ახალი წლის ღამეს ტერაქტების საშიშროების გამო ევროპის ქვეყნებში უსაფრთხოების ზომები გამკაცრებულია

ახალი წლის მოახლოებასთან ერთად ევროპის ქვეყნებმა უსაფრთხოების ზომები გაამკაცრეს. ახალი წლის ღამეს, საფრანგეთის მოსახლეობის უსაფრთხოებას 96 000 პოლიციელი და სამხედრო დაიცავს.

აღნიშნული გადაწყვეტილება ქვეყნის ხელისუფლებამ ტერაქტების საშიშროების გამო მიიღო. ფრანგული სპეცსამსახურები რადიკალი ისლამისტებისგან მოსალოდნელ თავდასხმებს არ გამორიცხავენ.

ანალოგიურ ღონისძიებას მიმართა გერმანიის ხელისუფლებამაც. 19 დეკემბერს ბერლინში განხორციელებული სისხლიანი ტერაქტის შემდეგ, ქვეყნის მასშტაბით, რეიდები ხორციელდება. გერმანიის ქალაქებსა და სოფლებში სამართალდამცავთა უპრეცედენტო რაოდენობა პატრულირებს.

უსაფრთხოების ზომები გაძლიერებულია იტალიაში, ნიდერლანდებსა და ევროპის სხვა ქვეყნებშიც.