ვინ არის ქიბარ ხალვაში და რა ქონებას ფლობს იგი - ბიზნესმენის ოჯახური ფოტოები

სტრასბურგის სასამართლომ ტელეკომპანია "რუსთავი 2" ქიბარ ხალვაშს მიაკუთვნა. ადამიანის უფლებათა ევროპულმა სასამართლომ მიიჩნია, რომ "რუსთავი 2"-ის საქმეზე თბილისის საქალაქო, სააპელაციო და უზენაესი სასამართლოების მხრიდან, დამოუკიდებლობისა და მიუკერძოებლობის ნაწილში დარღვევა არ ყოფილა. ამას გარდა, სასამართლომ ძალაში არ დატოვა აღსრულების დროებითი შეჩერების მექანიზმი, რომლის თანახმადაც 2017 წელს ტელეკომპანია ქიბარ ხალვაშს აღარ გადაუფორმდა.

იუსტიციის სამინისტროს საჯარო რეესტრმა ხალვაში ტელეკომპანიის მესაკუთრედ უკვე დაარეგისტრირა. მისი მოთხოვნით, "რუსთავი 2"-ის გენერალური დირექტორის პოსტიდან ნიკა გვარამია გათავისუფლდა და აღნიშნულ თანამდებობაზე პაატა სალია დაინიშნა.

• წაიკითხეთ: როგორ ვითარდებოდა მოვლენები "რუსთავი 2"-ის გარშემო სტრასბურგის სასამართლოს დღევანდელ გადაწყვეტილებამდე

ვინ არის ქიბარ ხალვაში და რა ქონებას ფლობს მისი ოჯახი - ბიზნესმენს მეუღლე და სამი შვილი ჰყავს, ორი გოგო და ერთი ბიჭი. მისი ოჯახი ამჟამად გერმანიაში, მიუნხენში ცხოვრობს. თავად ქიბარ ხალვაში დროდადრო ჩამოდის საქართველოში. "ფეისბუქზე" ხშირად მშობლიურ აჭარაში გადაღებულ ფოტოებსაც აქვეყნებს, საიდანაც ჩანს, რომ ბიზნესმენი სოფლის მეურნეობითაც არის გატაცებული.

რაც შეეხება ქონებას, Allnews.ge დაინტერესდა, რა კაპიტალს ფლობს ქიბარ ხალვაში. სხვადასხვა მედიასაშუალებისა და არასამთავრობო ორგანიზაციების ინფორმაციით, ქიბარ ხალვაში რამდენიმე კომპანიის მფლობელი და მეწილეა.

ის შპს "პანორამას" ასპროცენტიანი წილის მფლობელი და დირექტორი და "სხივი Xxi-ის" დამფუძნებელია. იგი ასევე შპს "კონტურის" წილის 33%-ს, შპს "არტის" 28%-ს, შპს "აი დის" 35%ს, შპს "არტი ჯგუფის" 44%-ს, შპს "ეს-ტურის" 40%-ს, შპს "როსერის" 33% და შპს "ვატმან ჯორჯიას" 70%-ს ფლობს.

ჩამოთვლილი კომპანიების საქმიანობის სფეროები სამომხმარებლო პროდუქტით ვაჭრობა, საზოგადოებრივი კვების ადგილების მოწყობა, ყველა სახის საქონლის ან მოწყობილობების იმპორტი, ექსპორტი, წარმოება, ინვესტიციების განხორციელება, ნავთობპროდუქტების ექსპორტ-იმპორტი, იურიდიული კონსულტაციები, უძრავი ქონების ყიდვა-გაყიდვა-გაქირავება, სარემონტო სამუშაოები და სხვა საქმიანობებია.

"საერთაშორისო გამჭვირვალობა საქართველოს" ინფორმაციით, ქიბარ ხალვაში ირაკლი ოქრუაშვილის მეგობარი იყო, - "ხალვაში "პროქტერ & გემბლის" სადისტრიბუციო ქსელს და "პეპსის" ფლობდა. 2007 წლის დეკემბერში, მას მერე, რაც ოქრუაშვილმა სააკაშვილის მთავრობა დატოვა, ხალვაშის კომპანიის საცავები ხანძრის შედეგად დაიწვა," - ნათქვამია ორგანიზაციის 2013 წლის აგვისტოში გამოქვეყნებულ ანგარიშში, რომელიც ტელეკომპანია "რუსთავი 2-ს" ეხებოდა.

საქართველოში ქიბარ ხალვაშის ბიზნეს პარტნიორები თამაზ ნიჟარაძე, ჯემალ ინაიშვილი, გურამ გოგუა, ნიაზ ხალვაში, თამაზ ბერიაშვილი, ივანე რუაძე, მუსა ენგინი, შოთა ხარაზიშვილი, მეჰმეთ შექერი და მერაბ კილაძე არიან. აღსანიშნავია, რომ ბიზნესმენმა ქიბარ ხალვაშმა ტელეკომპანიების "რუსთავი 2"-ისა და "მზის" გამო, 2008 წელს, პარტია "ერთიანი ნაციონალური მოძრაობის" ხელისუფლებაში ყოფნის პერიოდში სასამართლოს სარჩელით მიმართა, რათა აღნიშნულ ტელეკომპანიებში მისი კუთვნილი წილების "ჩამორთმევის" ფაქტების გამოძიება მომხდარიყო.

• წაიკითხეთ სრულად: ვინ არის ქიბარ ხალვაში და რა ქონებას ფლობს იგი?