"ბიზნესდაჯილდოება 2016": 523 ბიზნესს შორის გამარჯვებული 7 კომპანია და მოულოდნელი ჯილდო

"თიბისი ბანკისა" და "ჯეოსელის" ერთობლივი პროექტი "ბიზნესდაჯილდოება 2016", რომელშიც 523-მა კომპანიამ მიიღო მონაწილეობა, წარმატებით დასრულდა. გამარჯვებულები 17 ნოემბერს, თბილისის ისტორიის მუზეუმ "ქარვასლაში" გამართულ ფინალურ ღონისძიებაზე გამოვლინდნენ. ზოგიერთი დაჯილდოებულისთვის გამარჯვება სრულიად მოულოდნელი იყო, ზოგი ფინალისტი კი მოუთმენლად ელოდა საბოლოო გამარჯვებას, რომელიც მათთვის დამატებითი სტიმულისა და ენერგიის მობილიზების ერთგვარი გარანტი აღმოჩნდა.

"ბიზნესდაჯილდოება 2016" მიმდინარე წლის 20 ივნისს დაიწყო და ის რამდენიმე ფაზისგან შედგებოდა. პირველ ეტაპზე კომპანიები მათთვის სასურველ ნომინაციებში დარეგისტრირდნენ. შემდეგ ეტაპზე კვალიფიციური ექსპერტებისგან შემდგარმა დამოუკიდებელმა კომისიამ განაცხადები შეისწავლა და თითოეულ ნომინაციაში 3-3 ფინალისტი გამოავლინა. რაც შეეხება ნომინაციას: "ხალხის რჩეული" გამარჯვების მსურველი კომპანიები ონლაინ ხმის მიცემის მარათონში ჩაერთნენ. 1-დან 17 ნოემბრის ჩათვლით ნებისმიერ მოქალაქეს შეეძლო 24 საათში ერთხელ თავისი ფავორიტი კომპანიისთვის ხმა მიეცა.

"ბიზნესდაჯილდოება 2016" წლის ფინალურ ღონისძიებაზე გამარჯვებულები შემდეგ ნომინაციებში გამოავლინდნენ. "წლის ტურისტული ბიზნესი", "წლის ინოვაციური ბიზნესი", "წლის აგრობიზნესი", "წლის ქართული პროდუქტი", "წლის მცირე ბიზნესი","წლის ბიზნესი". ნომინაციაში "ხალხის რჩეული" გამარჯვებულად ის კომპანია დასახელდა, რომელმაც ონლაინ ხმის მიცემის პრინციპით ყველაზე მეტი ხმა დააგროვა.

"წლის ტურისტული ბიზნესის" ტიტული რესტორანმა "ბარბარესთან" მოიპოვა. "წლის ინოვაციურ ბიზნესად" "ბიოქიმფარმი" ( biochimpharm) დასახელდა, "წლის აგრობიზნესის" ტიტული წილად კომპანია "ბი-პი-სის" ( BPC) ხვდა, "წლის ქართულ პროექტად" კომპანია "ბადაგი" დასახელდა, "წლის მცირე ბიზნესად" - "ვაით სტუდიო" (WHITE studio), "წლის ბიზნესის" ტიტული ბანაკ "ზეთას" (Zeta Camping) ხვდა წილად, ხოლო "ხალხის რჩეული" კომპანია "კინგსი საქართველო" (Kings Georgia) გახდა. ამ უკანასკნელს, რომელმაც 16 555 ხმა მოიპოვა, ძლიერი "პაექრობა" გაუწია გამომცემლობამ "წიგნები ბათუმში", რომელსაც 16 538 ხმით სულ ცოტა დააკლდა, რომ ნომინაციაში "ხალხის რჩეული" გამარჯვება მოეპოვებინა.

