აუდიტის სამსახურმა სხვადასხვა პარტიების წარმომადგენლებს 250 000 ლარის ჯარიმა დააკისრა

აუდიტის სამსახურში დღეის მდგომარეობით პარტიებისთვის შეწირულ თანხებთან დაკავშირებით 40 პირია დაბარებული გამოკითხვაზე, - ამის შესახებ გენერალური აუდიტორის მოადგილემ ნინო ლომჯარიამ ჟურნალისტებს განუცხადა.

ლომჯარიას ინფორმაციით, 40 პირი სხვადასხვა პარტიის შემომწირველია. აუდიტის სამსახურის ინტერესია მათ მიერ განხორციელებული შეწირული თანხების კანონიერების დადგენა.

როგორც ლომჯარიამ განმარტა, 2016 წლის საარჩევნო პერიოდში პარტიებმა ჯამში 29 212 382 ლარის შემოწირულობა მიიღეს. აქედან აუდიტის სამსახურმა 1016 შემომწირველი ფიზიკური პირისა და 84 იურიდიული პირის მიერ განხორციელებული შემოწირულების კანონიერება შეისწავლა.

"ამ დროისთვის გამოკითხულია 120 პირი, მათ შორის "ქართული ოცნების" 35, "სახელმწიფო ხალხისთვის" - 42, "პატრიოტთა ალიანსის" - 18 და "ნაციონალური მოძრაობის" - 12 შემომწირველი. წინასაარჩევნო პერიოდის მონიტორიგნის ფარგლებში აუდიტის სამსახურმა სხვადასხვა პოლიტიკური პარტიების წარმომადგენლებს ჯამში 250 000 ლარის ჯარიმა დააკისრა. ყველაზე მეტი ჯარიმა მოძრაობა "სახელმწიფო ხალხისთვის" შემომწირველებს დაეკისრათ, 7 პირს დაახლოებით 187 000 ლარი, ასევე "პატრიორტთა ალიანსის" წარმომადგენელს 183 000 ლარი დაეკისრა," - განაცხადა ნინო ლომჯარიამ.

მისივე ინფორმაციით, "ქართული ოცნების" სასარგებლოდ გაწეული უკანონო ქველმოქმედებისთვის დაჯარიმებულია რამდენიმე პირი, ჯამში 8 000 ლარის ოდენობით. ინფორმაციის წარმოუდგენლობის საფუძველით კი დაჯარიმებულია 7 პარტია და 12 კანდიდატი.

როგორც გენერალური აუდიტორის მოადგილემ აღნიშნა, აუდიტის სამსახურის მიერ შესწავლილი განცხადებებიდან სამ შემთხვევაზე საქმე პროკურატურაში გადაიგზავნა, ვინაიდან ის სისხლის სამართლის დანაშაულის ნიშნებს შეიცავდა.