ვინ არიან დეპუტატები, რომლებიც მე-9 მოწვევის პარლამენტის პირველ სხდომას არ დაესწრნენ

ქუთაისში მე-9 მოწვევის პარლამენტის პირველი სხდომა გაიხსნა. სხდომა ქუთაისის პარლამენტის შენობაში, 12:00 საათზე დაიწყო და ის საქართველოს პრეზიდენტმა გახსნა. პრეზიდენტის გამოსვლის შემდეგ სიტყვა გადაეცა პარლამენტის უხუცეს წევრ რევაზ არველაძეს, რომელიც პარლამენტის თავმჯდომარის არჩევამდე პირველ სხდომას წარუძღვება.

არველაძემ სიტყვით გამოსვლისას განაცხადა, რომ სხდომას ახალარჩეული პარლამენტის 141 წევრი ესწრება. თუმცა, როგორც მოგვიანებით მანდატურმა AMBEBI.GE-ს კორესპონდენტს განუცხადა, საბოლოოდ რეგისტრაცია პირველ სხდომაზე დასასწრებად 148 დეპუტატმა გაიარა. შესაბამისად, სხდომას არ ესწრებოდა ორი პარლამენტარი.

როგორც გავარკვიეთ, ეს ორი ადამიანი - "ნაციონალური მოძრაობის" წევრი სანდრა რულოვსი და "ქართული ოცნების" წევრი გია ჟორჟოლიანი არიან. არსებული ინფორმაციით, გია ჟორჟოლიანი სამსახურებრივ მივლინებაშია, რაც შეეხება სანდრა რულოვსს, მისი პარლამენტში არ მისვლის მიზეზი ცნობილია - "ნაციონალური მოძრაობის" სიის მეორე ნომერმა, დეპუტატის მანდატზე უარი თქვა. მან აღნიშნულის თაობაზე ცენტრალურ სარჩევნო კომისიას 7 ნოემბერს მიმართა. მისი ადგილმონაცვლე პარლამენტში გიორგი ღვინიაშვილი იქნება.

ინგა მურუსიძე

AMBEBI.GE