწილეობს, თავადი ლევანის როლს კი ოპერის ღვაწლმოსილი და დამსახურებული მომღერალი, ბარიტონი პეტრე ამირანაშვილი თამაშობს, რომელსაც წელს 110 წელი შეუსრულდებოდა...
პეტრე ამირანაშვილი 1930 წლიდან თბილისის ოპერისა და ბალეტის თეატრის სოლისტი გახლდათ და დიდი წვლილი მიუძღვის ქართული საოპერო ხელოვნების ჩამოყალიბება-განვითარების საქმეში. მან აგრეთვე ხელი შეუწყო ქართველი კომპოზიტორების ახალი ოპერების წინსვლას... ამირანაშვილი წარმატებით გამოდიოდა მოსკოვის, ლენინგრადის, კიევის, მინსკისა და საერთოდ, საბჭოთა სივრცის არაერთ ქალაქში, ასევე ევროპის საოპერო სცენებზე. პედაგოგიურ მოღვაწეობას ეწეოდა თბილისის კონსერვატორიაში და როგორც ვთქვით, მის შემოქმედებით ბიოგრაფიაში ღირსეული ადგილი დაიკავა კინოში ("ქეთო და კოტე") შესრულებულმა თავადი ფანტიაშვილის სახემ (1948 წელი).
პეტრე ამირანაშვილის ქალიშვილია ქართული ოპერის დამსახურებული ვარსკვლავი, ლირიკული სოპრანო მედეა ამირანაშვილი. აი, რას ჰყვება ქალბატონი მედეა მამაზე, რომელიც ფართო მაყურებელმა უმეტესად მაინც ფილმიდან გაიცნო:
"მამაჩემი ოცნებობდა, სცენაზე ჩემი და მისი წარდგენისას ასე გამოეცხადებინათ, - საქართველოს სახალხო არტისტები, პეტრე და მედეა ამირანაშვილები... მამა 1976 წლის 29 ნოემბერს გარდაიცვალა და მე კი ეს წოდება იმავე წლის 31 დეკემბერს მივიღე. ჯილდო ედუარდ შევარდნაძემ, საქართველოს ცკ-ს მაშინდელმა მდივანმა პირადად მომილოცა. ჩვენთან სახლში დარეკა - მედიკო გილოცავ, შენ მიიღე სახალხო არტისტის წოდება! თავი ვერ შევიკავე და ტირილი დავიწყე - რატომ ტირიო? - მკითხა. მამა ამას ასე ნატრულობდა და ვერ მოესწრო-მეთქი. მანუგეშა, - რას იზამ, ასეთია ცხოვრებაო!
იხილეთ მედეა ამირანაშვილის ბლიც-ინტერვიუ
მამაჩემი გარდა იმისა, რომ ქართული ოპერის კაშკაშა ვარსკვლავი იყო, ფართო მაყურებელი უკვდავი ფილმიდან "ქეთო და კოტე" იცნობს, სადაც თავადი ლევანის როლს თამაშობს. როდესაც რეჟისორი ვახტანგ ტაბლიაშვილი ამ ფილმისთვის პერსონაჟს ეძებდა, სრულიად სხვა არტისტი ჰყავდა შერჩეული, მაგრამ მამა რომ გასინჯა, როლზე ულაპარაკოდ დაამტკიცა: კიდეც ითამაშებ და კიდეც იმღერებო. მოგეხსენებათ, ფილმი მუსიკალურია...
მამა საოცარი მომღერალი და არტისტი იყო. არაჩეულებრივ გარეგნობასთან ერთად, ასეთივე ვოკალი, ხმა ჰქონდა. მის მურმანს, კიაზოს, რიგოლეტოს გრანდიოზული წარმატება ხვდა ყველგან. ბევრს მოგზაურობდა გასტროლებით და ხალხი აღფრთოვანებით ხვდებოდა. საქართველოს მასშტაბით ტურნეები გამორჩეულად უყვარდა... ბავშვობა იმერეთში ჰქონდა გატარებული, რასაც ხშირად იგონებდა ხოლმე, - ერთხელ ვაშლის მოსაპარად ბავშვები ხეზე ასულან, პატრონის დანახვაზე ყველა გაქცეულა, ის ხეზე დარჩენილა. ვაშლის პატრონს წინადადება მიუცია - თუ იმღერებ, გაგიშვებო. პეტრესაც უმღერია და პირდაპირ ხეზე მჯდომი, ვაშლით სავსე კალათით დაუსაჩუქრებიათ...
სცენაზე მამის პარტნიორი ხშირად ვყოფილვარ, რაც მას ძალიან სიამოვნებდა და ხომ ვამბობ, ეამაყებოდა კიდეც... მაყურებელს ძალიან უყვარდა ის და სცენაზე ყოველთვის დიდი აჟიოტაჟით ხვდებოდნენ, მაგრამ "ქეთო და კოტემ" მაყურებლის გამორჩეული სიყვარული და პატივისცემა მოუტანა. ფილმში მეც ძალიან მომწონს მამა. შესანიშნავად ითამაშა... ის წელს 110 წლის გახდებოდა..."
ლალი ფაცია
AMBEBI.GE
