ქართველი კრიმინალების მასობრივი დაკავების ფაქტები უცხოეთში

დანაშაულებრივი ჯგუფის წევრობა, ფულის გათეთრება, ქურდობა, ყაჩაღობა, ნარკოტიკული ნივთიერებების შეძენა-შენახვა-გასაღება და მოხმარება - ეს იმ ბრალდებების არასრული ჩამონათვალია, რის გამოს საქართველოს მოქალაქეებს უცხოეთში სამართალდამცავ სტრუქტურებთან ხშირად ექმნებათ პრობლემა.

რამდენიმე დღის წინ საზოგადოებამ მასშტაბური ოპერაციის შესახებ შეიტყო, რომელიც ესპანეთის რამდენიმე ქალაქში, მათ შორის მადრიდში, ბარსელონაში, სევილიასა და ჩრდილოეთ ესპანეთის ბარაკალდოს დასახლებაში ერთდროულად ჩატარდა. როგორც აღმოჩნდა, საქართველოს მოქალაქეებთან ერთად ესპანეთის მოქალაქეებიც დააკავეს. საერთო ჯამში 50 ადამიანი. "დოიჩე ველეს" ცნობით, ესპანეთის სამართალდამცავი ორგანოები არ აპირებენ ქართველების გათავისუფლებას, რადგან შესაძლოა, ისინი გამოძიების დროს მიიმალონ. ასევე ცნობილია, რომ სამართალდამცავები ეძებენ სპარტაკ ჯაფარიძეს, რომელიც ე.წ "კანონიერი ქურდის" სტატუსითაა ცნობილი და დანაშაულებრივი ჯგუფის ლიდერად მოიაზრება.

სამართალდამცველების ვარაუდით, ქართველები ესპანელი მოქალაქეების დახმარებით ძირითადად საიუველირო ნაკეთობებსა და საათებს იპარავდნენ. დაკავებულებს ყაჩაღობის გარდა, შესაძლოა, ბრალი წაუყენონ შემდეგი მუხლებით: დანაშაულებრივი დაჯგუფების წევრობა და ფულის გათეთრება. ზოგიერთ მათგანს კი ბრალი წარედგინება იარაღისა და ნარკოტიკის უკანონო შენახვისა და საბუთების გაყალბების ბრალდებით.

აღსანიშნავია, რომ საქართველოს მოქალაქეების მასშტაბური დაკავება უცხოეთში პირველი შემთხვევა არ არის. თავისუფლების განვითარების ინსტიტუტის (IDFI)-ის კვლევის შედეგების მიხედვით, 2010-2015 წლებში საზღვარგარეთ ჩადენილი დანაშაულისთვის საქართველოს 3 715 მოქალაქეა დაკავებული.

რამდენიმე დღის წინ ესპანეთის ქალაქებში ჩატარებულ სპეცოპერაციას, წინ უძღოდა ასევე ესპანეთში 2015 წლის მასშტაბური ოპერაცია. მაშინ ესპანელმა ჟურნალისტებმა ქართველი კრიმინალების მუშაობის სრული სქემა გაშიფრეს, დაწყებული ესპანეთში მათი ჩასვლიდან, ნაქურდალი ფულის საქართველოში გადმოგზავნით დასრულებული. ექსპერტების თქმით, ქართული მაფია ერთ-ერთი ყველაზე საშიშია ევროპაში.

"უხილავი ქურდები" - ამ სათაურით ესპანური ტელეკომპანია La Sexta ჟურნალისტური გამოძიების სერიას აქვეყნებდა. "ისინი მოქმედებენ ძალადობის გარეშე, ჩუმად ტეხენ სახლების კარებს, ისე რომ თავდაპირველად ძარცვის მსხვერპლნი ვერც კი ამჩნევენ სახლში ქურდობის კვალს. რა არის მსოფლიოს ყველაზე სუფთად მომუშავე ქურდების საიდუმლო, რომლებსაც შეუძლიათ 10-დან 9 კარის გაღება?!" - ასეთი კომენტარი ახლდა თან ტელეკომპანიის ვებ-გვერდზე განთავსებულ ვიდეოს.

2015 წელს საფრანგეთში, ლა-როშელის რაიონში დანაშაულებრივი ჯგუფის 11 წევრი დააკავეს, პარალელურად სტრასბურგში განხორციელებული სეცოპერაციის შედეგად პოლიციელებმა 22 ადამიანი დააკავეს. ყველა მათგანი საქართველოს მოქალაქეა. ესპანეთისა და საფრანგეთის ქალაქები უკვე წლებია, ქურდული სამყაროს შტაბ-ბინად იქცა. საქმე იქამდე მივიდა, რომ ამ ქვეყნების სამართალდამცავები იძულებული გახდნენ, ქართული მაფიის ასალაგმად ტრანსნაციონალური სპეცოპერაციებიც კი ჩაეტარებინათ, როგორიცაა "იავა" და "ოსა" - ესპანეთში.

2015 წელს ბერძენი სამართალდამცველების აქტიური მუშაობის შემდეგ საბერძნეთში საქართველოს 10 მოქალაქე დააკავეს. ბრალდებულთა შორის იყო 4 ქალი. სამართალდამცავთა ცნობით, ქართველი ქალები ბერძნების სახლებში მომვლელებად მუშაობდნენ. გამოძიების მასალების მიხედვით, ბოლო თავდასხმისას მათ მოხუც ქალს დასაძინებელი პრეპარატის დიდი დოზა გაუკეთეს და სახლიდან 3700 ევრო წაიღეს. დაჯგუფებას, რომელსაც ბერძნული პოლიცია რამდენიმე თვე ეძებდა, გამოძიების ინფორმაციით, 10-ზე მეტი დანაშაული ჰქონდა ჩადენილი. სამართალდამცველებმა ჩხრეკისას ნაქურდალი ნივთების ნაწილი და ფული ამოიღეს.

ეკა გადახაბაძე

AMBEBI.GE