რა უნდა იცოდეთ, თუ თქვენს სახლში უკანონოდ შეიჭრნენ და რამ შეიძლება შეაფერხოს სასამართლოს გადაწყვეტილების აღსრულება

ალბათ ხშირად გსმენიათ ან თავად გადაგხდენიათ შემთხვევა, როდესაც ამა თუ იმ კერძო საკუთრებაში, მაგალითად საცხოვრებელ ბინაში, რომელიც დაკეტილი იყო, უცხო პირი თვითნებურად შეიჭრა. ასეთი ფაქტები წლების წინ ხშირად ხდებოდა როგორც თბილისში, ისე სხვა ქალაქებში.

მსგავსი ამბავი გადახდა იზოლდა ხურცილავასაც, რომელიც AMBEBI.GE-ს რედაქციას დაუკავშირდა და პრობლემის შესახებ გვიამბო.

"2008 წელს ჩემს ბინაში უკანონოდ შეიჭრა ოჯახი, ზუსტად არ ვიცი, რომელიღაც სოფლიდან ჩამოვიდნენ, კარები გატეხეს და შევიდნენ. თავად დიდ დიღომში ვცხოვრობ, კომუნისტების დროს, ლოტკინზე, ზღვის უბანში მეტროს თანამშრომლებისთვის კორპუსები აშენდა და ჩემს ქმარსაც მისცეს ბინა, არც გაზი იყო, არც წყალი, არც შუქი და დაკეტილი გვქონდა.

მეზობელმა დაგვირეკა და გვითხრა, თქვენ სახლში სხვები შევიდნენო. მივედით ამბის გასარკვევად, ქალი დაგვხვდა შვილებით, გვთხოვა, ცუდად ვარ, სამკურნალოდ ფული არ მაქვს და არ გაგვაგდოთო, ჩემს ქმარსაც შეეცოდა და დავტოვეთ. იმ დროს ბინა რეესტრში არ მქონია გატარებული, 2008 წელს დავიწყე ეს საქმე და საბოლოოდ, 2013 წელს გავიფორმე. იმ ქალს ვაფრთხილებდი, სახლში არაფერი გააკეთოთ, არ გაარემონტოთ, ბინა ჩემია და ფულს ვერ გადაგიხდი-მეთქი, არ დამიჯერა, ფანჯრები გამოცვალა, ოთახი შეღება. მასთან შეთანხმება არ დამიდია, მაგრამ რაც გააკეთა იმაზე მომედავა, ახლა ბინა უკვე ჩემიაო. ბინის გადაფორმება გაიწელა, ამასობაში ეს ქალიც გარდაიცვალა, სიმსივნით. სახლში მისი ორი შვილი დარჩა. გოგო დიდია, 30 წლის, ის იყო თავისი 17 წლის ძმის მეურვე, თუმცა მერე ქვეყნიდან წავიდა და ახლა ეს ბიჭი მარტო ცხოვრობს ჩემს ბინაში.

საბოლოოდ, როცა ვერაფერი გავაწყვე, სასამართლოს მივმართე. გამოსახლება მოვიგე, სასამართლოს წესით აღსრულებაში შევიტანე თანხა, რომ გამოესახლებინათ ეს ხალხი. მათ გამოსახლებას 2016 წლის მარტიდან ველოდები. აღსრულებამ რამდენჯერმე გადადო გამოსახლება. ბოლოს საქმე 21 ნოემბერს ჩაინიშნა, მაგრამ ახლა იმას მეუბნებიან, არასრულწლოვანია და მორალურ ზიანს ვერ მივაყენებთ, ამიტომ ჯერ ვერ გამოვასახლებთო, მაგრამ მე რა ვქნა? ქირით ვცხოვრობ, ჩემს ოჯახსაც ძალიან უჭირს. თავის დროზე, როცა აღსრულებაში განცხადება შევიტანე, მაშინ არ იცოდნენ, რომ ბიჭი არასრულწლოვანი იყო?" - ამბობს ბინის მეპატრონე იზოლდა ხურცილავა.

