16
ივნისიდღის ზოგადი ასტროლოგიური პროგნოზი
მასწავლებელთა პროფესიული განვითარების ეროვნულ ცენტრში საგრანტო კონკურსში გამარჯვებულ საგნობრივ ასოციაციებთან ხელშეკრულებები გაფორმდა.
რას გულისხმობს და რა არის ამ პროექტის ძირითადი მიზანი და რა სიახლეებს გეგმევს მასწავლებელთა პროფესიული განვითარების ეროვნული ცენტრი?
ამ საკითხებზე მასწავლებელთა პროფესიული განვითარების ეროვნული ცენტრის დირექტორის მოადგილე მანანა რატიანი გვესაუბრება.
- რას გულისხმობს და რა მიზანს ემსახურება საგრანტო კონკურსი?
- ჩვენმა ცენტრმა საგრანტო კონკურსების გამოცხადების უფლება 2016 წელს პირველად მოიპოვა, რაც წინგადადგმული ნაბიჯია და შესაძლებლობას მოგვცემს არაერთი საინტერესო პროგრამა განვახორციელოთ. პირველი კონსკურსი საგნობრივი ასოციაციებისთვის გამოვაცხადეთ. ამ შემთხვევაში, ჩვენ გვაქვს მასწავლებლების პროფესიული სტანდარტი განსაახლებელი. იმის ნაცვლად, რომ ყველა სკოლაში გაგვეგზავნა მოთხოვნა, სკოლებიდან წამოსულიყო მოსაზრებები, შემდეგ კი 60 ათასი მასწავლებლის მოსაზრება ცალ-ცალკე დაგვემუშავებინა, ჩვენ ვთხოვეთ საგნობრივ ასოციაციებს, დაამუშაონ ეროვნული სასწავლო გეგმით გათვალისწინებული სიახლეები, ჩაატარონ საჯარო განხილვები, ფოკუს-ჯგუფები, განახორციელონ სამაგიდო კვლევები, მოამზადონ კვლევის ანგარიში და ამის შემდეგ მოგვაწოდონ რეკომენდაციები, თუ როგორ უნდა განახლდეს მასწავლებლის საგნობრივი სტანდარტი. ჩვენ გვინდა, რომ მასწავლებლის საგნობრივი სტანდარტი არა მხოლოდ სახელმწიფოს მიერ მასწავლებლებისდმი წაყენებულ მოთხოვნებს ასახავდეს, არამედ მასში აისახოს სხვადასხვა საჭიროებები და მასწავლებლების მოსაზრებები.
საგნობრივ ასოციაციებს მეტი ურთიერთობა აქვთ კონკრეტული საგნის მასწავლებლებთან, ყველზე კარგად ესმით ამ საგნის მასწავლებლების საჭიროებები, აცნობიერებენ სუსტ თუ ძლიერ მხარეებს, კარგი ხედვა აქვთ განვითარების შესაძლებვლობებზე. სწორედ ამ მოსაზრებიდან გამომდინარე პირველი საგრანტო პროექტი სწორედ ასოციაციების მხარდაჭერისკენ მივმართეთ. საგრანტო პროექტის მიზანია პროფესიული განვითარების სფეროში მასწავლებელთა საგნობრივი ასოციაციების ჩართვა და მასწავლებლის პროფესიასთან დაკავშირებულ პროცესში მათი აქტივობის გაზრდა. სისტემის გარეთ მსგავსი ორგანიციების გაძლიერება კი შექმნის პირობებს ცენტრის მიერ განხორციელებული პროფესიული განვითარების სერვისების ეტაპობრივი დეცენტრალიზაციისთვის.
- რომელმა საგნობრივმა ასოციაციებმა გაიმარჯვეს საგრანტო კონკურსში და რა პრინციპით შეარჩიეთ გამარჯვებულები?
