"რუსმა მესაზღვრეებმა ირონიით გვითხრეს, დასრულდა დრო, როცა "საზღვარზე" თქვენს ნებაზე დადიოდითო..." - საოკუპაციო ხაზზე გადასასვლელები ჩაიკეტა

აფხაზეთის დე ფაქტო ხელისუფლებისა და რუსეთის გადაწყვეტილებით, საოკუპაციო ხაზზე, ე.წ. გადასასვლელები დაიკეტა და მხოლოდ ერთი, ენგურის ცენტრალური ხიდი დარჩა... გალის მოსახლეობის პროტესტის მიუხედავად, აფხაზეთის დე ფაქტო მთავრობამ 5 მარტს, ორსანტია-ოტობაიას და ხურჩა-ნაბაკევის საკონტროლო-გამშვები პუნქტები საბოლოოდ ჩაკეტა. გალის ე.წ. დაბალი ზონის სოფლების მოსახლეობის თქმით, ზუგდიდში მოსახვედრად მათ 20-45 კილომეტრის გავლა მოუწევთ, რაც დამატებით დროს და ხარჯს საჭიროებს. გარდა ამისა, ერთი გადასასვლელის შემთხვევაში, ეს გამოიწვევს რიგებს, მით უფრო, რომ უმეტეს შემთხვევაში, რუსი მესაზღვრეები ხელოვნურად ქმნიან პრობლემას და ბარიერს...

პუნქტების შესაძლო დახურვა გალის მოსახლეობამ ჯერ კიდევ თებერვალში გააპროტესტა. მაშინ მოსახლეობა სოფელ ნაბაკევში და ენგურის ხიდთან შეიკრიბა, რა დროსაც მათ საინიციატივო ჯგუფიც ჩამოაყალიბეს და ხელმოწერების შეგროვება დაიწყეს. მათ ადგილობრივი ხელმძღვანელობა შეხვდა, რის შემდეგაც, ისინი დაიშალნენ, თუმცა, მალევე გალის დე ფაქტო ადმინისტრაციამ მოსახლეობას მოუწოდა, "სახელმწიფო საზღვარზე გადაადგილების" წესი არ დაარღვიოს და 5 მარტიდან მხოლოდ ენგურის ცენტრალური ხიდით ისარგებლონ.

აფხაზეთის დე ფაქტო მთავრობამ, "სახელმწიფოს საზღვრის შესახებ" "კანონში" ცვლილება ჯერ კიდევ გასული წლის მარტში შეიტანა. ის სხვა ღონისძიებებთან ერთად საოკუპაციო საზღვრის უკეთ გაკონტროლების მიზნით საკონტროლო-გამშვები პუნქტების შემცირებას გულისხმობდა. სოხუმმა ახალი კანონის აღსრულება ჯერ კიდევ გასული წლის აპრილში დაიწყო, როცა გამშვები პუნქტი ზუგდიდის სოფელ შამგონას მოსაზღვრე თაგილონთან და წალენჯიხის სოფელ ფახულანის მოსაზღვრე ლეკუხონაში გააუქმა.

დე ფაქტო მთავრობის მონაცემებით, ადმინისტრაციულ საზღვარზე მოქმედი ოთხი საკონტროლო-გამშვები პუნქტიდან (ენგურის ხიდი, ხურჩა-ნაბაკევი, ორსანტია-ოტობაია, ფახულანი-საბერიო) ყოველდღიურად, სამეგრელოს რეგიონში დაახლოებით, 1 500 ადამიანი გადადიოდა და გალში ბრუნდებოდა.

გალის მცხოვრებლების თქმით, ეს მათ ყოველდღიურ ცხოვრებას კიდევ უფრო გაართულებს. ისევე როგორც გაურასდება იმ აფხაზების მდგომარეობა, რომლებიც რეგულარულად გადმოდიოდნენ ქართულ მხარეს და აქაური სერვისით სარგებლობდნენ. ასევე, საუბარია იმათზეც, ვინც საარსებო წყაროს ენგურის ხიდის გავლით შოულობდა...