სრულიად მოულოდნელი აღმოჩნდა ჯილდო ბანაკ "ზეთასთვის". როგორც "ზეთას" დამფუძნებელმა და ხელმძღვანელმა ანანო არაბულმა AMBEBI.GE - სთან საუბრისას აღნიშნა, ნომინაციაში "წლის ბიზნესი" გამარჯვება დიდი სიურპრიზი იყო:

"ისიც კი არ ვიცოდი, ეს ნომინაცია თუ არსებობდა. ეს ძალიან დიდი სიურპრიზი იყო ჩემთვის. დღევანდელი დღე მომავალში ჩვენს დიდ პასუხისმგებლობას განაპირობებს. ისეთ ნომინაციაში მივიღეთ ჯილდო, რომელიც უზარმაზარ შრომას მოითხოვს. უფრო მაგარი უნდა იყო, უკეთესი უნდა გახდე. ჩვენი ქვეყნისთის, მითუმეტეს, დამწყები ბიზნესისთვის ეს უზარმაზარი მოტივაცია იქნება. უზარმაზარი შრომა ჩავდეთ, მაგრამ ასე თუ დაფასდებოდა არ ველოდით. მომავალი წარმატება, დარწმუნებული ვარ. გარკვეულწილად დღევანდელი დღით იქნება განსაზღვრული და უფრო მეტს ვიშრომებთ", - აღნიშნა ანანო არაბულმა და დასძინა, რომ პროექტის ფარგლებში ბიზნესმა ბევრი საინტერესო კონტაქტი, ინფორმაცია თუ თანამშრომლობის პერსპექტივა მიიღო.

"ამ პროექტმა ბევრი ძალიან საჭირო კონტაქტი შეგვძინა, ბევრი ახალი კომპანიის შესახებ გავიგეთ, რომლების შესახებაც არ ვიცოდით. მათთან თანამშრომლობასაც ვგეგმავთ, თუ ეს მათი სურვილიც იქნება. მსგავსი ბიზნესებისთვის უზარმაზარი დახმარებაა, გაიცნონ ერთმანეთი, გაეცნონ ქვეყანას, მომხმარებელს... ჩემი აზრით, ეს პროექტი ყველასთვის ძალიან წარმატებული იყო იმიტომ, რომ დიდი სტიმული მისცა ყველას მეტი ეშრომათ, უფრო კარგები ყოფილიყვნენ და თავის ნომინაციაში წარმატებისთის მიეღწიათ", - აღნიშნა ანანო არაბულმა.

ბანაკ "ზეთას"წარმომადგენლისგან განსხვავებით, ოპტიმისტური მოლოდინები ჰქონდა რესტორნის "ბარბარესთან" დირექტორს, მარიამ ჯიბუტს:

"შინაგანად დარწმუნებული ვიყავი და ვფიქრობდი, რომ თუ ღირსეულად გავიმარჯვებდით, კარგი იქნებოდა. სიხარულით შევხვდებოდი ყოველივე გადაწყვეტილებას, მაგრამ ძალიან დიდი სიხარუალია ასეთი შედეგი იმ ყველაფრის შემდეგ, რაც ჩვენ ჩავდეთ რესტორანში "ბარბარესთან". როდესაც ამდენს აკეთებ და ქვეყნის სამსახურში ხარ, შენი შრომა ფასდება და შედეგზე გადიხარ, ძალან სასიამოვნოა. ვიტყოდი, რომ საინტერესო პროცესია თავად მოლოდინის რეჟიმი. აჟიტირებულები ვიყავით, ვფიქრობდით, ველოდით და დღეს ძალიან ბედნიერები ვართ, რომ ჩვენი შრომა დაფასდა, მივაღწიეთ წარმატებას, რაც მეტი სტიმულის მომცემია, რათა ვიყოთ საქართველოს სავიზიტო ბარათი კულინარიული, გასტრონომიული განხრით. რათა მეტი შრომა ჩავდოთ განვითარებაში, გავაცოცხლოთ ახალი იდეები, რომელიც ჩვენს გუნდს აქვს და მთელ საქართველოს, ასევე მსოფლიოს, სხვა თვალით დავანახოთ რესტორანი "ბარბარესთან" და ქართული კულინარია. " - აღნიშნა მარიამ ჯიბუტმა.