საქმის დეტალების გასარკვევად, აღსრულების ეროვნულ ბიუროს დავუკავშირდით. როგორც პრესსამსახურში გვითხრეს, ნებისმიერი პირის საქმის წარმოება საჯარო არ არის და ვერც ამ კონკრეტული საქმის დეტალებს გაასაჯაროებენ, შესაბამისად კონკრეტული პასუხი მათგან ვერ მივიღეთ.

"კონკრეტული მხარის საქმის წარმოება კონფიდენციალურია. ქალბატონ იზოლდასთან გვაქვს აქტიური კომუნიკაცია, ის საქმის კურსშია, თუმცა დეტალებს ვერ გავასაჯაროებთ", - განგვიცხადეს აღსრულების ეროვნულ ბიუროში.

როგორ უნდა მოიქცეს მესაკუთრე, როცა მის უძრავ ქონებას უკანონოდ ეპატრონებიან და როგორ იცავს მას კანონი - AMBEBI.GE ახალგაზრდა იურისტთა ასოციაციის იურისტს, დავით ლომთაძეს ესაუბრა:

"თუ პირი სხვის საკუთრებაში უნებართვოდ არის შეჭრილი, პირველ რიგში მესაკუთრეს შეუძლია მიმართოს პოლიციას ან პროკურატურას და განმარტოს, რომ მოხდა სისხლის სამართლის კოდექსის დანაშაული, კერძოდ, სხვის საკუთრებაში უნებართვოდ შეჭრა. თუ პოლიცია დანაშაულის ნიშნებს ვერ დაინახავს და გამოძიება არ დაიწყება, ერთადერთი გზა რჩება სამოქალაქო პროცესით დავა.

სამოქალაქო პროცესით დავისთვის აუცილებელი არ არის დაზარალებულმა ჯერ პოლიციას მიმართოს. სამოქალაქო წესით პირდაპირ შეუძლია მიმართოს სასამართლოს, სამოქალაქო საპროცესო კოდექსის თანახმად, სასამართლომ საქმე ერთი თვის ვადაში უნდა განიხილოს, თუმცა დღეის მდგომარეობით, როგორც წესი, სასამართლო განხილვას ვერ ასწრებს, მითუმეტეს თბილისის საქალაქო სასამართლო, რომელიც ძალიან გადატვირთულია და დრო იწელება. 2015 წლის 11 დეკემბრის ცვლილებით, პოლიცია ვერ გამოასახლებს უნებართვოდ შეჭრილ პირს, დღეს მოქმედი კანონით, აუცილებელია დაზარალებულმა სასამართლოს მიმართოს.

- თუ სასამართლომ გადაწყვეტილება მომჩივანის სასარგებლოდ გამოიტანა და ბინა ძველ პატრონს დაუბრუნა, შემდეგ რა პროცედურებია?

- სამოქალაქო საკადასტრო კოდექსში შევიდა ცვლილებები, რომ თუ მხარე იშუამდგომლებს, შესაძლებელია გამოტანილი გადაწყვეტილება დაუყოვნებლივ აღსასრულებლად მიეცეს, თუ მხარე ასეთ შუამდგომლობას არ დააყენებს, მაშინ დაუყოვნებლივ აღსასრულებელ გადაწყვეტილებად არ იქცევა. ანუ როდესაც პირველი ინსტანციის გადაწყვეტილება გამოვა, თუ მოსამართლე დაუყოვნებლივ აღსრულების შუამდგომლობას დააკმაყოფილებს, პირდაპირ შეიძლება პირის გამოსახლება და მოსარჩელე მხარე აღარ დაელოდება აპელაციის და კასაციის პასუხს.

- რა შემთხვევაში გადაავადებს აღსრულების ეროვნული ბიურო უკანონოდ შეჭრილი მოქალაქის გამოსახლებას?

- აღსრულების კანონის მიხედვით, გამოსახლება შეიძლება გადავადდეს 6 თვით, თუ აღსრულება ზნეობრივ და მორალურ პრინციპებს ეწინააღმდეგება.

თეა ბეჟიტაშვილი

AMBEBI.GE