"ისინი ვერაფერს ამბობენ, მაგრამ ჩვენ, ვინც მათთან ერთად, ლამის ყოველკვირეულად დავდიოდით "ლილოს ბაზარში", ყველამ ვიცით, რომ ამ შეზღუდვების შემდეგ ისინი ლუკმა-პურის გარეშე დარჩებიან და ვერც ფსოუს საზღვარს "მიაწყდებიან", რადგან ეს ხარჯებთან, დროსთან და სხვა ხელოვნურ და ყოფით პრობლემებთან არის დაკავშირებული... შეიძლება ითქვას, აფხაზეთის ხელისუფლებამ თავისი მოსახლეობის დიდი ნაწილი, პირდაპირი მნიშვნელობით, შიმშილისა და სიკვდილისთვის გაწირა, რადგან ძალიან ბევრი ქართულ მხარეს გადასარჩენად გადმოდიოდა... ეს თვითონაც იციან, მაგრამ რუსების ნებას მიჰყვებიან. რაც შეეხება რუს მესაზღვრეებს, მათ ადრეც გაგვაფრთხილეს, რომ საკუთარი ნებით მოგვიწევს აქაურობის დატოვება, ახლა კი, ირონიით გვითხრეს დასრულდა ის დრო, როდესაც ჩვენს გემოზე, როცა გვინდოდა და როგორც გვინდოდა ისე მიმოვდიოდით. არჩევანი, უკვე აღარ გვაქვს და ჩვენი, გალელებისა და ჩვენს მიერ "აყოლიებული" აფხაზების "მორჯულების" დრო დაიწყო" - ამბობს ნაბაკევის მკვიდრი...

სუსტი პროტესტი მოჰყვა აფხაზებისგან მათი ხელმძღვანელობის მიერ მიღებულ გადაწყვეტილებას. ადგილობრივი მოსახლეობის თქმით, იმის ნაცვლად, რომ "ქვეყანაში" მოაგვაროს უსაფრთხოების საკითხები, ასევე, მძიმე კრიმინალური და სოციალური პრობლემები, ის ახალ-ახალ ბლოკპოსტებს აშენებს და სირაქლემის პოზაში ყოფნას ამჯობინებს...

"თითქოს არ ესმოდეთ, რომ ურთულესი წლები გვაქვს. ახალგაზრდები გადიან ქვეყნიდან სამუშაოდ და განათლების მისაღებას და უკან არ ბრუნდებიან... ქართულ მხარეს გადადიოდნენ ადამიანები, ვისაც გადარჩენის იმედი გადაწურული ჰქონდა. კი ცდილობენ და ზოგჯერ გვაიძულებენ რუსეთის პასპორტების მქონეებს იქაური სამედიცინო დაზღვევით ვისარგებლოთ, რაც ნიშნავს, საკუთარი სურვილით მოაწერო თვითმკვლელობას..." - წერენ აფხაზები სოციალურ ქსელებში.

საქართველოს საგარეო საქმეთა სამინისტრო აფხაზეთის რეგიონის სოფლებში, ნაბაკევსა და ოტობაიაში, ე.წ. გადასასვლელი პუნქტების დახურვის ფაქტს გმობს და მიიჩნევს, რომ აღნიშნული გადაწყვეტილება უხეშად არღვევს ადგილობრივი მოსახლეობის თავისუფალი გადაადგილების, პირადი და ოჯახური ცხოვრების, განათლებისა და ჯანდაცვის ხელმისაწვდომობის ფუნდამენტურ უფლებებს და ემსახურება ოკუპირებული აფხაზეთის რეგიონის დანარჩენი სამყაროსაგან იზოლირებას.

საგარეო საქმეთა სამინისტრო მოუწოდებს რუსეთის ფედერაციას, შეწყვიტოს პროვოკაციული ქმედებები საქართველოს მიმართ, პატივი სცეს საერთაშორისო სამართლის პრინციპებს ისევე, როგორც 2008 წლის 12 აგვისტოს ცეცხლის შეწყვეტის შეთანხმებით ნაკისრ ვალდებულებებს და პასუხისმგებლობით მოეკიდოს ადგილზე ვითარების ესკალაციის თავიდან აცილების საკითხს.

საგარეო უწყება მიმართავს საერთაშორისო თანამეგობრობას, ჯეროვანი შეფასება მისცეს ე.წ. გადასასვლელი პუნქტების დახურვისა და ოკუპირებული რეგიონების იზოლირების ტენდენციას, ასევე 9 აპრილს ცხინვალის რეგიონში დანიშნულ ე.წ. რეფერენდუმს და ქმედითი ზომები მიიღოს საქართველოს სუვერენიტეტისა და ტერიტორიული მთლიანობის ხელყოფისაკენ მიმართულ რუსეთის უკანონო ნაბიჯებზე.

ლალი პაპასკირი

AMBEBI.GE