ბიზნესდაჯილდოების მონაწილეების დამოკიდებულებიდან გამომდინარე, თამამად შეიძლება აღინიშნოს, რომ პროექტი წარმატებით განხორციელდა - პროექტმა მთავარ მიზანს მიაღწია. რადგან მისი ორგანიზატორების ინფორმაციით, "ბიზნესდაჯილდოება 2016" ქვეყანაში ბიზნესის კეთების პოპულარიზაციას, მცირე და საშუალო ბიზნესის მხარდაჭერას და დამწყები მეწარმეების წახალისებას ისახავს მიზნად, რათა მათაც გამოიყენონ ქვეყანაში არსებული შესაძლებლობები და საკუთარი ბიზნესი წამოიწყონ. როგორც თიბისის სამეთვალყურეო საბჭოს თავმჯდომარემ, მამუკა ხაზარაძემ "ბიზნესდაჯილდოება 2016" - ის ფინალურ ღონისძიებაზე განაცხადა, ამ პროექტის საშუალებით საქართველოში ბიზნესმენების ახალი ტალღა დაიბადა:

"დღეს საქართველოში თქვენი სახით დაიბადა ბიზნესის ახალი სახეები და ბიზნესის ახალი ტალღა. ეს არის მესამე თაობა საქართველოს ბიზნესმენებისა, ადამიანებისა, რომლებიც იდეიდან ქმნიან სამუშაო ადგილებს; ადამიანებისა, რომელბმაც მიუხედავად იმისა, რომ ნებისმიერი კომპანიის განვითარება, პატარა იქნება ის თუ დიდი, არის ძალიან რთული, ეს ეტაპი გაიარეს. დამკვიდრდნენ ბაზარზე, შექმნეს საკუთარი გუნდი, შექმნეს ბაზარი, უზრუნველყვეს საჭირო ფინანსირებით და განვითარების ახალ ეტაპზე გადადიან." - აღნიშნა მამუკა ხაზარაძემ. მან წარმატება უსურვა პროექტის მონაწილეებს და იმედი გამოთქვა, რომ აღნიშნულ სფეროში ნდობის ფაქტორი იმდენად მაღალი იქნება ადამიანებს შორის, მხოლოდ ხელის ჩამორთმევა თუ პირისპირ საუბარი უკვე საკმარისი აღმოჩნდება საერთო საქმიანობის წარმატებით განსახორციელებლად.

აღსანიშნავია, რომ "ბიზნესდაჯილდოება 2016" -ის მიმდინარეობისას თიბისი ბანკი და ჯეოსელი საკუთარი რესურსებით ეხმარებოდნენ კომპანიებს სხვადსხვა პიარ და მარკეტინგული აქტივობების განხორციელებაში. პროექტის ორგანიზატორების ინფორმაციით, სოციალური ქსელის მეშვეობით "ბიზნესდაჯილოების" შესახებ მილიონმა ადამიანმა შეიტყო; ჰეშთეგი "გააზიარეწარმატება 90 000 - მდე ადამიანმა გააზიარა, ხოლო მედიასაშუალებებში პროექტისა და მონაწილეების შესახებ 200 - ზე მეტი სტატია და რეპორტაჟი მომზადდა.

თბილისის ისტორიის მუზეუმში გამართულ "ბიზნესდაჯილდოება 2016" - ის დაჯილდოების ცერემონიას ეკონომიკისა და მდგრადი განვითარების მინისტრი დიმიტრი ქუმსიშვილი, მთავრობისა და ბიზნესის წარმომადგენლები, ასევე, "ბიზნესდაჯილდოება 2016-ში" მონაწილე კომპანიები ესწრებოდნენ.

როგორც ორგანიზატორები აღნიშნავენ, ბიზნესდაჯილდოება მომავალ წელსაც გაიმართება და მას ბევრი საინტერესო სიახლე დაემატება.

თამარ კორკოტაშვილი

AMBEBI.GE

(R)