რუსი გენერლის კვალი მალაიზიური "ბოინგ 777"-ის ჩამოგდებაში, რომელსაც 295 ადამიანი ემსხვერპლა

უკრაინული საინფორმაციო საშუალებები საერთაშორისო ექსპერტ-ჟურნალისტთა ჯგუფის Bellingcat-ის მოძიებულ მასალებზე დაყრდნობით ავრცელებენ ინფორმაციას, რომ "ბოინგ 777"-ის ავიაკატასტროფაში გადამდგარი რუსი გენერლის კვალი იკვეთება. 

"ვინ არის "ხმურინი?.." - ამ სათაურით აქვეყნებს სტატიას "კომერსანტიც", რომლის მიხედვითაც, გენერალ-მაიორ სერგეი ხმურინის გარშემო ძალიან ბევრი სამხილია, რაც ამ საქმეში მის მონაწილეობაზე მიანიშნებს. ის ადრე დონეცკის თვითაღიარებული რესპუბლიკის სამხედრო ძალების დაზვერვაში მსახურობდა. გამოძიების თანახმად,  დონბასში "ბოინგ 777" საზენიტო-სარაკეტო კომპლექსიდან სწორედ გადამდგარმა გენერალმა ჩამოაგდო. 

მათივე მონაცემების მიხედვით, რუსი სამხედრო დონეცკის ე.წ. სახალხო რესპუბლიკის შეიარაღებული ძალების თავდაცვითი ძალების ოფიცერი იყო, თუმცა, რა თქმა უნდა, მარტო არ მოქმედებდა. 

"ბუკის" ტრანსპორტირებაში რუსეთის ფედერაციის შეიარაღებული 69 ცალკეული ბრიგადის მატერიალურ-ტექნიკური ბაზაც იყო ჩართული. ექსპერტები მიიჩნევენ, რომ შემდეგ ინტერნეტში გავრცელებული სამხედროების ანგარიშები და თემის გარშემო სოცქსელებში გავრცელებული ფოტოები როსტოვში მომზადდა, "ბუკი" კი, სავარაუდოდ, უკრაინაში გადაიტანეს.

Bellingcat -ის მოპოვებული მონაცემები იმ  ავსტრალიელი, ბელგიელი, ნიდერლანდების, მალაიიზიელ და უკრაინელ გამომძიებელთა ჯგუფს გადასცეს, რომლებიც რამდენიმე წელია "ბოინგ 777"-ის ჩამოვარდნის თემას იძიებენ. თავის მხრივ, გარკვეული მასალები მათაც აქვთ, რომელთა შეჯერება და განხილვა უახლოეს ხანებში მოხდება, რათა საერთო სურათი შეიკრას.  

ასევე წაიკითხეთ: ვინ შეიწირა მალაიზიური ავიალაინერი და მის ბორტზე მყოფი 295 ადამიანი

2015 წლის აპრილში, Bellingcat საერთაშორისო ჯგუფმა გაავრცელა სატელეფონო ჩანაწერი, სადაც დნრ (დონეცის სახალხო რესპუბლიკის) წარმომადგენელი ავიაკატასტროფისა და "ბუკის" დეტალებს განიხილავდა. აუდიოჩანაწერში ორი პირის საუბარი ისმის და ისინი სავარაუდოდ, დნრ-ს წარმომადგენლები - ხმურინი და ბურიატი ბუკის ტრანსპორტირების დეტალებს არკვევენ. უკრაინელი ექსპერტების მოსაზრებით, ხმურინის სახელით მოსაუბრე მეომარი რუსეთის ფედერაციის შეიარაღებული ძალების გადამდგარი ოფიცერი სერგეი პეტროვსკია, რომელიც წლების განმავლობაში რამდენიმე მეტსახელით მოქმედებდა. მას ოფიცრის სამსახური ავღანეთში აქვს გავლილი და მისი საქმიანობის ძირითადი სფერო დაზვერვა იყო...

უკრაინელი ძალოვნების თქმით, პეტროვსკი გრუ-ს სამხედრო დაზვერვაში, 2014 წლამდე მსახურობდა. შემდეგ კი პენსიაზე გავიდა. როგორც გაირკვა, პეტროვსკის კიდევ ერთი პოსტი ეკავა, ის  საკუთარ თავს დაზვერვის სფეროში დნრ-ის თავდაცვის მინისტრის მოადგილედ წარადგენს...

2014 წლის 17 ივლისს, მალაიზიის კუთვნილი სამგზავრო თვითმფრინავი აღმოსავლეთ უკრაინაში, რუსეთის საზღვრის მახლობლად ჩამოვარდა. მაშინ გავრცელდა ინფორმაცია, რომ ის "მიწა-ჰაერის" კლასის რაკეტამ ჩამოაგდო. კატასტროფის შედეგად დაიღუპა თვითმფრინავში მყოფი 295-ვე პირი: - 280 მგზავრი და ეკიპაჟის 15 წევრი. ექსპერტთა ცნობით, ამსტერდამიდან კუალა ლუმპურის მიმართულებით მიმავალი "ბოინგ 777" ათი კილომეტრის სიმაღლეზე მიფრინავდა, როცა მას რაკეტა მოხვდა.

თუმცა, ასევე გავრცელდა მოსაზრება, რომ შეიძლებოდა მხოლოდ სარაკეტო კომპლექს "ბუკით" "ეს-300"-ის ტიპის საზენიტო კომპლექსით ჩამოეგდოთ. ასეთ სისტემებს რუსეთიც ფლობს და უკრაინაც.

ლალი პაპასკირი

AMBEBI.GE