თავდაცვის სამინისტროში ოპტიმიზაცია "პატრონიანებისა" და "უპატრონოების" მიხედვით მიმდინარეობს?

საქართველოს თავდაცვის სამინისტროს ცნობით, სამხედრო პოლიციის აღმოსავლეთ ბატალიონიდან 77 ადამიანი, მათ შორის, 30 სამოქალაქო პირი დაითხოვეს. როგორც თავდაცვის სამინისტროში განმარტავენ, ეს პირები კადრების განყოფილების განკარგულებაში გადავიდნენ და არ არის გამორიცხული, ზოგიერთი მათგანი სამუშაო ადგილს დაუბრუნდეს.

აღნიშნულ ინფორმაციას, გენშტაბის უფროსის მოადგილე, შალვა ჯაბახიძეც ადასტურებს. მისი განმარტებით, უწყებაში გაბერილი შტატებია. მისივე თქმით, სამხედრო პოლიციიდან ამ პირების დათხოვნა საქართველოს მთავრობის მიერ დაანონსებული ოპტიმიზაციის პროცესს არ უკავშირდება.

"ჩვენი მიზანია, რომ სამხედრო პოლიციის ბატალიონები იყოს გასამხედროებული ქვედანაყოფი, სადაც იმსახურებენ არანაკლებ ერთ კონტრაქტგავლილი ჯარისკაცები და ოფიცრები, რომლებსაც აქვთ, ძირითადად, სამხედრო განათლებაც მიღებული და რა თქმა უნდა, სამხედრო პოლიციის მიმართულებითაც არიან განვითარებულები. ეს იყო მათი გათავისუფლების მიზეზი. სამხედრო პოლიციის ბატალიონები არ დარჩება ამ ფორმით, შემდგომში, ვაპირებთ მათ ოპტიმიზაციას. ერთ-ერთი მიზეზი, რა თქმა უნდა, არის გაბერილი შტატებიც. მაგალითისთვის, შემიძლია მოგიყვანოთ ჰაუპვახტის საკითხი. როდესაც, ჰაუპვახტი აიკრძალა, აღარ იყო შეიარაღებულ ძალებში, მაგრამ, სამხედრო პოლიციაში შტატი არსებობდა… არავითარ კავშირში არ ეს მთავრობის გადაწყვეტილებასთან. ეს იყო ჩვენი ხედვა,"- განაცხადა შალვა ჯაბახიძემ.

როგორც მოსალოდნელი იყო ოპტიმიზაცია სხვა დანაყოფებშიც მიმდინარეობს და საკმაოდ მტკივნეულადაც, - სხვადასხვა მინისტრის დროს, სხვადასხვა მოტივაციით, თავდაცვის სამინისტროში კადრები რომ ხელოვნურად გაბერეს, ამაზე არაერთხელ ითქვა, თუმცა, აქ სხვა საკითხია უფრო მნიშვნელოვანი, - კერძოდ ის, თუ რამდენად ობიექტურად მოხდება ოპტიმიზაცია. უწყების თანამშრომლები უკვე ალაპარაკდნენ პირადი სიმპათიებით გადაწყვეტილების მიღებაზე.

ერთ-ერთმა სამხედრომ, რომელიც 2008 წლის ომში დაღუპული გმირის ოჯახის წევრია, ჩვენთან საუბარში განაცხადა, რომ როგორც კი მისი ბრიგადის უფროსს შანსი მიეცა, მაშინვე ჩამოაქვეითა.

"გაშვებით ვერ გამიშვებდა, რადგან 2008 წლის ომში დაღუპულთა ოჯახის წევრი ვარ და მათ არ ეხებიან, მაგრამ ისე ჩამომაქვეითა, კარგა ხანს წინ წასვლის შანსი არ მაქვს... ვერც არაპროფესიონალიზმს დამაბრალებდა, ორი სამშვიდობო მისია მოვიარე, არაერთი წვრთნა მაქვს გავლილი, მაგრამ უბრალოდ, ამითვალწუნა, რადგან კოჭს არ ვუგორებდი... ჩემი "ბექგრაუნდის" დამსახურებით, არ დავიკარგები, სხვა ბრიგადაში ვაპირებ გადასვლას, მაგრამ ვიღაცების პირადი სიმპათია-ანტიპათიით შერჩეული კადრებით სისტემა გამართულად ვერ იმუშავებს" - ამბობს სამხედრო ჩვენთან საუბარში.

