"ჭაში წყალი ადუღდა, ორი დღე ცხელი წყალი ამოჰქონდა ხალხს" - რას ჰყვებიან აფხაზეთში მომხდარ სასწაულებზე ადგილობრივები

ოკუპირებულ აფხაზეთში მცხოვრებნი ბოლო დღეებია უჩვეულო ფაქტების შესახებ ყვებიან. გალი, ჭუბურხინჯი, ოქუმი, მზიური, გაგრა, სოხუმი, ათონი, ბედია - ეს იმ ქალაქებისა თუ სოფლების მცირე ჩამონათვალია, რომელშიც ადგილობრივების მტკიცებით აღდგომის დღესასწაულის შემდეგ სასწაულები ხდება.

ვრცელდება ფოტოები და თვითმხილველები ამბობენ, რომ მათზე ასახულია, როგორ გამოისახა ფანჯრების მინებზე წმინდანები, ბედიაში კი ჭიდან ცხელი წყალი მოედინება.

სასწაული პირველად გალში ქეცბაიების ოჯახში მოხდა. ადგილობრივების თქმით, ფანჯარაზე ღვთისმშობელი გამოისახა. შემდეგ მამა გაბრიელისა და წმინდა გიორგის გამოსახულებები იხილეს სხვადასხვა სოფლებში, სხვადასხვა ოჯახის სახლის ფანჯრებზე.

AMBEBI.GE ჭუბურხინჯის მცხოვრებს ნანა რუსიას დაუკავშირდა, რომელმაც აფხაზეთის ტერიტორიაზე მიმდინარე მოვლენების შესახებ ისაუბრა.

- აფხაზეთში სასწაულები ხდება, მაგრამ ეს კარგის მომასწავებელია თუ ცუდის, არ ვიცით. პირველი სასწაული გალში ქეცბაიების ოჯახში დაფიქსირდა, ფანჯრის მინაზე ღვთისმშობელი მარიამი გამოისახა. ადგილზე სასულიერო პირებიც იმყოფებოდნენ, იმ ეზოში 200-წლიანი მუხაა, ამიტომ სასულიერო პირებმა გამოთქვეს ვარაუდი, რომ ამ ადგილზე შესაძლოა ადრე ტაძარი ყოფილიყო, თუმცა სხვა სოფლებშიც როცა დაფიქსირდა ასეთი ფაქტები, ვეღარ გავიგეთ რასთან გვაქვს საქმე.

ჩვენ აფხაზეთში ვცხოვრობთ და მშვიდობის მეტი არაფერი გვინდა, მშვიდობა გვწყურია და ღმერთმა გვისმინოს, ასეც იყოს. სასწაული მხოლოდ ერთ ოჯახში არ დაფიქსირებულა. ხალხი მოდის, ლოცულობს და ვისაც სწამს, სჯერა რომ ეს სასწაულია.

- თქვენს ოჯახში რა სასწაული მოხდა?

- კვირაცხოვლობას ეზოში ვიყავი, შევნიშნე, რომ ფანჯარაზე ცისფერი ზოლი გაჩნდა, მერე რაღაც ალივით გამოისახა, ბავშვს დავუძახე და ზუსტად 15 წუთში მინაზე მამა გაბრიელი გამოისახა, რომელიც დღემდე არის ჩემს ფანჯარაზე. ღვთის წყალობით სამსახურიც მაქვს, ოჯახშიც ყველა ჯანმრთელად არის და ამიტომ კონკრეტულად ვერაფერს დავუკავშირებ ამ სასწაულს. ვერაფერს ვეღარ ვამბობ, იმიტომ რომ მერე ხალხს ბევრი კითხვები უჩნდება, გვწერენ და ა.შ. არადა ფაქტია, აფხაზეთში აღდგომის მერე სასწაულები ხდება.

ჩემი მეზობლის ფანჯარაზე წმინდა გიორგი გამოისახა. ოჯახს 5 წლის შვილი ჰყავს, ბავშვი შეზღუდული შესაძლებლობების მქონეა, არც დადის, არც ლაპარაკობს, არც იცინის. როცა მათი ოთახის ფანჯარაზე წმინდა გიორგი გამოისახა და მომლოცველები მივიდნენ, ბავშვი თურმე იცინოდა... ჩვენი სოფლის ბიჭებისგან ვიცი, რომ მთაზე მათ შენიშნეს, როგორ ამოვიდა წყლიდან, ორი თეთრებში ჩაცმული მამაკაცი, დაახლოებით ორი კილომეტრი გაიარეს და მერე ცისარტყელასავით ცაში წავიდნენ. გალიგაში ჭაში წყალი ადუღდა, ორი დღე ცხელი წყალი ამოჰქონდა ჭიდან ხალხს. ესაა ის, რაც გადმოცემით ვიცი და ჩემს ოჯახში რა სასწაულიც არის დაფიქსირებული მამა გაბრიელის გამოსახვით, ამას თავად ვხედავ. სასწაული აფხაზეთის ტერიტორიაზე ომის დროსაც მოხდა, ცრემლიანი ღვთისმშობელი გამოეცხადა ხალხს.

- გავრცელებული ინფორმაციით, ქართველ სასულიერო პირებს რუსეთის პატრიარქი არ აძლევს ადგილზე ჩასვლის უფლებას. რას ასახელებენ ამის მიზეზად?

- ვერაფერს ვიტყვი ამ თემაზე. წაკითხული მაქვს, ქრისტემ თქვა, სანამ მე მოვალ მანამდე ჩემი წმინდანები მოვლენ დედამიწაზეო, შესაძლოა სწორედ ეს პერიოდი დადგა. არავინ არაფერს გვეუბნება, ეს კარგის მომასწავებელია თუ ცუდის. ჩვენ უბრალოდ სასწაულის მომსწრენი ვართ, ჩვენს სახლებში და დიდება უფალს!...

თამარ ბოჭორიშვილი

AMBEBI.GE

ფოტოები: აკაკი ბასლანძე