ვისი ინიციატივით გადაწყვიტეს აბორტგაკეთებულმა ქალებმა ეკლესიის აშენება - საპატრიარქოს და საინიციატივო ჯგუფის კომენტარი

რამდენიმე დღის წინ, საქართველოს კათოლიკოს-პატრიარქმა, ილია მეორემ საპატრიარქოში აბორტით მოწყვეტილი ბავშვების დედები მიიღო. ამის შესახებ ინფორმაცია საპატრიარქოს ოფიციალურ ვებ-გვერდზე განთავსდა.

საპატრიარქოს ინფორმაციით, საინიციატივო ჯგუფს, რომელშიც "აბორტით მოწყვეტილი ბავშვების დედები და ამ საქმეში მონაწილე ექიმ-გინეკოლოგები" შედიან, გაუჩნდა სურვილი, "სინანულის გამოსახატად ააგონ ტაძარი".

"ათეისტური რეჟიმის პირობებში მრავალი ადამიანი ვერ აცნობიერებდა, რამდენად დიდი ცოდვაა აბორტი და მას უბრალო მოვლენად აღიქვამდა. მას შემდეგ, რაც ჩვენი მოსახლეობის უდიდესმა ნაწილმა ეკლესიური ცხოვრება დაიწყო, დედებს, რომელთაც მუცლადღებულ ყრმათა მოწყვეტის დანაშაული აწუხებთ (მათ შორის ექიმ-გინეკოლოგებიც არიან) გაუჩნდათ სურვილი, თავისი სინანულის გამოსახატად ააგონ ტაძარი ყოვლადწმინდა სამების სახელზე" - ნათქვამია საპატრიარქოს მიერ გავრცელებულ ინფორმაციაში.

არსებული ინფორმაციით, ეკლესია აიგება ხუდადოვის ტყის მიმდებარედ.

დეტალების გასარკვევად AMBEBI.GE საპატრიარქოს წარმომადგენელს დაუკავშირდა, სადაც განგვიმარტეს, რომ ამ ქალებმა თავად გამოთქვეს სურვილი შეექმნათ საინიციატივო ჯგუფი. როგორც ჩვენთან საუბარში საპატრიარქოს მხრიდან შეხვედრის ერთ-ერთი მონაწილე დედა ელპიდე ამბობს, ტაძრის აშენების იდეის გავრცელებას საინიციატივო ჯგუფის წევრები მთელ საქართველოში აპირებენ:

"თვითონ ამ ქალებმა გამოთქვეს სურვილი აშენდეს ტაძარი. შეიქმნა საინიციატივო ჯგუფი და პატრიარქმა დალოცა, როგორც კეთილი საქმე. ისინი მორწმუნე ქალები, გარდაცვლილ შვილთა დედები არიან, მეგობრობენ, კეთილ საქმეებს აკეთებენ, ეს მოიფიქრეს და თავიანთი იდეა პატრიარქს გააცნეს. ზუსტად არ ვიცი, მაგრამ ალბათ, საინიციატივო ჯგუფი შეიკრიბება, ამ იდეას მთელ საქართველოში გააჟღერებენ და ვისაც სურვილი ექნება, შეიტანოს თავისი წვლილი ამ ტაძრის აშენებაში, გარკვეულ მატერიალურ შემწეობას გაიღებს. დედების გარდა არიან ის ექიმებიც, ვისაც ამ მძიმე ცოდვაში წვლილი მიუძღვის", - განმარტეს საპატრიარქოში.

AMBEBI.GE ასევე დაუკავშირდა საინიციატივო ჯგუფის წარმომადგენელს, მზია კაცაძეს.

"ჯერ ჩამოყალიბების პროცესში ვართ, არაფრის თქმა არ შემიძლია. იდეა ჯერ ჩანასახის დონეზეა, უბრალოდ მოსაზრებაა, ზუსტ პასუხს ვერ გეტყვით. დეტალები 2-3 თვეში გაირკვევა და თუ ღმერთმა შეგვაძლებინა ეს საქმე, დანარჩენ ინფორმაციასაც სიამოვნებით გაგაგებინებთ" - ამბობს კაცაძე.

თეა ბეჟიტაშვილი

AMBEBI.GE