სამხედროების და სამოქალაქო სექტორის თანამშრომლების თქმით, ბოლო წლებში თავდაცვა ერთგვარ თავშესაფარს დაემსგავსა, სადაც ერთმანეთის ახლობლები იყვნენ დანიშნული; ახლა კი, ოპტიმიზაცია, "პატრონიანებსა" და "უპატრონოების" მიხედვით მოხდება.

"ნიკა ჯანღჯავას დანიშვნას შეიარაღებულ ძალებშიც ძალიან დიდი უკმაყოფილება მოჰყვა, რადგან იციან, რომ ის ადამიანებს პროფესიონალიზმის ნიშნით არჩევს და ღიპიან ოფიცრებს და პოლკოვნიკებს თავზე ხელს არ გადაუსვამს... ახლა, ძალიან ბევრი სამხედროსგან მოვისმინე, რომ გათავისუფლების ან ჩამოქვეითების შემთხვევაში, მასთან აპირებს შეხვედრას. მეც იგივეს ვაპირებ... სამჯერ ვარ მისიაში ნამყოფი, მათ შორის ერაყშიც და ახლა მეუბნებიან, რომ ჩემი ფუნქცია შევასრულე. მიზეზი ვიკითხე, რადგან ჯერ საპენსიო ასაკის არ ვარ, - ეცადე, ისე წახვიდე, კომპენსაცია აიღოო, - მითხრეს... მე ჩემი ქვეყნის ღირსებას პირნათლად ვიცავდი და მიმაჩნია, რომ ასე ერთი ხელის მოსმით გაშვებას არ ვიმსახურებ... - ამბობს 34 წლის სამხედრო, რომელმაც ვინაობის გამხელა არ ისურვა.

"ოპტიმიზაციის ფარგლებში ბატალიონის ექიმი, ლევან ხუხუნაიშვილი გაუშვეს. ახლახან ჩამოვიდა ეს ბიჭი ავღანეთიდან და ისეთი პროფესიონალი კადრია, გაოცებული დავრჩით, - აბა, ვინ დატოვესო, რადგან სამხედრო ექიმებში მოვიკოჭლებთ. იმედია, ეს იცის ხელმძღვანელობამ... ვიცით, რატომაც, სხვას უჭირავს მის ადგილზე თვალი და დანიშნავენ კიდეც... არადა, ეს ბიჭი კაპიტანია წოდებით, მთელ ბრიგადაში ისეთი მაღალი დონის სპეციალისტი არ იყო, მაგრამ მისი პროფესიონალიზმით არავინ დაინტერესებულა... ვისი შტატიც გაუქმდა, გასაგებია, იტყვიან, რომ ხელოვნურად იყო შექმნილი და უმეტესად ასეც იყო, როგორც კი შანსი ჩაუვარდათ, ვიღაცები ახსნა-განმარტების გარეშე გაუშვეს და მიზეზებს მოისმენთ, შეიძლება დაჯერებაც გაუჭირდეს ადამიანს - მაგალითად, თუ გადაწყვეტილების მიმღებთან არის დაახლოებული შედარებით დაბალი რანგის სამხედრო, მას შეუძლია მისთვის არასასურველი კადრი აბსურდული მიზეზით გააშვებინოს მეთაურობას. ადამიანური ურთიერთობები ბევრ რამეს წყვეტს და მის სიტყვას ენდობიან. ის კი ამით სარგებლობს... ბევრი რამ უსამართლოდ ხდება, მაგრამ ამაში მინისტრი არ არის დამნაშავე, ქვედა რგოლებში ძალზე ცუდი რამეები ხდება, - აქ ძალიან ბევრი, ვიღაცის რეკომენდაციით არის მოსული და გავლენიანები ცდილობენ, თავიანთი ახლობლები დატოვონ და პროფესიონალები გვერდზე რჩებიან", - ამბობს ერთ-ერთი სამხედრო ჩვენთან საუბარში.

მარიამ რობაქიძე

AMBEBI.GE