13
ივლისიდღის ზოგადი ასტროლოგიური პროგნოზი
გუშინ, 23 მარტს გამთენიისას ყაზბეგის გამზირზე ავარია მოხდა - ავტომანქანა ჯერ მგზავრთა მოსაცდელ გაჩერებაზე, შემდეგ კი იქვე მდგომ პრესის ჯიხურებში შევარდა (იხილეთ ფოტოების ავარიის ადგილიდან).
თვითმხილველების ცნობით, მძღოლი მაღალი სიჩქარით მოძრაობდა. როგორც აღმოჩნდა, მანქანას 20 წლის ფოტომოდელი - დიანა ოვანოვა მართავდა. დიანა ერთი წლის წინ გახდა ცნობილი ქართული საზოგადოებისთვის და მისმა ფოტოებმა სოციალური ქსელი ააჭრელა - უკრაინული წარმოშობის სექს-სიმბოლოს მონიკა ბელუჩის ადარებენ.
ოვანოვა ავარიის შემდეგ სასწრაფო დახმარების ბრიგადამ საავადმყოფოში გადაიყვანა. მას დაზიანებები არ აღენიშნებოდა. ავარიის შესახებ ფოტომოდელმა "ფეისბუქის" პირად გვერდზეც დაწერა:
"მიხარია, რომ გადავრჩი და კარგად ვარ... რაც შეეხება კომენტარებს, რომელსაც ვკითხულობ, რომ პოტენციური მკვლელი ვარ, რატომ არ მოვკვდი, რატომ ვარ ცოცხალი, ამდენი რამის დაზიანებას ჯობდა მომკვდარიყავი, და ასე შემდეგ, ასეთ ადამიანებს მოგიწოდებთ, ნუ იქნებით ასეთი მატერიალისტები, არაადამიანები და ბოროტები, ჩემს ადგილას შეიძლებოდა ნებისმიერის შვილი, დედა ან და ყოფილიყო...", - წერს ოვანოვა "ფეისბუქის" გვერდზე.
AMBEBI.GE ავარიის დეტალებით დაინტერესდა და დიანა ოვანოვას დაუკავშირდა: "ღამის 12 საათზე სასეირნოდ გამოვედი ქალაქში. ამბობენ, თითქოს ნასვამი ვიყავი და ამის გამო მომივიდა ავარია, რაც მართალი არ არის. პატრულიც დაადასტურებს, რომ ფხიზელი ვიყავი"
- რა გახდა ავარიის მიზეზი?
- გადაჭარბებული სიჩქარით ვმოძრაობდი, გზის სავალი ნაწილიდან გადავვარდი და მერე უკვე არაფერი აღარ მახსოვს. როცა გონზე მოვედი, უკვე რესპუბლიკურ საავადმყოფოში ვიყავი. მაქვს ტვინის შერყევა, საავადმყოფოში მტოვებდნენ, მაგრამ შესაბამისი პირობები არ იყო და უარი განვაცხადე იქ დარჩენაზე. დღეს ტომოგრაფიას გადავიღებ და ვნახავ რა მჭირს, ტვინის შერყევის გარდა, მთელ სხეულზე მაქვს დაზიანებები.
ექიმებმა მითხრეს, როცა შემოგიყვანეს შოკში იყავი და კანკალებდიო, მე არაფერი არ მახსოვს. ხალხი მილოცავს გადარჩენას, მადლობა რომ გადავრჩი. კი არ გადავრჩი, გუშინ დავიბადე".
როგორც შინაგან საქმეთა სამინისტროში აცხადებენ, მომხდარის შედეგად ერთი ადამიანი - ავტომანქანის მძღოლი დაშავდა. გამოძიება "სისხლის სამართლის კოდექსის" 276-ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს იმის მიერ, ვინც ამ სატრანსპორტო საშუალებას მართავს, რამაც ჯანმრთელობის ნაკლებად მძიმე დაზიანება გამოიწვია.
წარმოშობით უკრაინელი, 20 წლის დიანა ოვანოვა უკვე 3 წელია საქართველოში ცხოვრობს. როგორც ამბობს, ის ერთი უბრალო ფოტოსესიით გახდა პოპულარული და მას მერე "სექსსიმბოლოს" ეძახიან... თავს ქართველი ლამაზმანების კონკურენტად არ მიიჩნევს და ამბობს, რომ სხვების მსგავსად, ტანისამოსის გახდითა და ეროტიკულ ფილმებში მონაწილეობით არ აპირებს პოპულარობის შენარჩუნებას. მომავალში პოლიტიკაშიც სურს სცადოს ბედი...
თამარ ბოჭორიშვილი
AMBEBI.GE
