"ჩემპიონები სამუდამოდ" - ავიაკატასტროფაში დაღუპულ ფეხბურთელებს პანაშვიდს სტადიონზე გადაუხდიან

ბრაზილიური საფეხბურთო კლუბის "შაპეკოენსის" ფეხბურთელების ცხედრების ამოცნობა დასრულდა. კოლუმბიაში დამკრძალავი ბიუროს თანამშრომლებმა ცხედრები სამშობლოში გადასასვენებლად მოამზადეს. გარდაცვლილი ფეხბურთელები ბრაზილიაში, ბოლივიაში, ვენესუელასა და პარაგვაიში ხუთშაბათს საღამოს გადაასვენეს, ნაწილს კი პარასკევს დღის განმავლობაში გადაასვენებენ.

სამშობლოში გასამგზავრებლად გამზადებულ ჩასასვენებლებზე "შაპეკოენსის" დროშებია გადაფარებული წარწერით: "ჩემპიონები სამუდამოდ".

გარდაცვლილ ფეხბურთელებს ქალაქ შაპეკოს სტადიონზე დაასვენებენ, სადაც სამოქალაქო პანაშვიდი გაიმართება. პანაშვიდს ბრაზილიის პრეზიდენტი მიშელ ტემერიც დაესწრება.

თვითმფრინავი, რომელშიც ბრაზილიური საფეხბურთო კლუბის "შაპეკოენსის" წევრები იმყოფებოდნენ, კოლუმბიის მთებში სამშაბათს ჩამოვარდა და 77 მგზავრიდან, 71 დაიღუპა.

მომზადებულია nypost.com-ს მიხედვით