8
ივნისიდღის ზოგადი ასტროლოგიური პროგნოზი
ახალი წელი ფოიერვერკთან ასოცირდება. ხშირად სხვადასხვა სახის პიროტექნიკა დამაზიანებელია, რისი არაერთი მაგალითიც არსებობს.
პლასტიკური ქირურგის გუგა ქაშიბაძისთვის წლებია ახალი წელი სწორედ პედარტებისა და შუშხუნების აფეთქებასთან ასოცირდება, რადგანაც დამწვრობის ცენტრში, სადღესასწაულო დღეებში, ძირითადად პედარტების აფეთქებების შედეგად დაზიანებულებს მკურნალობენ.
"თუ მთელი ბავშვობა, საახალწლოდ თონის პურის რიგში დგომით ვიყავი გამწარებული, რადგანაც ყველა თონის პურს ყიდულობდა, მას მერე, რაც ექიმი გავხდი, ახალი წელი ჩემთვის მხოლოდ პედარტებთან და შუშხუნებთან ასოცირდება, თან, ძალიან მძიმედ," - ამბობს გუგა ქაშიბაძე და დამწვრობის ცენტრის მაგალითზე იმ სავალალო სტატისტიკის შესახებ გვიყვება, რაც საახალწლო დღეებში ასაფეთქებლების გამოყენებამ გამოიწვია.- თითქოს ელემენტარულია, პიროტექნიკა სახიფათოა, რაც თითქოს ყველამ იცის, მაგრამ მიუხედავად ამისა, წლიდან წლამდე დაზიანებების რაოდენობა მატულობს. სამწუხაროდ, წელს სხვადასხვა ხარისხით, 25 პაციენტი მივიღეთ. ეს მხოლოდ დამწვრობის ცენტრის სტატისტიკაა, რეალურად კი ეს რიცხვი გაცილებით დიდია და მასშატაბური, რადგანაც კლინკა არ დარჩენილა თბილისსა თუ რეგიონში, მსგავსი ტრავმით პაციენტი არ მიეღოს. ძირითადად უზიანდებათ მარჯვენა მტევანი, დაახლოებით 47%, ასევე მარცხენა მტევანი, სახე, თვალის არე, გულმკერდის წინა ზედაპირი, მუცელი, ქვემოთა კიდურები. არც თუ იშვიათია პეტარდებით გაჩენილი ხანძარი და თავისი სამწუხარო, სავავალო შედეგები.
ასევე დიდია თვალის კლინიკაში ასაფეთქებლებით დაზიანებული პაციენტების რაოდენობა. გარდა დამწვრობისა, აფეთქება სხვადასხვა ქსოვილის სერიოზულ დაზიანებასაც იწვევს, ასევე თითის ფალანგების ტრავმულ ამპუტაციასაც კი. წელს ყველაზე პატარა პაციენტი სამ წლამდე ბავშვი გვყავდა, ყველაზე ხანდაზმული - 82 წლის მამაკაცი. სამწუხარო ის არის, რომ ეს ამბავი გრძელდება მანამ, სანამ ბოლო პედარტი არ გაიყიდება. რაც შემოტანილი აქვთ, იმას ხომ "გასაღება" უნდა?!
- პრევენცია რა არის?
- ამ მძიმე შედეგებისთვის ყველა ცოდოა, მაგრამ განსაკუთრებით ცოდოები არიან ბავშვები და ისეთი ასაკის, რომლებსაც თვითონ არ უყიდიათ და შესაბამისად, არც იციან, როგორ ააფეთქონ. უბრალოდ, ვიღაცას უყურეს და ცუდად გაიმეორეს. იმის მაგივრად, რომ მშობელს ახსნა-განმარტება მიეცა, გარკვეული დრო დაეხარჯა ამაზე, ბავშვი გაეფრთხილებინა რამდენად სახიფათოა ეს ყველაფერი, არაფერს ეუბნება და ისიც ბრმად იმეორებს იმას, რასაც დედ-მამა აკეთებს.
მეორე - მინიმალური უსაფრთხოების წესები მაინც უნდა დავიცვათ, თან, არა მგონია, ჩვენთან შემოტანილი ტექნიკა ხარისხით გამოირჩეოდეს და ზუსტად ისე, ანოტაციაში რომ წერია, მეცხრე წამზე ფეთქდებოდეს...
რაც უნდა დაბალი მუხტის მქონე ასაფეთქებელი საშუალება იყოს, მაინც საშიშია, რადგანაც შეიცავს დენთს. ამიტომ, გინდა საბრძოლო მოქმედებებისას აგიფეთქებია დენთის გარკვეული რაოდენობა და გინდაც - ახალ წელს, სახიფათოა. მაშხალას აწერია, რომ 30 მ-ის რადიუსში არავინ უნდა მიეკაროს მას, არც ადამიანი და არც ცხოველი. ასეთ მაშხალას შუა ოთახში რომ გაუშვებ, რითი ხარ დაცული?! უბრალო მოსახლეობა კი არა, აფეთქებისას ზოგჯერ, სპეციალისტებიც სცდებიან. თან ჩვენ შვედები, ნორვეგიელები, იაპონელები ხომ არ ვართ, ზუსტად ინსტრუქციას გავყვეთ და "ასჯერ გაზომე და ერთხელ გაჭერის" პრინციპით ვიმოქმედოთ. ამასთან, ახალი წლის ღამეს ყველა ნასვამ მდგომარეობშია და ეიფორიაში. ისიც მესმის, რომ ეს გასროლა გარკვეულწილად ტრადიციასთან არის დაკავშირებული (თოფს ქართველი სიხარულის ჟამს ისროდა), მაგრამ, ტრადიცია, რომელიც ასეთ ზიანს გაყენებს, უკვე მავნე ჩვევაა. ამიტომ ჭამეთ ტრადიციული ჩურჩხელა და გოზინაყი და მოეშვით აფეთქებას. მე ამას ვურჩევ საზოგადოებას!
ლალი ფაცია
AMBEBI.GE