- ასოციაციების მხრიდან ამ კონკურსის მიმართ დიდი ინტერესი გამოვლინდა, რადგან აქამდე მათ არ ჰქონდათ ამგვარ პროცესებში ჩართვის შესაძლებლობა. მათთან მუშაობის შედეგად შევარჩიეთ ოთხი ასოციაცია - "ინგლისური ენის მასწავლებელთა ასოციაცია", "სამოქალაქო განათლების პედაგოგთა ფორუმი", "საქართველოს პროფესიონალ ქიმიკოსთა ასოციაცია" და "ასოციაცია-ბიოს", რომლებთანაც გავაფორმეთ ხელშეკრულებები. ამ ეტაპზე აღნიშნული ასოციაციები ატარებენ შეხვედრებს საგნის მასწავლებლებთან და კვლევებს, მარტის ბოლოს უკვე წარმოდგენილი იქნება შედეგები. მისასალმებელია ის, რომ ამ კონკურსის გამოცხადებამ ხელი შეუწყო ახალი ქართულისა და გეოგრაფიის საგნობრივი ასოციაციების ჩამოყალიბებას.
გამარჯვებულები შეირჩნენ წარმოდგენილი კონცეფციის განხილვის საფუძველზე, რომლებიც განიხილეს საგნბრივმა ექსპერტ-კონსულტანტებმა, მკვლევარებმა და საბოლოოდ კომისიამ, რომლის შემადგენლობაშიც შედიოდნენ ჩვენი ცენტრის წარმომადგენლები, განათლებისა და მეცნიერების სამინისტროს თანამშრომლები და არასამთავრობო ორგანიზაციების წარმომადგენლები.
უნდა აღინიშნოს, რომ ასოციაციებს არ აქვთ მუშაობის ერთნაირი გამოცდილება, არც ერთნაირი ქსელი თუ წევრების რაოდენობა, მხარდაჭერა სხვა დონორების მხრიდან. ამ ეტაპზე ჩვენს გამარჯვებულებს შორის არის საქართველოში ყველაზე ძველი ასოციაცია, კარგად გამართული გეოგრაფიული დაფარვით და ბოლო წლებში შექმნილი ასოციაციაც.
- მასწავლებელთა პროფესიული განვითარების ეროვნული ცენტრის სამომავლო გეგმებზე რას გვეტყვით?
- ცენტრი სამომავლოდ არაერთ ღონისძიებას გეგმავს საგნობრივი ასოციაციების ჩართულობის გაზრდისათვის. მიგვაჩნია, რომ მასწავლებელთა პროფესიული განვითარების პოლიტიკის განსაზღვრისას მათ მნიშვნელოვნი როლი უნდა მიუძღვოდეთ. ეს მასწავლებლებსაც აძლევს საშუალებას მათი იდეები კონცენტრირებულად, მიზანმიმართულად ჩვენამდე მოიტანონ და ერთგვარი ლობირება გაუკეთონ. ამით მოგებული დარჩება მასწავლებელიც, რადგან მათი ხმა ბევრად უფრო გასაგები იქნება ჩვენთვის და ასევე ჩვენც, რადგან სიახლეები რეალობას მოწყვეტილი არ იქნება.
ელიზბარ ელიზბარაშვილი ("საქართველოს პროფესიონალ ქიმიკოსთა ასოციაცია"):
- რამდენად მნიშვნელოვანია თქვენი ასოციაციისთვის ასეთი სახის თანამშრომლობა საჯარო უწყებასთან?
- ეს ქართულ რეალობაში პირველი შემთხვევა, მნიშვნელოვანი სიახლე და ამავდროულად დიდი გამოწვევაა საგნობრივი ასოციაციებისთვის. ვფიქრობ, საგნობრივი ასოციაციების ჩართულობა მნიშვნელოვანია განათლების სფეროში სხვადასხვა დოკუმენტის შემუშავებისთვის და სასწავლო რესურსების ხარისხის გაუმჯობესებისთვის. სწორედ, საგნობრივი გაერთიანებები შეძლებენ ამ პროცესში მასწავლებელთა ჩართულობის გაზრდით ცენტრისთვის ეფექტური დახმარების გაწევას. იმედს ვიტოვებ, რომ ეს არ იქნება ერთეული შემთხვევა და მსგავსი საგრანტო კონკურსების ჩატარება ტრადიციად იქცევა.
